DANIEL 8 - Qullan Arunaka DC

Urqu ovejampita, cabritompit unañchäwi

1Belsasar reyin kimsïr mara marka apnaqäwipan naya, Danielax yaqha unañchäwi uñjarakta, nayra yaqha unañchäwinakat sipansa yaqha.

2Uka unañchäwinsti nayax Susa markanjamak jikxatasïyäta Elam sat suyuna, Ulai siski uka jawir thiyana.

3Nayax jayaruw uñtta, ukatsti uka jawir thiyat mä urqu oveja mistusinkir uñjta. Uka ovejax pä jach'a waxranïnwa, uka waxranakat mayax qhipakiw mistutayna, ukampis uka waxrax mayäkis ukat juk'amp jach'änwa.

4Uka urqu ovejasti waxranakapampiw muqinuqaskäna inti jalanta tuqiru, amsta tuqiru, aynach tuqiru, janiw kuna yaqha uywas uka ovejar saykatirix utjkänti, janirakiw kawkïri uywas muqisiñapat jaltirix utjkänti. Uka ovejasti kuntix munkän uk luräna, sapa kutiw juk'amp ch'amani tukxäna.

5Ukxat nayax lup'iskäyäta, ukhamaruw inti jalanta tuqit mä chivor jutaskir amuyta, walpun jalanïna, ukham jalanisasti kayunakapas janjamakiw uraqirux takt'känti. Uka chivosti pä nayrapa taypirux mä jach'a waxranïnwa,

6jawir thiyan uñjkäyäta uka pä waxrani oveja jak'ar purisinsti, uka chivox taqi ch'amapampiw muqintäna,

7ukatsti pä waxrap p'akiräna, uka ovejax chivomp muqintasiñatakix janiw ch'amanïkänti. Uka qhipatsti chivox muqintasin uraqiruw liwinuküna, ukaruw takxatarakïna, janiw khitis uka ovejat arxatirix utjkänti.

8Uka chivosti wali ch'amanipuniw tukxäna, ch'amapax juk'amp jilxatkxäna ukapachaw uka jach'a waxrapax p'akisxäna, uka p'akit waxra lantisti pusi waxraw jilsunïna, mayax amsta tuqir uñtata, mayasti aynach tuqir uñtata, mayasti inti jalanta tuqir uñtata, mayasti inti jalsu tuqir uñtataraki.

9Uka waxranakat mayïritxa, yaqha jisk'a waxraw misturakïna, uka waxrasti aynach tuqiruw sinti jilarakïna, ukhamaraki inti jalsu tuqiru, Suma Uraqi satäki uksa tuqiru.

10Sinti jilantatapatsti, alaxpach warawaranakkamaw purïna, uka warawaranaksti williranïnwa, takisirakïnwa,

11alaxpach warawaranakan jilïriparus “Nuwasiñäni” sarakïnwa; Tatitur sapür wilañchanak luqtañsa jark'xänwa, yupaychañ chiqawjanaksa takisirakïnwa.

12Kawkhantix nayrapachax wilañchanak luqtasiñäkän ukawjarusti ejercitopampi purintasin takisïna, chiqa kankañsa takisirakïnwa. Kuntix jupax munkäna ukanak luräna, taqi luräwinakapansa atipt'arakïnwa.

13Ukatsti ist'araktwa, mä angelaru yaqha ángel masipar jiskt'askiri: ‘¿Wilañchanak sapür luqtasiñ chiqawjan lurapki ukanakax, kunapachas tukusxani? ¿Kunapachkamarak Tatitusti qullan utapan juchachasiñanak utjayaskakinisti? ¿Kunapachkamarak iyawsirinakapar takisipxanisti?’ sasa.

14Maynïr angelasti sarakïnwa: ‘Pä waranqa kimsa patakan jayp'umpi, willjtampiw ukhamäni, uka qhipatsti qullan utax q'umachatäxaniwa’ sasa.

15Naya, Danielasti uka unañchäwi uñch'ukiskäyäta, qhanañchäwipsa yatiñ munaskarakïyäta, ukatsti akatjamat naya nayraqataxan mä jaqir uñtatax uñstarakïna,

16ukatsti mä jaqin arup ist'arakta, Ulai sat jawir tuqit parlasinkiri akham sasa: ‘Gabriel, uka jaqir aka unañchäwi tuqit qhanañcham’ sasa.

17“Ukat Gabriel angelax nayar jak'achasinitu. Nayasti wal axsarthapta, ajanuxsa uraqkamaw alt'asirakta, jupax akham situ: ‘Jaqin yuqapa, wal ist'am, uka unañchäwix akapachan tukusiñap yatiyaski’ sasa.

18“Ukhamaw jupax nayar parlxayaskitäna, nayasti jan ch'amaniw uraqir liwnuqtta; ukampis jupax nayar yanapt'asin sayt'ayitu,

19sarakituwa:

“ ‘Jichhasti kunatix Tatitun q'apisiñap tukuy urun luraskani uk qhanañchäma, uka unañchäwix tukuya pachanakat yatiyi.

20“ ‘Uka pä waxrani urqu oveja uñjktas ukax, Media uraqina, Persia uraqin reyinakaparuw uñtasi.

21Chivosti Grecia markan reyiparuw uñtasiraki, nayranakap taypin utjir jach'a waxrapasti nayrïr reyiruw uñtasi.

22Kawkïri pusi waxranakatix nayrïri waxran p'akisitapat mistunipkäna ukanakaxa, aka markatxa pusi yaqha markanakaw uñstani, sañ munaraki, ukampis janiw nayrïr reyin ch'amapanïkaniti.

23“ ‘Kunapachatix uka apnaqäwinakan munañapax tukusxani,

ukhamaraki taqi ñanqha lurañanakapas inampst'xarakini,

ukapachax mä sallqa, jan wali reyiw munañani utt'asirakini.

24Jupax wali ch'amanipunïniwa,

ukampis janiw jupan pachpa ch'amapampïkaniti;

taqi kunsa jan amuykañjam t'unjani,

kuntix lurkani ukansti, atipjapuniniwa.

Jach'a munañani jaqinakarus t'unjaniwa,

Tatitun markapankirinakarus waljaniruw t'unjarakini.

25Jupan sallqa kankañapampisti,

sallqa luratanakapax atipt'akipuniniwa.

Jach'a jach'arakiw tukuni,

jupar alkatat sarnaqirinakat walja jaqinakaruw ch'uxña luras jiwarayarakini.

Jilïrinakan jilïripampisa jikintasiskakiniwa,

ukampis uka jilïrin atipjataw uñjasini.

26“ ‘Jayp'unakampita, qhantatinakampit unañchäwi tuqitxa qhanañchxsmawa, ukasti chiqawa; jumax chuymaman ukanak imam, ukanakax walja urunak mäkipkani ukapachaw phuqhasiskani’ sasa.

27“Naya, Danielasti, ch'ama thayjtataw uñjasïyäta, walja urunakaw usuntat jikxatasirakïyäta. Uka qhipatsti wasitat marka apnaqäwin lurañanakap luraskakïyäta. Ukampis kuna unañchäwtix uñjkäyäta ukanakan jan amuyt'añjamätapatxa, wali llakitapuniw jikxatasïyäta.