ÉXODO 4 - Qullan Arunaka DC

1Moisesasti Tatiturux wasitat säna:

—Israelan jilïrinakapax janiw yäqapkitaniti, janirakiw ist'añsa munapkitaniti, jan ukasti sapxitaniwa: “Janiw Tatitux uñstkpachätamti” —sasa.

2Ukat Diosax sarakïna:

—¿Kunas amparamanki? —sasa.

Moisesasti sänwa:

—Mä thujruwa —sasa.

3Diosasti sarakïnwa:

—Uraqir thujrum jaqnuqam —sasa.

Moisesax iyaw sasaw uraqir jaqnuqäna, thujrusti, ukspachaw mä katarir tuküna. Moisesasti katari uñjasinxa axsarayasisaw jaltxäna,

4ukampis Tatitux Moisesar saskakïnwa:

—Amparampi wich'inkhat katthapim —sasa.

Moisesax iyaw sasaw katarirux wich'inkhat katthapïna, ukatsti katarix thujrukiw tukuwayxäna. Ukat Tatitux Moisesar säna:

5—Israelan jilïrinakap nayraqatan uka pachparak luram. Ukhamat iyawsapxani Abraham, Isaac, Jacob uka nayra awkinakaman Tatit Diosapan jumar uñstatapa —sasa.

6Tatitusti saskakïnwa:

—Amparam purakamar luqantam —sasa.

Moisesax iyaw sasaw amparap purakapar luqantäna, ukatsti amparap aysusinxa lepra usux amparapan khunjam janq'ukïtap uñjasïna.

7Ukat Diosax sarakïna:

—Wasitat amparam purakamar luqantam —sasa.

Moisesasti iyaw sasaw wasitatamp amparap purakapar luqantäna, ukatsti amparap aysusinxa k'umarak uñxatasxäna.

8Tatitusti sänwa:

—Nayrïr chimpu uñjasatix jan yäqapkätam, janirak ist'apkätam ukaxa, payïr chimpu uñjasaw yäqapxätam.

9Ukampis janitix aka pä chimpu uñjkasasa iyawsapkätam, arunakamsa janirak ist'apkätam ukaxa, jawirat uma aptanisaw uraqir wartäta, uka umasti ukspachaw wilar tukuni —sasa.

10Moisesasti Tatiturux sänwa:

—¡Tatay! Nayax janiw sum parlirïkti. Nayax parlkta ukkhax khakt'irïtwa, janiw arunaksa suma arsurïkti, ukat nayarux jan khitis yäqkituti, wawatpach ukhamätxa —sasa.

11Tatitusti saskakïnwa:

—¿Khitis jaqir laka churi? ¿Khitis luri jan arsur amuturusa, uqararusa, juykhurusa, nayranirusa? ¿Janit naya Diosäktxa?

12Ukhamasti saramaya, parlkäta ukkhax nayaw jumampiskä, nayarakiw kunanaktix arsuñamäki uksa yatichäma —sasa.

13Moisesasti sarakïnwa:

—¡Ay Tata!, achikt'assmawa, yaqharuk khithaskam —sasa.

14Ukat Tatitux Moisesatak q'apisïna, jupar sarakïnwa:

—¡Ukaxay Aarón jilamaxa, Leví ayllunkir sacerdotexa! Aaronax sum parliriwa, jaqirusti iyawsayakiwa. Ukhamarus jupax niyaw jutaski, jumar uñjasax wal kusisini.

15Jumasti Aaronar kunanaktix nayax sisksma ukanak yatiyäta, jupan juma lanti markar sañapataki. Nayasti parlapkäta ukkhax jumanakampïskäwa, nayarakiw yatichasipkäma kunanakatix lurapxañamäki ukanaksa.

16Jumasti nayas parlkirista ukham Aarón jilamar parläta, ukatsti Aaronaw kuntix jumax siskäta uk markar parlaskani.

17Thujrum apasïta, ukampiw jumax kunayman muspharkañanak luräta.

Moisesax Egiptoruw kutt'i

18Moisesasti, Jetró awkch'ipan utapar kutt'asin jupar säna:

—Egipto markar kutt'añaxawa, kawkhankapkitix marka masi jilanakaxax ukaru. Jupanakax jakasipkpachati janicha uk uñjiriw sarañ munta —sasa.

Jetró awkch'ipasti sarakïnwa:

—Ukhamax saramaya, walik saräta —sasa.

19Moisesax Madián chiqankaskän ukkhaw Tatitux jupar sarakïna:

—Egipto markar kutt'askakim, jumar jiwayañ munirinakax taqiniw jiwatäxapxi —sasa.

20Moisesasti, warmipampiru, wawanakapampir mä asnor qunxatayasin Egipto uraqir kutt'äna. Amparaparusti Diosan thujrup ayxarusiwayarakïna.

21Tatitusti, Moisesarux sataynawa:

—Egiptor purkät ukkhaxa, faraonan nayraqatapan wali amuyumpipuniw muspharkañ chimpunak lurañamatak ch'am churksma ukanak luräta. Nayasti faraonan chuymap qalarayä, ukhamat israelitanakarux jan antutkaniti.

22Ukampis faraonarux saskakïtawa: “Tatitux akham siwa: ‘Israelax nayan nayrïr wawaxawa.

23Nayax niyaw sisma: wawaxar khithanukxam, nayar yupaychir sarxañapataki, sasa. Ukampis jupanakar jan antutañ munatamat nayax jilïr wawamar jiwayä’ ” —sasa.

24Thakhi sarkasinsti, Moisesamp wila masinakapampix, mä chiqawjaruw ikt'añatak qhiparapxäna. Ukan Tatitux Moisesar jikxatasin jupar jiwayañ munäna.

25Ukampis Moisesan Séfora warmipax qalat lurat mä cuchillompiw wawapar chhuxurasiñapan lip'ichip khariqäna, ukatsti uka lip'ichimpi Moisesan chara taypipar apkatasin säna: “Chiqpachansa, jumax nayatak wila tuqin chachaxätawa” sasa.

26Tatitusti ukat Moisesar jaytawayxäna. Séfora warmix Moisesar sataynawa: “Chiqpachansa wila tuqi chachaxätawa” sasa, circuncisión luratap layku.

27Ukchañkamasti Tatitux Aarón chacharuw sarakitayna: “Moisés jilamamp jikisir wasarar saram” sasa. Aaronasti iyaw sasaw saräna, Diosan qullupan Moisesarux jikxatäna, ukansti jamp'att'asaw jupar aruntäna.

28Ukatsti Moisesax, kuntix Tatitux siskatayna ukanak Aarón jilapar yatiyäna, kuna muspharkañanaktix lurañapatak arskäna ukanak yatiyarakïna.

29Ukatsti Moisesampi, Aaronampix israelitanakan jilïrinakaparuw tantachthapipxäna.

30Aaronasti kunanaktix Tatitux Moisesar siskatayna ukanak jupanakarux yatiyäna, Moisesasti jupanak nayraqatanxa, kawkïr muspharkañ chimpunaktix Diosax lurañapatak siskatayna ukanak lurarakïna.

31Ukanak uñjasinsti israelita jaqinakax Moisesar iyawsapxänwa, Tatitun jupanakat amtasitapa, t'aqhisitanakapsa uñjatap yatisinxa, jupanakax killt'asisaw Diosar yupaychapxäna.