1 CRÓNICAS 22 - Qullan Arunaka DC

1Ukat Davidax säna: “Tatit Diosan utapasa, Israel markan nakt'ayañ altarapas akawjankaniwa” sasa.

Diosan utap lurañatak wakichäwinaka

2Uka qhipatsti, Davidax Israel markan jakapkäna uka yaqha markankirinakaruw tantachayäna, ukatsti Tatitun utap lurañatakix qalanak k'uthapxañapatakiw utt'ayäna.

3Ukhamarus punkunakan clavonakapataki, punku muyurinakatakix walja hierronak wakicht'äna; ukhamarak walja broncenakampi,

4jan jakt'kay cedro lawamp kuna, Sidón, Tiro chiqankir jaqinakaw uka cedro lawanak apanipxatayna.

5Davidasti akham amuyäna: “Salomón wawaxax jisk'äskiwa, Tatitutak luraskani uka utasti wali jach'äñapawa, taqi markanakansa wali uñt'ata, jiwakiraki; ukhamasti taqi kunsa suma wakicht'at jaytañaxaw wakisi” sasa.

Ukat Davidax janïr jiwkasax taqi kunsa wakicht'äna.

6Ukspachaw Davidax Salomón yuqapar jawsayäna, juparux Israelankir Tatit Diosapatakix mä uta lurayañapatakiw iwxt'äna,

7akham sasa: “Munat wawaxay, nayax Tatit Diosaxatakix mä uta lurañ amtäyäta.

8Ukampis Tatitux situwa: ‘Juman walja wila wartatama, walja nuwasiñanakan nuwasitam uñjta; ukat jumax janiw Tatitutak uta lurkätati.

9Ukampis jumax mä yuqall wawanïyätawa, jupasti sumankayir jaqïniwa; ukhamarus nayaw uñisirinakaparux taqi chiqansa sumankañan sarnaqayañapatakix tukt'ayä. Sutipax Salomón satäniwa. Israel markarux pachaparuw samaraña, sumankaña churäxa.

10Jupaw nayatakix mä uta lurarapitani. Jupax nayan wawaxäniwa, nayasti jupan awkipäyäwa, Israelan marka apnaqañapsti wiñayatakiw utt'ayarakï’ sasa.

11Jichhasti wawaxay, Tatitux jumampïpan Tatit Diosamatak uta lurañamataki, kunjämtix jupax juman lurañamataki arski ukhamaru.

12Tatitux ch'ikhi kankaña, yatiñ kankañ jumarux churpan, kunapachatix jumarux Israel markar apnaqañ katuykätam ukkhax Tatit Diosaman kamachip phuqhañamataki.

13Jumatakix taqi kunas askiruw mistuni, jumatix Tatitun kamachinakap Moisés tuqi Israel markar arsuwayki uk phuqhäta ukkhaxa. ¡Ch'amampi qamasampi sayt'asim; jan mayjt'asimti, janirak axsaramti!

14Uñjam, nayax wali ch'ama tukusaw Tatitun utap lurañatakix wakichta, kimsa waranqa kimsa patakani tonelada qurinaka, kimsa tunka kimsani waranqa tonelada qullqinaka, jan jakt'kaya broncenaka, jan tupt'kay hierronak wakt'ayta. Ukhamarakiw lawanaka, qalanak wakicharakta, jumaw ukxarux juk'amp yapt'arakïta.

15-16Ukhamarus jumatakix walja irnaqirinak ucharakta, qala k'uthirinaka, uta luririnaka, k'ullu khithurinaka, jan jakt'kay kunayman lurir jaqinaka, qurita, qullqita, bronceta, hierrot luririnaka. Ukhamasti, ¡luram, Tatituw jumarux yanapaskätam!” sasa.

17Ukspachaw Davidax Israelan taqi irpirinakaparux Salomonan yuqapar yanapapxañapatak säna:

18“Tatit Diosamaw jumanakampïskäna, jupaw taqi chiqan sumankañ churapxtam, juparakiw aka markankir jaqinakarux amparaxar katuyitu, jichhasti jupanakax Tatituru, markaparu katuyatawa.

19Ukhamasti, jichhax taqi chuyma Tatit Diosamar thaqtapxam. Tatit Diosan Qullan utap lurañatakix wakicht'asipxam, Tatitun Arust'äwi arcapa, qullan yänakap Diosan utap luratäkani ukar uchañataki” sasa.