ISAÍAS 9 - Qullan Arunaka DC

1a 1a (23a) “Ukampis uka jan walt'añanakax janiw wiñayatakïkaniti”.

Sumankañan jilïripan yurïwipampi, apnaqäwipampi

1b 1b (23a) Zabulón, Neftalí ukanakan uraqinakapax Galilea chiqankänwa, uka jak'anarak Tatitur jan uñt'ir markanakax jakapxäna. Uka uraqinakasti Jordán jawirat qalltasina jach'a qutakamaw purïna. Nayra urunakansti Tatitux Galilearux wal jisk'achjäna, ukatsti jach'aruw aptxarakïna, ukat Isaías profetax akham sas yatiyäna:

2 2 (1) Ch'amakan jakir markax

mä jach'a qhan uñjani;

ch'amakan jakir jaqinakatakix

mä suma qhanaw qhantani.

3 3 (2) Tatitu, jumaw mä jach'a kusiskañ apantaxa,

uka kusisiñasti wali jach'apuniwa.

Taqiniw juman nayraqataman kusisipxta,

kunjämtix yapu apthapiñanakan

nanakax kusisipkta ukhama,

kunjämatix jaqinakax qamir kankañ jaljasisax kusisipki ukhama.

4 4 (3) Jumaw tukjtax markamar t'aqhisiykän ukanakxa,

kawkïri t'aqhisiñatix llakisiykän ukanaka,

munañan jaqinakampi apnaqatäkän ukanaka.

Kunjämtix Madián uraqir t'unjktax ukhama.

5 5 (4) Soldadonakan botasanakapasa,

wilarar isinakapasa,

ninampi phichhantatäniwa.

6 6 (5) Mä wawawa jiwasatak yuri,

Tatituw mä yuqall wawa churistu,

uka wawawa jichhax ch'amampi apnaqani.

Akham sasaw sutichapxani:

Amtäwinakapanxa Muspharkaña, jan atipjkay Tatitu,

wiñay Awki, sumankañan Jilïripa, sasa.

7 7 (6) Davidan qunuñapan qunt'asini;

aka uraqpach apnaqani,

samarañapasti jan tukuskayäniwa.

Jupan apnaqäwipax suma utjnuqatäniwa,

kunatix chiqapar uñjañäki,

askïkaraki ukanakxar utt'ayatäniwa,

jichhürut qalltasina wiñaykama.

Taqi akanaksti Tatitun jach'a munasiñapaw lurani.

Tatitun Israel markatak q'apisitapa

8 8 (7) Tatitux mä yatiyäwi Israel markarux apayani;

Israel markarux mutuyäwa sasaw yatiyi.

9 9 (8) Taqi markpachaw katuqi,

Samaria markan jakirinakas

taqpachaniw uka yatiyäwi katuqapxi.

Jupanakasti wali jach'achasiñampiw sapxi:

10 10 (9) “Ladrillonakat lurat utanaksa liwinukusipkpan;

jiwasanakax qalat yaqha utanak sayt'ayasiñani.

Uta q'irunaksa khuchhurasipkpan,

jichhax cedro suma ch'ullqhi lawat uskusxañäni” sasa.

11 11 (10) Tatituw axsarkañ uñisirinak khithani,

jupa pachpaw jiwasar nuwantañapatak arsuraki.

12 12 (11) Inti jalsu tuqitxa, sirio jaqinakaw nuwantapxi,

inti jalanta tuqitsti filisteo jaqinakarakiw nuwantapxi.

Israel markarux maypach uquntapxi.

Ukampisa Tatitun phiñasiñapax janiw apaqtkiti,

jichhas jupax mayamp ukham lurañ amtaskakiwa.

13 13 (12) Ukampis jupanakar mutuyir Tatiturux janiw makhatapkiti;

janirakiw taqi ch'amani Tatiturus thaqapkiti.

14 14 (13) Ukat Tatitux mä urunak

Israel markan jilïrinakaparux jiwarayi,

kunjämtix mä laq'ur jiwayañatakix

wich'inkhapsa, p'iqipsa khuchhurapki ukhama,

kunjämtix maynix palmeranaksa,

suqusanaksa khuchhurkix ukhama.

15 15 (14) P'iqix jilïri irpir jaqinakaruw uñtasi,

wich'inkhasti k'ari yatichir profetanakaruw uñtasiraki.

16 16 (15) Jilïrinakasti aka markarux maysaruw irpanukupxi,

irpiri thaqhirinakasti maysar saranukusaw chhaqhapxi.

17 17 (16) Ukat Tatitux waynanakat jan khuyapt'ayaskiti,

wajchanakatsa, ijma warminakatsa janirakiw khuyapt'ayaskiti.

Taqi markpachasti jach'a juchanak lurir ñanqhakamakiwa,

taqinis ñanqha arunakak parlasipki.

Ukampisa Tatitun phiñasiñapax janiw apaqtkiti,

jichhas jupax mayamp ukham lurañ amtaskakiwa.

18 18 (17) Ñanqha lurañasti jupanakarux jisk'a jisk'a tukji,

kunjämatix mä ninax t'unanaksa, ch'aphinaksa nakhantki ukhama,

quqanaksa, ch'uminaksa q'al nakhantki ukhama,

ukatsti tutukjamaw jiwq'ipax alayar makhati.

19-20 19-20 (18-19) Taqi ch'amani Tatitun phiñasiñap laykuw

aka markax q'ala nakhantayat uñjasi,

ninasti markarux q'al nakhantasin tukji;

pachpa wawanakapan aychanakap manq'apxi,

jilanakapatsa janiw khuyapt'ayasipkiti.

Akan mayniw uquntirix utji,

ukampis manq'at awtjayasiskakiwa,

khayansti maynirakiw manq'irix utji,

janiw sist'askiti.

21 21 (20) Manasesampi, Efrainampix,

jupanakkamaw q'al tukjasipxi,

panpachanisti Judá markaruw nuwantapxi.

Ukampis Tatitun phiñasiñapax janiw apaqtkiti,

jichhas jupax mayamp ukham lurañ amtaskakiwa.