1 1 (2) Diosax Judá uraqin uñt'atawa;
sutipax Israel markan wali aytatawa.
2 2 (3) Qullan utapax Jerusalenankiwa,
utjäwipax Sión qullunkiwa;
3 3 (4) ukawjan nuwasiñ yänak t'unjäna:
jark'aqasiñanaka, espadanaka,
mich'inak antutt'añanak tukjarakïna.
4 4 (5) ¡Diosay, jumax qhapaq kankañanïtawa!
¡Jach'a qullunakat sipan juk'amp jach'ätawa!
5 5 (6) Ch'aman jaqinakax jaqunukutäpxänwa;
nuwasir jaqinakax janiw nuwasirjamäpkänti;
¡jupanakax wiñayatakiw ikxapxäna!
6 6 (7) Jacobun Diosapa,
axsarayañampikiw carronaka, caballonak sayantaytaxa.
7 7 (8) ¡Jumax axsarkayapunïtawa!
¿Khitirak nayraqataman sayt'aspasti,
q'apisiñaman ninjam aqtatap laykusti?
8 8 (9) Diosay,
alaxpachatpach arsutam yatiytaxa;
uraqix axsariwa, amukt'arakiwa,
9 9 (10) kunapachatix jumax taripañatak sayt'askta,
t'aqhisiyatanakar qhispiyañatak sartaskta ukapachaxa.
10 10 (11) Jaqin tipusiñapax jumar jach'añchañaruw tuku;
juk'a q'apisiñapas jumaruw jach'añchi.
11 11 (12) Tatitutak arsupxam, phuqhapxarakim, jupan jaqinakapa,
axsarkañ Diosar luqtäwinak churapxam.
12 12 (13) Jupaw p'iqichirinakarux jisk'achji,
akapachankir reyinakarus axsarayaraki.
Who We AreWhat We EelieveWhat We Do
2025 by iamachristian.org,Inc All rights reserved.
