MALAQUÍAS 1 - Qullan Arunaka DC

I. QALLTA(1.1)II. TATITUN ISRAEL MARKAR MUNASITAPA(1.2-5)

1Tatitux Malaquías profeta tuqiw Israel markar aka arunak yatiyäna:

2Tatitux siwa: “Nayax jumanakar munasipxsmawa” sasa. Jumanakasti sapxtawa: “¿Kunjämatsa yatipxirista juman nanakar munatamxa?” sasa. ¿Janit Esaú chachasti Jacob chachan jilapäkänsti? Ukampisa, nayax Jacoburuw munasïyäta,

3Esaú chacharusti uñisiyätwa, qullunakap ch'usa wasar tukuyäyäta, uraqinakapsti wasarankir qamaqinakaruw utjasiñapatak katuyäyäta” sasa.

4Esaú chachan saraqirinakapäki uka Edomitanakatix sapxaspa: “Markasax t'unjatawa, ukampis wasitat sayt'ayañäni” sasaxa, taqi ch'aman Tatitux akham sarakispawa: “Jupanakax markanakap wasitat sayt'ayasipkan ukasa, nayax wasitat t'unjarakï. Markapax ‘Juchan phuqt'at marka’ satäniwa; uraqinakapasti ‘Tatitun wiñay q'apisiñ uraqi’ sasa sutichatarakïniwa.”

5Jumanakax pachpa nayranakamampiw uñjapxarakïta, ukatsti sapxarakïtawa: “¡Tatitux jach'a ch'amaniwa, Israelan qurpapat jayansa jilarkir ch'amaniwa!” sasa.

III. WILAÑCHANAK JAN CHIQAPAR LUQTIR SACERDOTENAKATAK JUCHAÑCHÄWI ARUNAKAMPI, AXSARAYAÑ ARUNAKAMPI(1.6—2.9)

6Taqi ch'aman Tatitux sacerdotenakar akham siwa: “Wawanakax awkinakapar waqaychapxiwa, uywatanakas uywirinakaparux yäqapxarakiwa. Nayatix jumanakan awkimästa ukasti ¿kunatarak nayar jan waqaychapxistasti? Nayatix jumanakan uywirimästa ukasti, ¿kunatarak nayar jan yäqapxistasti? Jumanakax nayar jisk'achapxistawa, yatkasas sasipkakistawa: ‘¿Kun lurasarak nanakasti jumar jisk'achapxsmasti?’ sasa.

7Jumanakax altaraxar q'añu t'ant'anak apanipxtaxa, ukampis jiskhisipkakistawa: ‘¿Kun lurasarak jumar ñaqhachapxsmasti?’ sasa. Altaraxax jumanakan ñanqhachañatakïkaspas ukham amuyapxtaxa,

8nayax janis kuna yäqañäkiristsa ukham nayar luqtañatak apanipxtaxa: juykhu uywanaka, kayu p'akit uywanaka, usut uywanaka; ukax ¿jumanakatak walikïskiti? ¡Sarapxam, mark apnaqirinakaman jilïrinakapar ukanak churanipxam, inach jupanakax ‘Walikiw’ sas katuqapxätam!” sasa.

9Jumanakasti jichhax Diosaruy mayisipxam, jiwasat khuyapt'ayasiñapataki. Ukampis jumanakatix ukhama jan wali waxt'äwinak churasipkäta ukkhaxa, jan amuyapxamti Tatitun uka waxt'äwinaka suma chuymampi jumanakat katuqasitapa.

10Taqi ch'aman Tatitux siwa: “¡Walïspaw jumanakat kawkïrisa utaxan punkunakap jist'antaspa ukaxa, ukhamat jan inamayataki altaraxan ninapa aqtayasipkañamataki. Janiw jumanakatak chuymaxax utjkituti, janiw waxt'äwinakam katuqkarakïti.

11Taqi akapach uraqin nayarux jach'añchapxitu, taqi chiqanakan nayar jach'añchasax incienso q'aphiyapxi, ukatsti q'uma waxt'äwinakarak luqtapxitu.

12Ukampis jumanakax ñanqhachapxistawa. Altaraxax jisk'achañäkaspas ukham amuyapxtaxa, ‘uchatäki uka manq'anakax axtqañawa’ sasaw jisk'achapxaraktaxa.

13Jumanakax sapxtawa: ‘¡Taqi akanak lurkäwix qaritäxapxtwa!’ sasa. Ukatsti jisk'achapxistawa. Nayax uka lunthatata, usuta, kayu p'akit uywanak luqtanipkista ukanakxa kusisiñampis katuqapkirisma ukham amuyapxaraktaxa.

14Kawkïr jaqitix suma k'umar uywa nayar luqtañatak yaqhachkasina, mä usut uywaki luqtxitaspa ukax ñanqhachatäpan. Nayax ch'aman Reyïtwa, taqi markanakaw axsarapxitu.” Ukham siw taqi ch'aman Tatituxa.