SALMOS 80 - Qullan Arunaka DC

SALMO 80¡Tatay, uñtanipxakitaya! 1 Asaf chachan q'uchupa.

1 1 (2) Israel markan awatiripa,

ist'apxakitaya,

ovej tamar uñtat Josean markapar irpiripa,

jaysapxakitaya;

querubines sat taypin qunuñaman qunt'asiri,

ist'apxakitaya.

Efrainan ayllunakaparux uñtanikimaya,

2 2 (3) Benjamín, Manasés ukanakan ayllunakaparus

khuyapt'ayanikimaya.

¡Sartasikimaya, ch'amamamp qhispiyir jutakimaya!

3 3 (4) Diosay,

kunjamäpkäyättix ukhamaruy kutjtayxapxita,

¡khuyapayasiñampiy uñtanipxita,

nanakasti qhispiyataw uñjasipxä!

4 4 (5) Taqi ch'aman Dios Tatay,

markaman mayisitapampisti,

¿kunapachkamarak q'apisitakïskätasti?

5 5 (6) Manq'añ lantxa, jachañ churapxista,

uma lantsti, juk'amp jachañ utjayarapipxista.

6 6 (7) Marka jak'a masinakaxan

sawkasiñaparuw tukuyapxista,

timanakaxasti nanakat larusipxituwa.

7 7 (8) Taqi ch'aman Diosay,

kunjamäpkäyättix ukhamaruy kutjtayxapxita,

¡khuyapayasiñampiy uñtanipxita,

nanakasti qhispiyataw uñjasipxä!

8 8 (9) Jumaw Egiptot uva alir uñtat apsuntaxa,

Diosar jan uñt'ir jaqinak jaqunukusin ayrunttaxa.

9 9 (10) Jumaw uraq sum q'umachtaxa,

uva alisti, saphintänwa,

uraqpacharuw phuqhantarakïna.

10 10 (11) Ch'iwipax qullunak imt'äna,

layminakapasti jach'a quqanakaruw imt'arakïna.

11 11 (12) Layminakapax lamar qutkamaw purïna,

külltir alinakas Éufrates jawirkamaw purirakïna.

12 12 (13) ¿Kunatarak muyuntat pirqanakap tinkunukuytasti?

¿Kunatarak thakhi saririnakampi uva alinak jik'iraytasti?

13 13 (14) Ch'uminkir khuchhix q'alpun yapu tukji,

ch'umi manqhankir animalanakasti manq'supxarakiwa.

14 14 (15) Taqi ch'aman Diosay, kuttanxakimaya;

khuyapayasir nayramampi alaxpachat uñtanikimaya,

uva yapum tumpasir jutakimaya,

15 15 (16) amparamamp ayruntat uva alïchixaya,

juman ch'amaniptayat alirakïchixaya.

16 16 (17) Uka alir khuchhuririmpiru,

ninampi phichkatirimpirux q'apisiñamamp tukjam;

17 17 (18) juman ajllita chacharusti yanapt'akimaya,

jumaw uka chacharux ch'amañchtaxa,

18 18 (19) nanakasti janipuniw mayampis jumat saraqapkäti.

¡Jakañay churapxita, juma saparukiw yupaychapxäma!

19 19 (20) Taqi ch'aman Diosay,

kunjamäpkäyättix ukhamaruy kutjtayxapxita,

¡khuyapayasiñamampiy uñtanipxita,

nanakasti qhispiyataw uñjasipxä!