SALMOS 83 - Qullan Arunaka DC

SALMO 83Diosan yanapap mayisiña 1 Asaf chachan q'uchupa.

1 1 (2) Tatay, janikiy amukïmti,

Diosaxay, unxtasikimaya.

2 2 (3) Uñtam, timasirinakamax uxupxiwa,

uñisirinakamasti jumaruw saykatapxtam.

3 3 (4) Markamatakiw jan walinak amtapxi,

juman arxatat jaqinakatakiw ñanqha amtapxi.

4 4 (5) Jupanakax nanakar t'unjiriw jutañ amtapxi,

markarux chhaqtayañ munapxi,

Israelan sutipan jan mayampi amtatäñapataki.

5 5 (6) Jumar jan walt'ayañatakiw arust'asipxi,

mä wawakiw akïr markanakax jumatak arusipxi:

6 6 (7) Edom, Ismael,

Moab, Agar ukanakan wawanakapa,

7 7 (8) Guebal, Amón, Amalec jaqinaka,

Tiro uraqin jakir filisteonaka,

8 8 (9) asirionakas jupanakampiw chikachasipxi,

Lot chachan wawanakaparus yanapt'apxiwa.

9 9 (10) Madián jaqinakarjam jupanakarux tukjam,

Sísara jaqirjam lurjam,

kunjämtix Quisón jawira jak'an

Jabín jaqirux lurjkta ukhama,

10 10 (11) kamisatix jupanakax Endor chiqawjan

t'unjat uñjasipkäna,

uraqitakis wanur tukupkän ukhama.

11 11 (12) Oreb, Zeeb uka jilïrinakarux tukjam;

Zébah, Zalmuná, uka jilïrinakarjam lurjam,

12 12 (13) jupanakax Diosan suma uraqinakap

katuntasiñ munapxäna.

13 13 (14) Diosaxay,

tutukan apat ch'aphirjam tukuyam,

thayan apat waña laphinakarjam tukuyam;

14 14 (15) kamisatix ninax ch'umir nakhantki ukhama,

kunjämtix nina lawranakax qullunak nakhantki ukhama,

15 15 (16) ¡t'aqhisiñanakampi jupanakar ukham arktam,

jach'a tutukanakamampi axsarayam!

16 16 (17) ¡Tatay, jupanakarux p'inqa tukuyam,

ukhamat juman Diosätam yatipxañapataki!

17 17 (18) Wiñayatak p'inqachat uñjasipxpan,

¡atipjat jiwarapxpan!

18 18 (19) ¡Juma sapak Diosätam yatipxpan,

aka uraqxar juma sapak

Alaxpachankirïtam yatipxarakpan!