ÉXODO 6 - Qullan Arunaka DC

1Tatitusti Moisesarux sarakïnwa:

—Jichhaw uñjäta kuntix faraonar lurkä ukxa. Nayax ch'amax uñacht'aykä ukkhakiw markapat sarxapxañamatak antutapxätam, ukampis janiw saririkti antutapkätamxa, jan ukasti jupa pachpaw markapat sarxapxañamatak sapxätam.

Diosax wasitat Moisesar jawsi

2Diosax Moisesar akham säna:

—Nayätwa TATITUXA.

3Nayaw Abrahamaru, Isaacaru, Jacobur uñstta, taqi ch'aman Dios sat sutimpi. Ukampis nayax janiw TATITU sat chiqpach sutixampi uñt'ayaskti.

4Ukhamarus jupanakamp mä arust'äwi lurta, jupanakar Canaán uraqi churañatakiw arsurakta, kawkhantix jupanakax nayra pachan jayankir jaqinakjam jakapkäna uka uraqi.

5Ukampis israelitanakar arnaqasir ist'asina, egipcionakan sinti t'aqhisiyat irnaqatanakap uñjasinxa, mä suma arust'äwir mantataxat amtasta.

6Ukhamasti saram, israelitanakar akham sarakim: “Naya Tatituw t'aqhisitanakamat qhispiyapxäma, sinti ch'ama lurañanak jumanakar egipcionakan lurayatapatsa qhispiyapxarakïma. Jach'a ch'amax uñacht'ayä, chiqa aski kankañaxampiw qhispiyapxäma.

7Jumanakarusti nayan markaxaruw tukuyapxäma, nayaw jumanakan Diosamäyä. Ukhamat jumanakax yatipxäta nayan jumanakar wali ch'ama lurañanakamp egipcionakax t'aqhisiyapktam ukanakat qhispiyir Tatit Diosamätaxa.

8Jumanakarusti kawkha uraqtix Abrahamaru, Isaacaru, Jacobur churañ arskäyät ukaruw irpapxäma, ukatsti Naya Tatituw jumanakar uka uraqi churxapxäma” sasa.

9Moisesasti kuntix Tatitux siskatayna ukanak israelitanakar yatiyarakïna, ukampis jupanakax janiw Moisesar ist'apkänti, sinti ch'ama lurañanakamp t'aqhisiyatax wali mayjt'atäpxänwa.

10Ukat Tatitux Moisesar säna:

11—Faraonar parlir saram, israelitanakar Egipto uraqit mistuyxañapataki —sasa.

12Moisesasti ukxaruw Tatitur sarakïna:

—Janiw israelitanakas ist'apkituti, ¿kunjämarak faraonasti nayar ist'itanisti? Nayax janiw sum parlirïkti —sasa.

13Ukatsti Tatitux Moisesampi, Aaronampi parlasin säna, jupanakax faraonaru, israelitanakar sapxañapataki, Egipto markat israelitanakar apsunipxañapataki.

Aaronampin, Moisesampin nayra awkinakapa

14Israelita wila masinakan jilïrinakapax akanakänwa:

Israelan Rubén jilïr wawapan wawanakapa: Hanoc, Falú, Hesrón, Carmí, jupanakasti Rubenan ayllupankirïpxänwa.

15Simeonan ayllupankir wawanakapa: Jemuel, Jamín, Óhad, Jaquín, Sóhar, Saúl, jupasti Canaán markankir warmin wawapänwa.

16Leví ayllunkir wawanakapa: Guersón, Quehat, Merarí. Leví chachax patak kimsa tunka paqallqun maraw jakäna.

17Guersonan wawanakapasti: Libní, Simí.

18Quehat chachan wawanakapasti: Amram, Ishar, Hebrón, Uziel, ukanakawa. Quehat chachax patak kimsa tunka kimsan maraw jakäna.

19Merarí chachan wawanakapasti: Mahli, Musí, jupanakaw Leví chachan wila masinakapaxa, jach'at jisk'akama.

20Amram sat chachax Jocabed sat tiapampiw jaqichasïna, wawanakapasti Aarón, Moisés jupanakawa. Amramasti patak kimsa tunka paqallqun maraw jakäna.

21Ishar chachan wawanakapasti: Coré, Néfeg, Zicrí, jupanakawa.

22Uziel chachan wawanakapasti: Misael, Elsafán, Sitrí, jupanakawa.

23Aaronasti, Aminadab chachan Eliseba phuchhapampiw jaqichasïna, Naasón chachan kullakapa. Aaronan wawanakapasti: Nadab, Abihú, Itamar, Eleazar, jupanakawa.

24Coré chachan wawanakapasti: Asir, Elcaná, Abiasaf, jupanakawa. Coreítas sat wila masinkirïpxiwa.

25Aaronan Eleazar yuqapasti, Futiel sat chachan maynïr phuchhapampiw jaqichasïna, jupanakan wawapasti Finees satänwa. Jupanakasti levitanakat saraqirinakan jilïrinakapawa, wila masitkama.

26Jupanakaw Aaronampi, Moisesampixa, jupanakaruw Tatitux jawsäna Egipto markat israelitanakar mä jach'a ejercitor uñtat irpsunipxañapataki.

27Egiptonkir faraón reyimp parlapkän israelitanakar uka markat irpsxañataki, uka pachpa Aaronampi, Moisesampiwa.

Diosax Moisesampiru, Aaronampiruw jawsi

28Tatitux Egipto markan Moisesamp parlkän ukürux,

29jupar sänwa:

—Nayätwa Tatituxa. Jichhasti taqi kuntix nayax siskäma ukanak Egiptonkir faraón reyir yatiyanim —sasa.

30Moisesasti sarakïnwa:

—Tatay, nayax janiw sum parlirïkti, ukhamasti, ¿kunjämarak faraonasti nayar ist'itaspasti? —sasa.