NÚMEROS 30 - Qullan Arunaka DC

Arsüwinakat kamachinaka

1 1 (2) Moisesax israelitanakan ayllunakapan jilïrinakaparuw säna:

“Tatitux akham siwa:

2 2 (3) maynitix mä kun lurañatak Tatitur arsuni, jan ukax, phuqhañatak juramentompi arsuni ukapachasti, uka jaqix arsutap phuqhañapawa, kuntix arski taqi ukanak lurañaparaki.

3 3 (4) “Mä tawaqutix mä kun lurañatak Tatitur arsuni,

4 4 (5) awkipasti uka arsutap yatisin jan kamskan ukkhaxa, tawaqux uka arsutap phuqhañapawa.

5 5 (6) Ukampis awkipatix uka arsutap yatisin jan munkaspa ukaxa, Tatitux janiw tawaqur arsutap phuqhañapatak wayt'kaniti.

6 6 (7) “Mä tawaqutix jan sum amuyt'asisa kun lurañatakis Tatitur arsuni, ukat jaqichasxarakini,

7 7 (8) chachapatix yatisin jan kamskani ukapachasti, tawaqux lurañatak arski ukarux phuqhañapawa.

8 8 (9) Ukampis chachapatix yatisin jan phuqhañap munkaspa ukapachasti, janiw warmipax arsutap phuqhañatak wayt'atäkaniti. Tatitux janiw phuqhañapatak wayt'kaniti.

9 9 (10) “Mä ijma warmitix, jan ukax, chachampi jaljtat warmis kuna lurañatak Diosar arsuni ukaxa, taqi kuntix lurañatak arski ukar phuqhañapawa.

10 10 (11) “Chachan warmitix kuna lurañatakis arsuni,

11 11 (12) ukat chachapatix warmipan arsutaparux walikiw sanixa, ukapachasti warmix lurañatak arsutaparux phuqhañapawa.

12 12 (13) Ukampis chachapatix warmipan arsutap jan phuqhañap munkanixa, warmix janiw uka arsutap phuqhañapäkiti. Diosasti warmirux pampacharakiniwa.

13 13 (14) “Warmipan Diosar phuqhañatak arsutapatsti, chachapapuniw ‘walikiw’ sañapaxa, jan ukax ‘janiw’ sañapasa.

14 14 (15) Chachapatix warmipan arsutap yatini, ukat warmipan arsutaparux walikiw sanixa, ukapachasti warmix lurañatak arsutaparux phuqhañapawa.

15 15 (16) Ukampis chachapatix walikiw sasin ukat warmipan uka arsutapar jan phuqhayañ munkani ukasti, jupaw Diosan nayraqatapan juchañchatäni.”

16 16 (17) Tatitux taqi uka kamachinak Moisesar churäna, chachax warmipampi, awkix phuchhapampi, kunapachatix phuchhax tawaqüxasin awkipan utapan jakkani ukapachan suman jakapxañapataki.