JOB 9 - Qullan Arunaka DC

Uk ist'asasti Job chachax arsusiskakïnwa:Job

1-2Nayax ukhamätap suma yatta;

¿kamisarak jaqisti Tatit nayraqatan

jan juchanjam arsusispasti?

3Maynitix jupamp ch'axwañ munaspaxa,

waranqa jiskt'anakarux janiw maysa arusxatkaspati.

4Diosan yatiñ kankañapax jach'awa,

ch'aman kankañapas jach'arakiwa;

¿khitirak Tatit nayraqatan sayt'asispa,

jupar atipjarakispasti?

5Diosax phiñasiñapan qullunak unxtayi;

pampa tukuyaraki, janiw khitis ukxa amuykiti.

6Jupaw uraqsa unxtayi,

uraqin utt'äwinakapsa khathatiyaraki.

7Jupaw intirus jan mistuniñapataki mayi;

warawaranakan jan qhanañapsa mayiraki.

8Jupa sapakiw alaxpach janatati,

jach'a quta mathapinaksa t'akuyaraki.

9Jupaw jach'a qutu warawaranak luri:

Osa Mayor, Orión, Pléyades sat warawaranaka,

aynach tuqinkki uka qutu warawaranaksa.

10¡Jupaw walja jach'a muspharkañanak luri,

uka luräwinakapsti janiw khitis amuyt'kaspati!

11Tatitutix naya jak'a sarakipawayaspaxa,

janiw jupar uñjkiristti,

sarakipaskaspawa, nayasti janiw amuykiristti.

12Jupatix mä kunsa katuntasispa ukasti,

¿khitirak juparusti “Jan uk luramti” saspasti?

¿Khitirak juparusti luratanakapat wayt'aspasti?

13Tatitun q'apisitapax jan t'akurkayawa;

jach'añchasirinakas Diosan nayraqatapan jisk'achjataw uñjasipxi.

14¿Kunjämarak nayasti Diosar arusxatiriststi?

15Jan juchanïkirista ukasa, janiw arusxatkiristti;

jupax nayan taripirixawa,

khuyapt'ayasiñapak mayirista.

16Nayatix jupar jawsirista, jupasti uñstanirakispa ukaxa,

janjaw arunakaxarus ist'kaspati.

17Mä jach'a thayampiw nayar t'aqhisiyitaspa,

chhuxrinakaxsa jan kuna yänikiw jilxattayitaspa;

18llakisiñampikiw nayar phuqhantitaspa,

janirakiw samsuykitaspasa.

19¿Nayax ch'amampit sayt'asiristxa?

Jupax jila ch'amaniwa.

¿Taripäwirut jupar jawsiristxa?

¿Khitirak jupar uñstayanispasti?

20Nayax qawqha aski chiqa jaqïkirista ukasa,

jupax nayar juchanitakpun mistuyaskitaspa.

21Nayax aski jaqïtwa, ukasti janiw nayatakix kunäkxisa;

jakañampis qaritäxtwa.

22Taqi kunas pachpakiwa.

Jichhasti ak lup'isirakta:

Diosax juchanirusa, jan juchanirusa pachpak t'unji.

23Mä chijisa akatjamat jan juchan jaqirux jiwarayi,

Diosax jupanakan ayqutanakapat larusiwa.

24Uraqix ñanqha jaqinakan amparapar katuyatawa,

jupaw taripirinakan nayranakap ch'uqanti.

Janitix Diosäkchi ukasti, ¿khitirak uk luristi?

25Jakañ urunakaxax jalak jalarawayxi,

kusisiñ jan uñt'asakiw jalarawayxi.

26Qutan sarir barcor uñtataw jank'ak sarawayxi,

katjañatak jaltir pakar uñtataw jaltawayi.

27Nayatix llakinakax armasiñ munirista,

k'uchik uñnaqañ munirista,

28ukapachax ukataqi t'aqhisitaxax axsarayituwa,

Dios nayaraqatan jupatak juchanipunïtax yatiraktwa.

29Jupatix nayar juchanit uñt'chituxa,

janiw nayan jupampi ch'am chikañaxax wakiskiti.

30Nayax jabonampis amparanakax jariqasiskirista ukasa,

lejiampis qaqsusiskirista ukasa,

31Diosax ñiq'iruw nayar nukhuntitaspa,

isixas nayat axtasitaspawa.

32Janiw nayax Diosamp mä jaqi masimpjam irkataskiristti,

janirakiw panpachan taripäwir sarañäni siskiristsa.

33¡Nanak taypin mä taripirix utjakispa,

nanak panitak munañanïspa,

34Diosax t'aqhisiykitu uksa,

axsarañamp phuqhantkit uksa, suyt'ayxakispa!

35Ukapachasti nayax jan kuna axsarasaw arsusirista,

amuyataxat janjaw jupar kuna ñanqhsa lurkti.