1 SAMUEL 14 - Qullan Arunaka DC

Jonatán chachan filisteonakar atipjatapa

1Mä urux, Saúl reyin Jonatán yuqapax yanapiriparuw säna:

—Jutam, jawir makhatañäni, ukatsti jawir khurkatankki uka filisteo soldadonakar nuwantañäni —sasa.

Ukampis Jonatanax janiw awkipar uk yatiykänti,

2awkipasti mä qullu thiyan granado sat quqa k'uchunkaskänwa, trigo jawq'asipkän uka chiqana, suxta patak chachanakarakiw jupamp chikt'atäskäna.

3Efod isi apiristi Ahitub jaqin Ahías yuqapänwa, Icabod jaqin sobrinopa, ukasti Finees jaqin yuqapänwa, Elí chachan allchhiparaki, khititix Siló chiqan Tatitun sacerdotepäkän uka.

Jaqinakasti Jonatanan sarxatap janiw yatipkataynati.

4Ukchañkamasti jupax kawkhankkäntix filisteo soldadonakax ukar puriñatakiw ch'amachasiskäna. Uka chiqa sarañasti pä jach'a qarqa taypinkänwa, Bosés, Sene satanaka,

5mayax amsta tuqina, Micmás uñkatasina; mayasti aynach tuqinaraki Guibeá uñkatasina.

6Jonatanasti yanapiriparuw säna:

—Jina, mäpit jawir khurkatar makhatañäni, kawkhankkitix Tatitur jan uñt'ir soldadonakax ukkharu. Inampis Tatitux mä kunsa jiwasatak luraskaspa, jupatakix janiw ch'amäkiti walja jaqimpi, jan ukax juk'a jaqimpi atipt'ayañaxa —sasa.

Yanapiripax sänwa:

7—Taqi kuntix amtkta ukanak luraskakim, nayasti uka amtäwinakamar yanapt'añatakix jank'akïsktwa —sasa.

8Ukatsti Jonatanax sarakïnwa:

—Akaxay jichhax khurkatar makhatañäni, kawkhankkitix uka chachanakax ukkharu, ukatsti jupanakampi uñjayasirakiñäni.

9Jupanakatix jiwasaru sistani: “Nanakan jutañaxkam suyt'apxita” sasaxa, ukkharukiw qhiparañäni, janiw jupanakan ukarux makhatkañäniti.

10Ukampisa jupanakatix: “Makhatanipxam” sistanixa, ukkhakiw makhatañäni, ukasti jiwasatakix mä chimpüniwa Tatitun jiwasar atipjäwi churañapataki —sasa.

11Ukhamaw jupanakax filisteo soldadonakampix panpachani uñjayasipxäna. Soldadonakasti uñjasax sapxänwa: “Uñtapxam, israelitanakax kawkïri putunakarutix imantasipkäna ukanakat misturanxapxiwa” sasa.

12Ukat ukspachaw Jonatanampiru yanapiripampirux art'anipxäna:

—¡Makhatanipxam, may jumanakar yatiyapxäma! —sasa.

Ukatsti Jonatanax yanapiriparux sänwa:

—Sarañäni, Tatituw jupanakarux israelitanakan amparanakapar katuyani —sasa.

13Jonatanasti kumpukamakiw makhatawayäna, yanapiripasti qhipapat arkäna. Jonatanax kawkïr filisteonakarutix qurumt'ayankäna ukanakarux yanapiripaw jiwarayäna.

14Aka nayrïri nuwasïwinsti, Jonatanampi yanapiripampix mä juk'a pachanak pä tunka chachanak jiwarayapxäna.

15Ukatsti campamentonkirinakasa, markankirinakasa, nuwasir soldado tamanakas wal axsarayasipxäna. Ukhamarus uraq khathatiw sartarakïna, ukatsti jan walt'añaw utjäna.

16Saúl reyin uñch'ukiri soldadonakapasti, Benjamín uraqin Guibeá chiqatpach filisteonakarux uksar aksar chhukhunaqaskir uñjapxäna.

17Ukatsti Saúl reyix jupamp chikäki uka ejercitorux sarakïnwa:

—Tumpthapisipxam, khitinakas jiwasan soldadonakasat chhaqhata uk yatiñataki —sasa.

Tumpthapitatsti, Jonatanampi, yanapiripampiw chhaqhatäpxäna.

18Uka urusti Tatitun efod sat isipax israelitanak taypinkaskänwa, ukat Saúl reyix Ahías profetarux säna:

—Tatitun efod sat isip akar aptanim —sasa.

19Saúl reyisti sacerdotempi parlañkamax filisteonak taypin juk'ampi jan walt'añanakaw sartäna. Ukat Saúl reyix sacerdoterux sarakïna:

—Jan apankamti —sasa.

20Ukspachaw Saúl reyix taqpach soldadonakapampi tantacht'asisin filisteonakampi nuwasiñ qalltapxäna. Filisteonakasti ukham jan walt'añan jikxatasisax jupanakkamakiw jiwarayasipxäna.

21Ukhamarusa kawkïri hebreo jaqinakatix nayratpach filisteonakampïkän ukanakasti, Saúl reyimpi, Jonatanampïkän uka israelitanaruw jaqkatxapxäna.

22Efraín qullunakan imantasitäpkän uka israelitanakasti, filisteonakan chhuktxatap yatisinxa, jupanakar tukjañatakiw arktapxäna.

23Nuwasiñasti Bet-avén siski ukkhakamaw purïna, uka urusti Tatitux Israel markarux qhispiyarakïnwa.

Saúl reyin juramento luratapa

24Ukampis uka urux israelita jaqinakax wali qarjtatäpxänwa, janirakiw khitis kunsa manq'kataynati, Saúl reyiw markarux juramento lurayäna, akham sasa: “Khititix janïr jayp'untkipan mä kunsa manq'kani, janïr nayan uñisirinakaxar phuqsuskipana ukaxa, jiwayatäpan” sasa.

25Ukatsti ejercitox mä ch'umi chiqaruw purïna, kawkhantix misk'ix uraqin utjkatayna ukkharu.

26Kunapachatix ch'umir mantapkän ukkhasti, misk'ix umjamaw jaläna; ukampis janiw khitis mallt'känti juramento lurapxatap layku.

27Ukampis Jonatanax, kuntix awkipax juramento tuqi ejercitor siskatayna ukxa janiw ist'kataynati, ukat amparapankän uka thujrumpiw misk'i apsusin mallt'äna, ukampix suma ch'amaniw tukurakïna.

28Ukat mayni israelita soldadox jupar säna:

—Awkimax juramentompiw ejercitorux wayt'i, ‘khititix mä kunsa manq'kani ukax jiwayatäniw’ sasa. Ukat jaqinakax jichhax wali qarjtatäpxi —sasa.

29Jonatanasti sarakïnwa:

—Awkixax jan wal luri aka markaruxa. Uñjita, nayax uka mä juk'a misk'i mallt'asax wali ch'amaniw tukxta,

30jichhürux ukatsa juk'ampiw jaqinakax wali ch'aman tukusapäna, uñisirinakasat aparanktan uka manq'anak manq'asapän ukaxa. ¡Filisteonakaru atipt'añax wali muspharkañäsapänwa! —sasa.

31Uka urusti israelitanakax filisteonakar atipjapxänwa, Micmás chiqat qalltasina Aialón chiqar puriñkama. Ukampis israelitanakan soldadonakapax wali qarjatäpxänwa,

32ukhamasti kuntix ejercitox uñisirinakapat aparkatayna ukaruw jalxatapxäna; ukat ovejanaka, vacanaka, vaca qallunaka katusin kharirapxäna, aychapsti wilamppach manq'antapxäna.

33Yaqhipanakasti Saúl reyir yatiyiriw sarapxäna:

—Jaqinakax Tatitu nayraqatan wilamppach aycha manq'antasax juch lurasipki —sasa.

Ukat Saúl reyix sarakïna:

—¡Jumanakax aljantir ch'uxña jaqinakäpxtawa! Mä jach'a qala qurumiyas aka chiqkam apanirapipxita.

34Ukhamarus jaqinakarux sapxarakim, sapa mayni akar apanpan: urqu vacapa, jan ukax ovejapsa, ukat jumanakax kharirasin manq'apxañamataki, janirak Tatitu nayraqatan wilamppach aychanak manq'asa juch lurapxamti —sasa.

Ukatsti uka arumpachaw sapaqat maynix urqu vacap apäna, ukatsti ukan kharirapxäna.

35Saúl reyisti Tatitutakix mä altar luräna, uka altarasti Tatitur yupaychañatak Saúl reyin sayt'ayat nayrïr altarawa.

36Ukatsti Saúl reyix sarakïnwa:

—Jichha arumax filisteonakar katuntir sarapxañäni, ukatsti qhanjtaniñapkam yänakap apsunipxañäni, taqinirurak jiwarayanipxañäni —sasa.

Taqiniw arsupxarakïna:

—Kunatix amuyatamat walïki ukanak luraskakim —sasa.

Ukampisa sacerdotex sarakïnwa:

—Janïr kunäkipan Tatitur jiskt'añäni —sasa.

37Ukat Saúl reyix Tatitur jiskt'äna:

—¿Filisteonakar arktañaxax wakisiti? ¿Jupanakarusti israelitanakan amparapar katuyätati? —sasa.

Ukampis Tatitux janiw uka urux jupar jayskänti.

38Ukat Saúl reyix sarakïna:

—Jichhax ejerciton taqi jilïrinakapa jak'achasinipxam; ukatsti khitis jichhürux uka juch luri uk yatxatapxam.

39¡Israel markar qhispiyir Tatitun sutipxaruw juramentompi arsta, jucha luririx Jonatán yuqaxäskpasa, jupax jiwayatäniwa! —sasa.

Soldadonak taypitsti janiw khitis arskänti.

40Ukat Saúl reyix taqi israelitanakar sarakïna:

—Jumanakax aksaru sayt'asipxam, maysatsti nayampi Jonatán yuqaxampiw sayt'anipxä —sasa.

Soldadonakax sapxarakïnwa:

—Kunatix askïki uk luraskakim —sasa.

41Ukat Saúl reyix art'arakïna:

—Tatay, Israelan Diosapa, ¿kunatarak jichhürusti luqtirimar jan kuns arsktasti? Nayatix juchanïstxa, jan ukax Jonatán yuqaxas juchanïchixa, suerte jaqtatax Urim qalaw mistuni; ukampis israelita jaqinakatix juchanïchixa, suerte jaqtatasti Tumim qalarakiw mistuni —sasa.

Suertesti Saúl reyimpiru Jonatán yuqapampiruw mistüna, ukatsti markax jan juchaniw uñjasxäna.

42Ukat jank'akiw Saúl reyix sarakïna:

—Jichhax Jonatán yuqaxampita nayampit suerte jaqtapxam —sasa.

Suertesti Jonatán yuqapxaruw mistüna,

43ukat Saúl reyix Jonatanar säna:

—Jichhax kuntix lurkta uk qhanañchita —sasa.

Jonatanasti akham arsusirakïna:

—Chiqpachansa, nayaw mä juk'a misk'i aka thujrumpi apsusin mallt'ta. Ukampis akäsktwa, jiwañatakis jank'akirakïtwa —sasa.

44Saúl reyix jach'at arsüna:

—¡Jonatán, janitix jumax jiwkäta ukkhaxa, Tatitux taqi ch'amapampi nayar jiwayitpan! —sasa.

45Markasti Saúl reyirux sarakïnwa:

—¡Janiw wakiskiti Jonatanan jiwañapaxa, jupaw Israel markarux mä jach'a atipjäwi churistu! ¡Janiw jiwkaspati! ¡Tatit layku, janiw mä ñik'utapas uraqirux jalaqtkaniti! Kuntix jichhüru lurki uksti Tatitun yanapapampiw luraraki —sasa.

Ukhamat markax Jonatanarux jiwañat qhispiyäna.

46Saúl reyisti filisteo jaqinakar arktañ suyt'xänwa, filisteonakasti uraqiparkamaw kuttawayxapxäna.

47Ukhamaw Saúl reyix Israel marka apnaqäna, ukatsti taqi chiqan uñisirinakapampix nuwasïna, uñisirinakapasti: Moab, Amón, Edom, Sobá markan reyipa, filisteonaka ukanakänwa. Kawkirutix sarkäna ukkhansti atipjakipunïnwa.

48Ukatsti jupax mä jach'a ejército tantacht'äna ukat amalecitanakarux atipjarakïna. Ukhamat israelitanakarux uka lunthata lluch'susirinakat qhispiyäna.

49Saúl reyin yuqanakapasti: Jonatán, Isví, Malquisúa ukanakänwa. Pani phuchhapasti, jilïrix Merab satänwa, sullkasti Mical sataraki.

50Saúl reyin warmipasti Ahinóam sat Ahimaas jaqin phuchhapänwa. Ejercitopan jilïripasti Abner satänwa, Ner jaqin yuqapa, Saúl reyin tioparaki.

51Quis chachax Saúl reyin awkipänwa, Ner chachasti Abneran awkiparaki, jupanakasti Abiel chachan yuqanakapänwa.

52Saúl reyin urunakapanxa, filisteonakampi nuwasiñax wali ch'amapunïnwa; ukat Saúl reyix ejercitopatak ch'amani jan axsarir chachanak katuqäna.