1 1 (2b) Tatay,
jumaw ch'amañchirixätaxa,
jumaruw taqi chuymamp munassma.
2 2 (3) Jumaw arxatirixätaxa,
imantasiñaxätasa,
jumaw qhispiyirixätaxa, Diosaxätasa,
nayar imantir qarqaxätasa,
imir jark'aqasiñaxätasa,
qhispiyir ch'amaxätasa,
wali amstankir imantasiñaxätasa.
3 3 (4) Tatay,
jumaw jach'añchatäñatak askïtaxa:
art'asinsma ukapachax uñisirinakaxat qhispiyista.
4 4 (5) Jiwax sipitanakapampiw simpantitu;
axsarkay t'unjirin nayraqatapan axsarta.
5 5 (6) Jiwax chinuñanakapampiw muyuntayitu,
¡jiwañ sipitanak taypin jikxatasta!
6 6 (7) Llakisiñaxan Tatitur art'asta,
Diosaxat yanap mayista:
jupasti qullan utapatpach ist'anitu;
¡arnaqasitaxax jinchupkamaw puri!
7 7 (8) Ukapachaw uraq khathatix utjäna,
qullunakasti saphitpach unxtäna;
Tatitun q'apisiñapampi khathatiyatäpxänwa.
8 8 (9) nasapat jiwq'iw mistüna,
lakapatsti nakhantir ninaw lawrsüna,
¡lakapat k'illim sank'anak jutayäna.
9 9 (10) Alaxpach jist'arasin saraqanïna.
Ch'iyär juri qinayxaruw takt'äna.
10 10 (11) Mä chhiqhanin chhiqhapxaruw qunxatäna,
thayampi chikaw chhiqhanakap patanjam jaltäna.
11 11 (12) Ch'amak taypiruw imantasïna,
ch'iyär ch'amaka uman phuqhantat qinayanak taypiru,
uka qinayaw q'al chhaqtayäna.
12 12 (13) Jach'a qunuñap taypitsti,
qinayampi, chhijchhimpi,
nakhaskir sank'anakampiw mistüna.
13 13 (14) Jach'a munañan Tatitux
alaxpachatpach axsarkañ jach'a arup ist'asiyäna;
chhijchhjama, nakhaskir sank'jama.
14 14 (15) Mich'inakap antutt'asaw
uñisirinakaxar tutuktayäna.
15 15 (16) Lamar quta manqhax uñstxänwa;
aka uraqin qalltapas uñstxarakïnwa,
Tatitun axsarkañ arup ist'asitap layku,
q'apisiñ samanap ch'amampi phust'atap layku.
16 16 (17) Tatitux alaxpachatpach amparap luqtanitu,
amparapampiw jach'a lamar qutat waysutu.
17 17 (18) Wali ch'aman uñisirinakaxat qhispiyitu,
nayat juk'amp ch'aman timanakat antutnukuyitu.
18 18 (19) Llakinkipan nayarux chhukxatapxitu,
Tatitusti yanapt'apampiw arxatitu:
19 19 (20) qhispiñ thakhiruw irpsutu,
¡nayar munatap laykuw qhispiyitu!
20 20 (21) Tatitux q'uma sarnaqataxatjam
churäwip waxt'itu,
21 21 (22) nayax Tatitun thakhipan sarnaqta,
¡janipuniw Diosaxarux armanukkti!
22 22 (23) Taqpach arsutanakapax chuymaxankaskiwa;
¡janipuniw kamachinakapat jithiqtaskti!
23 23 (24) Janiw nayraqatapan juchachaskti,
ñanqha lurañat jithiqtasta.
24 24 (25) Tatituw churäwip waxt'itu,
nayraqatapan q'uma chuyman sarnaqataxata.
25 25 (26) Tatay, aski jaqitakix askirakïtawa,
jan kamskayäki uka jaqitakis
jan kamskayarakïtawa,
26 26 (27) qhana chuymanitakix qhana chuymanirakïtawa,
sallqa chuymanitakisti
ch'ikhi chuymanïtawa.
27 27 (28) Jumaw t'aqhisiyat jaqinakarux qhispiytaxa,
jach'a jach'a tukurinakarusti jisk'achjtawa.
28 28 (29) Tatay, jumaw nayarux qhana churista;
Diosaxay, jumaw arum ch'amakaxar qhantaytaxa.
29 29 (30) Juman yanapamampiw uñisirinakaxarux atipjä,
yanapamampiw uyuchrantat markanakapar mantantä.
30 30 (31) Tatitun thakhipax chiqapawa,
jupan arsutanakapax taqi chuymamp iyawskayawa,
¡Tatitux jupar taqi chuymamp alkatirinakarux imaskapuniwa!
31 31 (32) Israel markan Diosapa,
juma sapakiw chiqpach Diosätaxa,
¡juma sapakiw arxatir Diosätaxa!
32 32 (33) Tatituw nayarux ch'am churitu,
juparakiw sarnaqäwixar q'um tukuyi,
33 33 (34) jupaw tarujan kayupjam jaltir kayunak churitu,
alax chiqawjanakan kayunakaxar sum thuruñcharakitu,
34 34 (35) jupaw uñisirinakaxamp nuwasiñatak yatichitu,
jupaw atipjañatak ch'am churitu.
35 35 (36) Jumaw arxatista, qhispiyarakista,
kupi amparamampiw katxarusista,
khuyapayasiñamaw aytat jaqir tukuyitu.
36 36 (37) Jumaw thakhixarux jasaptaytaxa,
kayunakaxasti janiw llust'kiti.
37 37 (38) Uñisirinakaxarux arktasin jikxatta,
jupanakar tukjanisaw kutinxta.
38 38 (39) Jisk'a jisk'a tukjanta,
jan mayampi sartkir lurjanta.
¡Kayunakaxampi takxatataw uñjasipxi!
39 39 (40) Jumaw nuwasïwin ch'am churista;
qallasirinakarux nayraqataxaruw alt'aytaxa,
40 40 (41) nayraqataxat uñisirinakaxan jaltxapxañapataki.
Ukhamat nayar uñisirinakarux q'al tukjanta.
41 41 (42) Jupanakax yanap mayisipxäna,
janiw khiti yanapt'iris utjkänti,
Tatituruw art'asipxäna,
jupasti janiw ist'känti.
42 42 (43) ¡Thayan apat laq'arjamaw jupanakarux tukusiyta!
¡Thakhinkir ñiq'irjamaw taksurakta!
43 43 (44) Qallkatasir markat qhispiyista,
markanakan jilïripat utt'ayista,
jan uñt'at jaqinakampiw luqtayista.
44 44 (45) Arux ist'asax mäkiw jaysapxitu;
yaqha markankir jaqinakaw jach'achapxitu,
45 45 (46) yaqha markankirinakax llajllasipxiwa,
khathatt'asisaw imantasïwipat mistunipxi.
46 46 (47) ¡Tatitux jallallatäpan!
¡Arxatirixax qullanäpan!
¡Qhispiyir Tatituxax jach'añchatäpan!
47 47 (48) Jupaw naya lanti phuqsur Tatituxa,
jupaw amparaxarux markanak katuyitu.
48 48 (49) Jupaw uñisirinakaxan phiñasitapat qhispiyitu,
nayar qallkatir jaqinakat antutayitu.
¡Tatay, jumaw qhuru jaqinakat qhispiyista!
49 49 (50) Ukatpï markanak taypin yuspagarsmaxa,
sutimarus q'uchunak q'uchuraktxa.
50 50 (51) Jumaw ajllit reyimarux atipaytaxa;
Davidampiru, wawanakapampirux
munasiñampipuniw uñjtaxa.
Who We AreWhat We EelieveWhat We Do
2025 by iamachristian.org,Inc All rights reserved.
