NÚMEROS 25 - Qullan Arunaka DC

Israelitanakax Baal-peor diosaruw yupaychapxi

1Israelitanakax Sitim chiqan utjantasipkän ukapachasti, chachanakax moabita warminakampiw wachuq jucha lurañ qalltapxäna,

2uka warminakasti diosanakapar wilañchanak luqtäwiruw jupanakarux jawsapxäna. Israelitanakax uka manq'äwinakapat manq'apxäna, moabitanakan diosanakapatakiw killt'asipxäna,

3ukhamat jupanakax Baal-peor sat diosar yupaychañatak arkapxäna. Ukat Tatitux Israel markatak q'apisïna,

4Moisesarusti sarakïnwa:

—Markan taqpach jilïrinakapar tantachthapim, ukatsti nayraqataxan urpach jiwarayam. Ukhamat q'apisiñaxax Israel markatak t'akurani —sasa.

5Ukspachaw Moisesax Israelan taripirinakap thiya saräna, jupanakarusti sänwa:

—Sapa mayniw jumanakax ayllunakamankirinakar, khitinakatix Baal-peor diosatak killt'asipki uka chachanakar jiwarayapxañama —sasa.

Ukatsti ukhampun lurapxäna.

6Ukampis Moisesampi israelitanakampix qullan utjäwir mantañan jacht'asisa jikxatasipkän ukchañkamasti, mä israelita jaqix chujllaparuw mä madianita warmir jupanakan uñjkat irpantasiskäna.

7Uk uñjasinsti, Finees chachax, Eleazaran yuqapa, Aarón sacerdoten allchhipax, maysar jithiqtawayasaw, mä lanza aptasin,

8uka israelitan chhujllapar saräna, ukat lanzapamp uka israelit jaqimpiru, madianita warmimpirux purakat jununtasin jiwayäna. Ukhamat Tatitun mutuyäwipax Israel markatak tukusïna.

9Ukkhakamasti jiwaratanakax pä tunka pusin waranqa jaqinakänwa.

10Ukatsti Tatitux Moisesar sänwa:

11—Finees chachaw israelitanakatak q'apisitax apaqitu, jupax nayan aytat kankañax waqaychi, ukat nayax israelitanakar q'apisiñaxan atipat jan taqpach jiwaraykti.

12Jichhasti juparux samaya, nayax jupamp sumankañ arust'äwi lurta,

13ukat jupampiru, wawanakapampirux sacerdote luräwi wiñayatak katuyta, nayan aytat kankañax waqaychatap layku, ukhamarak israelitanakatak jucha luratat pampachäwi jikxatatap layku —sasa.

14Khiti israelita jaqitix madianita warmimpi chik jiwayat uñjaskän jupax Zimrí sutinïnwa, jupasti Salú chachan yuqapänwa, Simeón ayllunkir wila masi taman jilïriparakïnwa.

15Madianita warmisti Cozbí satänwa, jupasti Sur chachan phuchhapänwa, Madián markankir aytat wila masipan jilïripa.

16Uka qhipatsti, Tatitux Moisesar sänwa:

17—Madianita jaqinakar nuwantapxam, jupanakar atipjapxam,

18kunjämtix jupanakax jumanakar nuwantapktam k'ari luräwinakamp Baal-peor diosar yupaychayasa, ukhamarak madianita jilïrin Cozbí phuchhapan lanzamp jununtas jiwayatätapatsa, ukasti Baal-peor diosar yupaychapxatam layku mutuyäwi apayankta ukapachaw ukham lurasïna.

Israelitanakat mä machaq jakthapïwi utjatapa

19Uka jaqinak jiwarat qhipatsti,