ISAÍAS 19 - Qullan Arunaka DC

Egipto markatak profecía arunaka

1Egipto markataki profecía arunaka:

Tatitur uñtapxam,

Egiptoruw jutaski mä jaliri qinayar lat'xatata.

Jupa nayraqatansti Egipton diosanakapax khathatipxiwa,

Egiptonkir jaqinakasti wal axsarapxi.

2Tatitux siwa:

“Egiptonkir jaqinakarux

jupanakkam nuwasiyä,

masix mayni masipampi,

mä markasti yaqha markampi,

mä reinox yaqha reinompiw nuwasini.

3Amuyunakap mayjt'ayä,

amtatanakapsti t'unjarakïwa.

Ukapachaw jiskt'asipxani:

yaqha diosanakaru, layqanakaru,

jiwatanakan ajayunakaparu,

yatiri jaqinakaru.

4Ukampis nayax Egiptorux

mä qhuru reyiruw jupanakar apnaqañapat katuyä.”

Ukham siwa taqi ch'aman Tatituxa.

5Nilo jawiran umanakapax wañt'xaniwa,

q'ala wañaw tukuwayxani,

6uma sarañawjanakapas walipuniw thujsani.

Egipton jalir umanakasti juk'at juk'at wañt'awayxani,

uka jak'an utjir alinakas wañsuwayxaniwa;

7Nilo jawira lakan utjir alinakasa,

uka jak'an taqi yapunakasa,

jan mayampitakiw wañsuwayxani.

8Nilo jawiran chawlla katurinakasa,

llakisiñat wal jachapxani.

9Linot telanak luririnakas

mayjt'ataw jikxatasipxani;

sawurinakas llakisipxaniwa.

10Telanak sawurinakas

chuyma kawkst'ataw uñjasipxani,

taqi ukanak luririnakas

wali mayjt'ataw uñjasipxani.

11¡Soan markan jilïrinakapa,

jumanakax kunja luqhïpxtasa,

Egipton suma amuyt'ayirinakapa,

jumanakax luqhi amuyt'irinakäpxtawa!

¿Kunjämrak faraonarusti sapxtasti:

“Nanakax wali yatiñan jaqinakan wawanakapäpxtwa,

nayra reyinakan wawanakapäpxtwa” sasasti?

12Faraón, ¿kawkinkarak yatiñan jaqinakamasti,

kuntix taqi ch'amani Tatitux

Egiptotaki amtki ukanak jumar yatiyañatakisti?

13Soan markan jilïrinakapax wali luqhinakawa,

Menfis markan jilïrinakapas sallqjayasipxarakiwa,

suyunakan jilïrinakapasti

Egiptorux pantat thakhinjam irpapxi.

14Tatituw jupanakxaru pantjayir ajay churi;

jupanakasti Egiptorux pantat thakhinjam irpapxi,

taqi kuna luratanakapasa,

kunjämatix mä machat jaqix waq'aqjasi,

ukat uksar aksar aytilkaraki ukhama.

15P'iqïpasa, jan ukax wich'inkhäpasa,

palmeräpasa jan ukax suqusa alïpasa,

janipuniw Egiptotakix khitis kuns lurirjamäkaniti.

16Uka urunxa, kunapachatix taqi ch'aman Tatitux Egipcio jaqinakar mutuyañatak wakicht'askani ukkhaxa, jupanakax wal axsarayasipxani.

17Egipcio jaqinakax Judá markankirinakarux wal axsarapxani; taqi ch'aman Tatitun amtäwinakapax Egipto markatakix sinti axsarkayätapatxa, sutip amtasakiw khathatxapxani.

18Uka urunakasti Egipton phisqa markanakaw hebreo aru parlirinakax utjani, jupanakasti taqi ch'amani Tatitunkañwa chiqpach chuymamp arsupxani. Uka markanakat maynïristi Inti Marka satäniwa.

19Egiptonsti uka urunxa Tatitur luqtat mä altaraw utjani, qurpanakap jak'ansti Tatitutakix mä qalarakiw sayt'ayatäni.

20Uka qalasti Egipto markankir jaqinakan taqi ch'amani Tatitut amtasipxañapatak uskutäniwa. Kunapachatix jupanakar uñisirinakat arxatañapatak Tatitut yanapa mayisipkani ukkhaxa, Tatitux jupanakatakix mä qhispiyir khithanini, uka qhispiyiriw arxatani, qhispiyarakini.

21Tatitux egipcio jaqinakampiw uñt'ayasxani, jupanakasti Tatiturux katuqapxaniwa, sutipxarux wilañchanaka, luqtäwinak churasipxani. Tatiturusti arsüwinak arsupxani, uka arsutanakaparusti phuqhapxarakiniwa.

22Tatitux Egipto markarux chhuxrinchjaniwa, ukatsti qullxatt'arakiniwa. Jupanakasti Tatituruw makhatxapxani, Tatitusti jupanakat khuyapt'ayasisin qullxatarakini.

23Uka urunsti mä jach'a thakhiw Egiptot Asiria markakam utjani. Asirio jaqinakasti Egiptoruw sarapxani, Egipcio jaqinakasti Asiriaruw sarapxarakini, asiriankirinakasa, egiptonkirinakasa mayakiw Tatiturux yupaychapxani.

24Uka urunsti Israel markampi, Egipto markampi, Asiria markampix suman jakasxapxani, Israel markasti taqi markanakatakix mä suma markäxaniwa.

25Taqi ch'aman Tatitusti jupanakarux mä aski waxt'äwi churani akham sasa: “Nayaw aski waxt'äwinak Egipto markaxarux churta, Asiria markasti nayan uskutawa, Israelasti nayan ajllit markaxawa, jupanakarus nayaw uka kipka waxt'äwinak churarakta” sasa.