ISAÍAS 7 - Qullan Arunaka DC

2. Qillqatax Cristot parli(7—12)Isaías profetan Ahaz reyir parlañ qalltatapa

1Resín sata Siria markan reyipampi, Pécah sata Israelan reyipampi, jupasti Remaliasan yuqapänwa; uka pani reyinakax Jerusalén markar nuwantasaw atipjañ munapxäna, ukampis katuntañatakix janiw ch'amanïpkänti. Ukasti Ahaz reyix Judá marka apnaqkäna ukapachaw lurasïna. Jupasti Jotam chachan yuqapänwa Oziasan allchhiparaki.

2Ukapachaw Ahaz reyiru, utapankirinakaparux aka yatiyäwi yatiyapxäna: “Siria jaqinakax alayankkis uka israelitanakampiw mayacht'asxi” sasa. Uk ist'asasti, reyisa, taqi jaqinakasa, axsarañat wal khathatipxäna, kunjämatix quqanakan laphinakapax thayan thayt'anitax wal khathatkix ukhama.

3Tatitusti Isaías profetarux sänwa: “Sear-iasub sat wawamar irpxarusim, ukatsti Ahaz reyimpi jikisir saram. Amsta tuqinkir uma qutaña larqa tukuyan jupampix jikisïta, ukasti Isinak T'axsurin uraqipar sarkis uka thakhinkiwa,

4reyirusti akham sarakim:

‘Wal amuyasim, janirak mulljasimti,

Resín sat reyimpi, Sirio jaqinakapampi,

Pécah sat reyimpix, wali phiñasitäpxiwa,

ukampis jan axsaramti, janirak llaythasimsa,

jupanakax mä jisk'a ninar uñtatakïpxiwa,

mä juk'a jiwq'i mistuyasasti, jank'akiw jiwt'xi.

5-6Jupanakax jumar jan wal lurañ amtapxi;

Judá uraqiruw mantantaniñ munapxi,

uka uraqsa katuntasiñ munapxi,

jaqinakaparus axsarañampi phuqhantañ munapxi.

Tabeel sat chachan yuqaparuw reyit utt'ayañ munapxi”

7Ukampis Tatitux siwa:

¡Ukax janiw kunapachas ukham luraskaniti!

8-9Damasco markasti Siria markan qamäwi markapawa,

Resín sat chachasti uka Damasco markan reyiparakiwa.

Samariasti Israel markan qamäwi markapawa,

Pécah sat Remaliasan yuqapasti Samarian reyiparakiwa.

Akat paqallq tunka phisqani mararuxa,

Israel markax q'ala chhaqtayatäniwa;

jumanakatix jan suma iyawsañanipkäta ukapachaxa,

janiw suma ch'amani sayt'ayatäpkätati’ ” sasa.

Payïr yatiyäwi: Emanuel wawan yuritapa

10Tatitusti Ahaz reyirux sarakïnwa:

11“Tatitu Diosamar mayim mä muspharkañ lurañapataki, jumatakix ukax mä chimpükaspas ukhamäniwa, inas aka uraqit juk'amp manqhansa, jan ukax kawki wali alay pachansa kunas luraschispa” sasa.

12Ahaz reyisti sarakïnwa: “Janiwa, janiw nayax Tatitur mä chimpu mayisax yant'käti” sasa.

13Isaías profetasti sarakïnwa:

“David reyin utapankirinaka, ist'apxam.

¿Jumanakatakix janit kunäkisa jaqinakar majañaxa,

Tatiturus ukham majañ munapxarakta ukasti?

14Tatitu kipkaw jumanakarux mä chimpu churasipkätam:

Tawaqux usur jaqiptatawa,

mä yuqall wawa wawachasini,

Emanuel sasarakiw sutichani, ukasti “Tatitusti jiwasampïskiwa” sañ muni.

15Uka wawasti qallta maranakapanxa,

lechempi, misk'impik manq'ani.

16Ukampis uka wawaxa,

janïra kunatix askïki, ukhamaraki

jan walïki ukanakat amuykani ukapachaw

uka pani reyinakan markanakapax apanukutäni,

kawkïri markanakatix jumarux axsarayktam uka markanaka.

17“Isaías profetax saskakïnwa:

“Tatitux Judá markar nuwantañatakix Asiria markankir reyiruw khithanini.

Reyin utapankirinakaru, taqi markpacharuw jupax nuwantani.

Kunayman jan walt'añanakaw sartani.

Janipuniw jichhakamax ukanakax uñjañäkiti.

Israel markan Judá markat t'aqaqtatapat taqi akanakax ukham lurasini.”

18Uka uru purinxan ukkhasti, Tatitux Egiptonkir ejercitoruw jawsani,

jupanakasti chhichhillankhanakar uñtataw jutantapxani;

Asirian ejercitoparusti wayrunqunakar uñtat jutayarakini.

19Taqi jupanakasti jach'a q'awa manqhanakana,

jach'a qarqa p'iyanakan utjantasipxani,

Ch'umi ch'aphinak taypina, uywa umt'aña chiqanakan utjantasipxani.

20Uka uru purinkani ukkhasti,

Asiriankir reyix Judá markaruw mutuyani,

uka luräwimpisti q'al jisk'achjani.

21Uka urunakansti khititix mä vaca, pä oveja uywaskani ukanakan

22walja lechew utjani, ukatsti queso manq'apxani. Taqi khitinakatix markan t'unjatäñapat qhispipkani ukanakasti, quesompi misk'imp manq'apxani.

23Uka urunakansti kunatix nayrax waranqa uva alinak yapuchatäkäna, uka uva alinakan alapas waranqa qullqïkän ukaxa, jichhax ch'aphi alirukiw tukxani.

24Taqi markpachan ch'aphi alinakar tukutapatxa, ukarux kun katuñatakikiw mich'inak apt'at mantapxani.

25Nayrax phat'añampi yapuchapkän uka qullunakanxa, jichhax ch'aphi alinakaw jilantani, uka taypir mantañsa wal axsarayasipxani. Vacanakana, ovejanakan manq'apxañapatakikiw askïni.