ÉXODO 12 - Qullan Arunaka DC

Pascua uru

1Tatitux Egipto markan Moisesampi, Aaronamp parläna, jupanakarusti sänwa:

2“Aka phaxsix jumanakatak mä suma jach'a phaxsïniwa, mara qallta phaxsïniwa.

3Taqpach israelitanakar sapxam: ‘Aka phaxsit tunka uru saraqatarux sapaqat utankirinakaw sapa utan mä urqu oveja, jan ukax mä cabrito yaqhachapxäta.

4Mä utantix juk'anikïchi, ukat maypach jan manq'antirjamäpkchi ukaxa, utanimpi, uta jak'apankirimpiw mayachasis manq'añapa, qawqhanïpkitix ukhamarjam jalanuqasisa, qawqtix maynix manq'antirjamäki ukhamarjamaraki.

5Uka uywasti mä maranïñapawa, jan kamacht'at suma k'umar urqu uywäñapawa, uka uywax ovejäpasa, cabritöpasa.

6Uksti aka phaxsi tunka pusin uru saraqat urukamaw imapxäta, uküruw jayp'u tuqiru Israelan taqpach jaqinakax sapa mayni uka uywa kharinukupxäta.

7Uka uywan wilampampisti manq'apkäta uka uta punkuruw jawsupxäta.

8Uka arumasti uka aycha manq'apxäta, ninar kankata, jan levaduran t'ant'ampi, jaru ch'uxña alinakampi.

9Ukampis janiw mä jisk'sa ch'uqpach manq'apxätati, janirakiw umar qhathitsa manq'apxätati. Uka uywan p'iqipasa, chhuchhullinakapasa, jiphillanakapas ninar kankatäñapawa,

10janiw kunsa qhipürutak imapxätati; kuna jilt'anaksa, ninaruw nakhantayxapxäta.

11Ukhamarusa, jank'akiw manq'apxäta, isinakamampi isthapita, kayunakamarus wiskhumpi wiskhuntata, amparamansa thujru ayt'ataraki, Tatitun Pascua urupätap layku.

12Uka arumasti nayax taqpach Egipto uraqi chiqaw sarakipawayä, ukatsti egipcionakan taqi jilïr tayna yuqall wawanakap jiwaräwayä, ukhamarak uywanakan nayrïr qallunakaparu, ukhamat Egipton diosanakaparux mutuyä. Naya, Tatituw uk arsta.

13“ ‘Ukampis juma israelitanakax janiw axsarapxañamäkiti; punkunakar wilampi jawsupkäta ukaw nayatak mä chimpüni. Nayasti uñjasinxa, sarakipawayxakïwa, janiw jilïr wawanakamarux kamachkäsa,

14Aka urux jumanakatak amtasiñ urüniwa, Tatitur jach'añchasaw uruyapxäta. Wiñay kamachïkaspas ukham wawanakamana, wawanakapaw amtasipxäta.

15Paqallqu uruw jan levaduran t'ant'a manq'apxäta; ukhamasti, nayrïr urut qalltasin janiw utanakaman levadurax utjañapäkiti. Uka paqallqu urunakan levaduran t'ant'a manq'irixa, Israelankirinak taypit apanukutäniwa.

16Ukatsti nayrïr urumpi, paqallqüri urumpix mä qullan tantachasïwi lurapxäta. Uka urunakansti janiw kunsa lurapxätati, jan ukasti kunatix manq'añatak phayañäki ukak lurapxäta.

17Jan levaduran t'ant'a manq'añ uruyäwi amtasipxapunïtawa, uka uruw nayax jumanakar Egipto markat tam tama irpsunipxsma. Uka laykuw jumanakasa, wawanakaman wawanakapas aka kamachi wiñay amtapxäta.

18Jumanakax nayrïr phaxsina tunka pusin uru jayp'ut qalltasin jan levaduran t'ant'a manq'apxäta, pä tunka mayan uru jayp'ukama.

19Uka paqallqu urunsti janiw utanakaman levadurax utjañapäkiti. Ukampis khititix levaduran t'ant'a manq'kani ukaxa, Israelankirinak taypit apanukutäniwa, jaya markankirïskpasa, jan ukax israelitäskpasa.

20Ukhamasti janipuniw kunsa levaduran puqtat manq'apxätati. Utjäwinakamanxa, jan levaduran t'ant'a manq'asipxäta’ ” sasa.

21Moisesasti, israelitanakan taqpach jilïrinakaparuw jawsayanïna, jupanakarusti sänwa: “Utamankirinakatak mä urqu oveja, jan ukax mä cabrito katupxam, uka uywarusti Pascua uruyañatakiw jiwayapxäta.

22Mä lamanaruw wila katuqapxäta, ukatsti hisopo sat alinak picht'asin ukampiw wilar chilltas uta punku marcor jawsupxäta. Janiw maynis qhipürkam utat mistupxätati.

23Tatitux egipcionakar jiwarayir sarakipkani ukapachasti, uta punkun wila uñjasinxa, uka uta sarakipawayxakiniwa, Tatitux janiw jumanakat maynin jiwañapsa munkaniti.

24Aka luräwi, jumanakasa, wawanakaman wawanakapas imapxäta, wiñay kamachïkaspas ukhama.

25Tatitux arsutaparjam churapkätam uka uraqir mantapkät ukapachasti, sapa maras aka uru uruyañ amtasipxapunïtawa.

26Ukatsti wawanakamatix jiskt'apxätam: ‘¿Kun sañarak muni aka uruyäwisti?’ sasaxa,

27jumanakasti sapxätawa: ‘Aka uywax Tatitusar jach'añchas luqtata Pascua wilañchawa. Kunapachatix jupax Egipto uraqpachan thiyat thiya sarkäna egipcionakan jilïr tayna yuqall wawanakapar jiwarayasaxa, jiwasan utanakasxa janiw kamachkänsa, sarakipawayakïnwa, ukhamat wila masinakasar jiwañat qhispiyäna’ ” sasa.

Moisesax parlañ tukuykän ukapachasti, israelitanakax taqpachaniw killt'asis Tatitur yupaychapxäna,

28ukatsti kuntix Tatitux Moisesampiru, Aaronampir siskatayna ukhamarjamaw lurapxäna.

Jilïr tayna yuqall wawanakan jiwaratapa

29Chika arumasti Tatitux taqpach egipcionakan jilïr wawanakap jiwarayäna, reyi qunuñan qunt'ata faraonan jilïr tayna yuqall wawaparusa, carcelankirinakan jilïr yuqall wawanakaparusa, uywanakan nayrïr qallunakaparusa.

30Uka arumasti faraonampi, yanapirinakapampi, taqpach egipcio jaqinakampix sartasin Egipto uraqpachan llakisiñat wararipxäna. Sapa utan jiwatax utjarakïna.

31Uka arumpachaw faraonax Moisesampiru, Aaronampir jawsayanisax jupanakar säna:

—¡Akat sarapxam! ¡Jumanakasa, israelitanakas markaxat jayar sarapxam! Mayipkista ukhamarjam Tatitumar yupaychir sarapxam.

32¡Ovejanakamsa, vacanakamsa mayitanakamarjam anakisipxam, jank'ak akat sarapxam! Nayatak Tatitur mayipxarakim —sasa.

33Egipcio jaqinakasti, uraqipat israelitanakan jank'ak sarxañapatakix wal jariyapxäna, jupanakax sapxänwa: “Taqiniw jiwarxañäni” sasa.

34Israelitanakasti t'ant'a masanak janïr puqtatpach apxarusiwayapxäna, masa chapuñ yänakamppach isinakapar llawuntasin q'ipxarusiwayxapxäna.

35Ukhamarusa, israelitanakax Moisesan iwxataparjamaw egipcionakat qurita, qullqita lurat yänakampi, isinakampi mayipxäna.

36Tatitusti egipcionakarux suma chuyman tukuyäna, kuntix israelitanakax maykän ukanak churañapataki. Ukhamat israelitanakax egipcionakar jan kunan jaytawayapxäna.Israelitanakan Egipto markat mistsuwayxatapa

37Israelitanakax kayukiw Ramsés sat markata, Sucot sat markakam sarapxäna. Jupanakasti niya suxta patak waranqa chachanakänwa, warminakampiru, wawanakampir jan jakhusa.

38Mistusasti walja ovejanakampi, vacanakamp anakisxapxäna, jupanakamp chikasti yaqha markankir jaqinakax misturakïnwa.

39Ukatsti egipcionakan jupanakar jank'ak markapat jaqunukutap laykusti, janiw kuna manq'añsa wakichasipkataynati, ukat jupanakax Egiptot apsunita jan levaduran masanakampi t'ant'anak lurasipxäna.

40Israelitanakax Egipto markan pusi patak kimsa tunkan maraw jakapxatayna,

41ukatsti kunürutix pusi patak kimsa tunkan marax phuqhaskäna uka uruw Tatitun taqpach ejercitopax Egipto uraqit mistsuwayxäna.

42Uka aruman Tatitux israelitanakar Egipto uraqit irpsxañataki uñch'ukiyaskäna. Uka arumasti Tatitutaki satawa, ukat uka arumanxa israelitanakaxa, wawanakapan wawanakapas arum paqari suyapxañaparaki, Tatitun jupanak layku ukham luratap amtasisa.

Pascua uruyañxat kamachinaka

43Tatitusti Moisesampiru, Aaronampiruw säna:

“Pascua uruyañatak aka kamachinak phuqhapxäta: Janiw khiti jaya markankir jaqis wilañcha luqtat uywa manq'añapäkiti.

44Ukampis qullqimpi alat uywat jaqikiw ukxa manq'añapa, jupatix circuncisión katuqxchi ukapacha.

45Janiw jaya markankirisa, qullqit irnaqir jaqisa uka luqtat uywa manq'añapäkiti,

46uksti mä utanak manq'apxäta. Uka wilañchat uywan mä jisk'a aychapsa janiw utat apsupxätati, janirakiw ch'akhanakapsa p'akinuqapxätati.

47Taqpach israelitanakaw ukham lurapxäta.

48Ukampisa, mayni yaqha markankiritix jumanak taypin jakchi, ukat Tatitur jach'añchas Pascua uruyañ munchi ukapachaxa, wakisiw utapankirinakan taqpach chachanaka circuncisión katuqasin uruyañapa, markasan yurirïkaspas ukhamäniwa. Circuncisión jan katuqirinakasti janiw uka uywa manq'añapäkiti.

49Aka kamachisti taqitakiwa, markas taypin yuripki ukanakataki, ukhamarak jumanak taypin jakapki uka yaqha markankir jaqinakataki” sasa.

50Israelitanakasti kunjämtix Tatitux Moisesampiru, Aaronampiru siskatayna ukhamarjamaw taqi lurapxäna.

51Ukürpachaw Tatitux Egipto uraqit israelitanakarux mä ejercitor uñtat irpsunïna.