JOEL 2 - Qullan Arunaka DC

1Jerusalén markan trompet phust'apxam;

Tatitun utapan jach'at phust'apxam.

Judá markan utjirinakas taqin khathatipxpan,

Tatitun urupaw jak'achasisinki:

2ch'amaka laxa uruwa,

qinaya ch'iwi ururakiwa.

II. TATITUN URUPAT WASITAT YATIYASITAPA(2.2b-11)T'iju t'ijunakax tukjañatakiw chhukt'apxi

Wali ch'amani walja soldadonakan ejercitow qullunakan aywtani,

willjta qhanar uñtataw uraqxar purintani.

Janipuniw kunapachas ukax uñjasirïkänti,

kunatix jichhax uñstki ukaxa,

jutir urunakansa janirakiw uñjaskaniti.

3Taqi kun nakhantir ninjamawa,

janïr purinkasas niy nakhantxiwa,

qhipatsa nakhantaskakiwa.

Aka uraqix, janïra t'iju t'ijunak aywintanipkän ukkhaxa,

mä suma panqarkir uraqïnwa, sarxapxatapatsti ch'usa wasar uraqikïxiwa.

¡Janirakiw khitis jupanakat qhispkiti!

4T'iju t'ijunakax caballot jalir jaqinakjamaw jalapxi,

5qullunakan jalnaqatapaxa,

ch'axwar sarantir carronakjamaw ist'asi,

waña laphinakax ninan nakhantatax t'aqarki ukhamäpxiwa.

Mä ch'aman ejercitjamawa,

nuwt'asiñatak wakicht'atäpkaspas ukhama.

6Jaqinakasti ukanakar uñjasax khathatipxiwa,

ajanunakapas q'illuruw tukuwayxi.

7Ch'axwanakan nuwasiri jan axsarir jaqinakjamaw jalapxi,

pirqanaksa thuqhukipawäpxakiwa,

nayraqataruw sarantapxi,

jan maynis thakhi pantjasa.

8Janirakiw jupanakkamax takxatasipkiti,

sapa maynis thakhip saraskaraki,

mich'inak antutt'at taypinjamas sarantasipkakiwa

wali suma siqicht'ataw sarantapxi.

9Markarus nuwantañatakjamaw muyuntapxi,

pirqa patanak jalanaqapxi,

uta patanakaruw mistupxi,

lunthatanakjamaw ventananakat mantaranttapxi.

10Aka uraqisti jupanak uñjasax khathatiwa,

alaxpachas axsarañat chhijthaptiwa,

intisa, phaxsis ch'amakt'xiwa,

warawaranakas janirakiw sum k'ajtkxiti.

11Tatitusti, ejercitop nayraqatanxa,

jach'a arup ist'asiyi.

Ejercitopax waljanipuniwa,

jupan arsutap phuqhirinakax jan jakt'kayawa.

¡Kunja jach'a axsarkañas Tatitun urupaxa!

Janiw khitis juparux saykatkaspati.

III. KUSISIÑARU, TATITUR YUSPAGARAÑAR JAWSÄWI, QHISPIYASIÑ UTJATAPAT ARSÜWI(2.12-27)Tatitun khuyapayasiñapa

12“Tatitux akham siwa:

—Taqi chuymampi nayan ukar kuttanxapxam.

¡Ayunapxam, Tatitur art'asipxam, jachapxarakim!” —sasa.

13¡Juchanakamat amthapisisax Tatitumar makhatxapxam,

isinakam ch'iyanuqkamayaxa,

chuymanakamay ch'allxtayasipxam!

Tatitux khuyapayasiriwa,

llamp'u chuymaniwa, munasiñapas jach'arakiwa;

juchanak luratat mutuyañäki uksa, jiwasat apaqirirakiwa.

14Tatitux inas juchanakamat mutuyañ jan amtaskxchiniti,

inas suma waxt'äwinak apayanchini:

trigompi, vinompi

jupar luqtäwinak churañataki.

15¡Jerusalén markan trompet phust'apxam!

Tatitun markaparusti ayuno lurañatak jawsthapipxam;

16Tatitun markapar tantacht'apxam, ukatsti q'umachapxarakim;

chuyman jaqinakaru, wawanakaru,

ñuñuskir wawanakamppachar tantacht'apxam.

¡Jichha jaqichasirinakas

jaqichasiñ utapat mistunipxpan!

17Sacerdotenakasti jachapxpan,

Tatitur luqtirinakas altarap nayräxan mayipxarakpan:

“Dios Tata, markamarux juchanakapat pampacham;

janikiy markamat khitin larusiñapsa munamti,

yaqha markanakan markamar apnaqañapsa janirak munamti,

Diosar jan uñt'ir jaqinakan jan saskañapataki:

‘¿Kawkinkarak Diosamasti?’ ” sasa.

18Ukatsti Tatitux munasiñap markaparux uñacht'ayi; markapat khuyapt'ayasisasti,

19sarakiwa:

“Jichhax trigo, vino, aceite apayanipxäma,

ukanakampi sist'asipxañamkama,

Diosar jan uñt'ir jaqinakan

jumanakat larusipxañap janiw munkäti.

20Amsta tuqit jutir t'iju t'ijunaksa

jumanakat wasararuw apanukü.

Nayraqat saririnakapsti Mar Muerto sat qutan axskatayä,

qhipa saririnakapsti Mediterráneo sat jach'a qutan axskatayarakï,

janchinakapas ñusantasax jan wal q'aphini.

¡Nayax jach'a luräwinak lurä!”

21Munat markaxa, walpun kusisim, janirak axsaramti,

Tatitusti jach'a muspharkañ luräwinak lurani.

22Pampankir animalanaka, jan axsarapxamti,

chhuxllanakax ch'uxñatatxaniwa,

quqanakas achunak churxani,

higosa, uvasa jilarkirirakiw utjani.

23¡Sionan utjir jaqinaka, kusisipxam,

Tatitu Diosamampi kusisipxam!

Jupaw wakisit urun jallu apayanipxtam,

nayra jallsa, qhipa jallsa puriyaraki,

kunjämtix nayra pachax apayankän ukhama.

24Trigox walpun achuntani,

aceitesa, vinosa jilarkiriw utjani.

25“Jumanakar tukjañatak t'iju t'ijunak khithankta

uka maranakatxa,

nayaw kuttayxapxäma.

26Jumanakasti sist'asiñkamaw manq'apxäta,

Tatitu Diosamarurakiw yupaychapxäta,

nayasti jumanakatakix jach'a muspharkañanak lurta.

Markaxasti janipuniw mayampis p'inqachatäkxaniti,

27Israelita jaqinaka,

ukkhaw jumanakax naya Tatitun jumanakampïskatax yatipxäta,

nayätwa Diosamaxa, janirakiw yaqhax utjkiti.

¡Markaxasti janipuniw mayampis p'inqachatäkxaniti!”

IV. QULLAN AJAYUN PURINITAPA(2.28-32[3.1-5])Diosan ajayupaw jutaski

28 28 (1) “Taqi akanak qhipatsti,

nayax jaqinakxaruw ajayux khithanï;

yuqanakamasa, phuchhanakamasa,

nayat parlapxani,

chuyman jaqinakasti samkanak samkasipxani,

waynanakasti jutir urut unañchäwinak uñjapxarakini.

29 29 (2) Khaya urunakanxa, luqtirinakamxaruw

ajayux khithanï;

30 30 (3) alaxpachansti jach'a muspharkañanak uñacht'ayä,

aka uraqinsti wilampi, ninampi, jiwq'i qinayanakamp uñacht'ayarakï.

31 31 (4) Intix ch'amakt'aniwa,

phaxsis wilaruw tukuni,

Tatitun axsarkay jach'a urupa janïra purinkipana.”

32 32 (5) Khitinakatix Tatitun sutipar art'askani

ukanakaw jiwañat qhispipxani,

Sión qulluna, Jerusalén markana

qhispiyasiñax utjani,

Tatitun arsutaparjamaw phuqhasini.

Khitinakarutix Tatitux ajlliskatayna ukanakax jakasipkaniwa.