2 CRÓNICAS 33 - Qullan Arunaka DC

Manasés reyin Judá marka apnaqatapa(2 R 21.1-18)

1Manasés reyix tunka payan maranïkän ukkhaw Judá marka apnaqañ qalltäna, jupasti Jerusalén markan phisqa tunka phisqan maraw marka apnaqäna.

2Ukampis jupan luräwinakapax Tatit nayraqatan janiw walïkänti, jupasti kawkïr markanakarutix Tatitux israelitanakan nayraqatapat jaqunukkän uka markanakan axtkañ luräwinakap luräna:

3jupasti qullu patanakan yaqha diosanakar yupaychañ utanaka, kawkïrinaktix Ezequías awkipax t'unjkatayna ukanak wasitat sayt'ayäna; Baal diosan lantinakapatakiw altaranak sayt'ayäna, ukatsti Astarté diosan uñtasitanakap lurayäna; ukhamarus alaxpachankir warawaranakaruw killt'asis yupaychäna,

4ukatsti Tatitun utapan altaranak lurayäna, uka tuqitsti Tatitux sänwa: “Sutixax wiñayatakiw Jerusalén markankani” sasa.

5Jupax alaxpachan qhanirinakar jach'añchasaw Tatitun utapan paypach uta anqäxaparu yaqha altaranakamp lurayäna.

6Ben-hinom qhirwa chiqansti, wawanakaparuw wilañcha luqtasa nakhantayäna, ukatsti ajayunakaru, yatirinakar jiskt'asisaw sarnaqäna, ch'amakaninaka, layqasiñanak utt'ayarakïna. Tatit nayraqatan uka luräwinakapax sinti jan walïnwa, ukham lurasaw Tatitur q'apisiyäna.

7Ukhamarak Diosan utaparux yaqha diosar uñtasit luraykatayna uk uchayäna, uka tuqitsti Diosax Davidampiru, Salomón yuqapampirux sataynawa: “Israelan ayllunakap taypit Jerusalenankki uka uta ajllista, sutixan wiñayatak ukankañapataki.

8Israelitanakarux janiw mayampis kawkïr uraqtix nayra awkinakapar churkta ukat jaqunukkäti, jupanakatix taqi arsutanakaxaru, taqi yatichäwinak phuqhapxani, ukhamarak Moisés tuqi churawaykta uka kamachinaka, arsüwinak phuqhapxani ukapachaxa” sasa.

9Ukampis Manasés reyix Judá uranqinkiri, Jerusalén markankir jaqinakarux kawkïr markanakarutix Tatitux israelitanakan nayraqatapan tukjkän uka jan wali lurir markanakat sipansa juk'amp jan walinak lurayäna.

10Tatitux Manasés reyimpiru, markapampiruw parläna, ukampis janiw jupar yäqapkänti.

11Ukat Tatitux jupanakatak asiriankiri reyin ejercitopan jilïrinakaparux puriyanïna, jupanakasti Manasés reyirux ganchompiw nasapat uchantapxäna, broncet lurat cadenanakampi ñach'antasin Babilonia markar apapxäna.

12Ukatsti kunapachatix jan walt'añan jikxataskän ukkhaxa, Manasesax Tatit Diosaparuw art'asïna, nayra awkinakapan Diosap nayraqatanxa jisk'aruw tukt'äna.

13Tatitut mayiskän ukkhasti, Diosax juparux jaysänwa, achikt'asitanakapsa ist'arakïnwa, ukatsti wasitat markap apnaqxañapatakiw Jerusalenar kuttayanxäna. Ukapachaw Manasés reyix Tatitun Diosätap amuyäna.

14Uka qhipatsti, Manasés reyix Davidan Markapan Guihón ukkhata, inti jalanta tuqirux mä uyu pirqa lurayäna, uka pirqax jisk'a jawir chiq sarasax Chawllanakan Punkupa chiqaruw purïna, ukatsti Ófel chiqanjam muyuntanïna. Uka uyu pirqasti alay tuqirux wali jach'a luratänwa. Ukatsti Judá uraqinkir nuwasiñatak lurat taqpach markanakarux, soldadonakan jilïrinakap uchäna.

15Ukxarusti Tatitun utapat yaqha markanakankir diosanakap apsüna, kawkïr yaqha diosanakan altaranakaptix qullu patanakana, Jerusalén markansa luraykatayna ukanakamppach apthapïna, ukatsti markat jayaruw ukanak jaqunukuyäna.

16Ukatsti Tatitun altarap askichayäna, uka altaransti sumankthapiñ wilañchanakampi, yuspagarañ waxt'anakamp luqtäna, Judá uraqinkir jaqinakarusti Israelan Tatit Diosaparuw yupaychayäna.

17Ukampisa, jaqinakax yaqha diosanakan altaranakapan wilañchanak luqtasipkakïnwa, jupanakax Tatit Diosaparu luqtasipkchïna ukasa.

18Manasés reyin ukat ukxar sarnaqäwipasa, Diosar mayisitapasa, Israelan Tatit Diosapan sutipxaru profetanakax qhanañchkäna ukanakasa, Israelankiri reyinakan crónicas sat qillqatapankiwa.

19Jupan mayisitapampi, ist'ayasitapampi, jucha luratanakapasa, jan wali sarnaqatanakapasa, qullu patanakan yaqha diosanakatak yupaychañ utanak lurayatapasa, kawkharutix Astarté diosaru, yaqha diosanaksa uchkäna, Diosapatak janïr jisk'ar tukkasa ukkha, taqi ukanakax profetanakapan sarnaqäwipan qillqatawa.

20Jupax jiwxäna ukkhasti, reyi utapan panqar uyuparuw imt'xapxäna. Ukatsti jupa lantix Amón yuqapaw marka apnaqxäna.

Amón reyin Judá marka apnaqatapa(2 R 21.19-26)

21Amón reyix pä tunka payan maranïkän ukkhaw marka apnaqañ qalltäna, jupasti Jerusalén markan pä maraw marka apnaqäna.

22Ukampis jupan luräwinakapax Tatit nayraqatan Manasés awkipanjam jan walïnwa. Jupasti Manasés awkipax luraykatayna uka yaqha diosanakaruw wilañchanak luqtas yupaychäna.

23Ukampis jupax janiw Tatit nayraqatan jisk'ar tukt'känti, kamisatix Manasés awkipax jisk'ar tukt'käna ukhama, jan ukasti juk'ampiw juch luräna.

24Jupan jilïr irpirinakapax jupatak jan wali amtasax reyi utapan juparux jiwayapxäna.

25Ukatsti markankir jaqinakax Amón reyir ñanqha lurañ amtapki ukanakarux jiwarayapxänwa, ukatsti jupa lantix Josías yuqaparuw reyit utt'ayapxäna.