1 REYES 21 - Qullan Arunaka DC

Ahab reyimpita, Nabot chachan uva yapupampita

1Jezreel markan mä chachaw jakasïna Nabot sutini. Uka pachpa markan jupan uva yapupax utjäna, Samariankir Ahab reyin utap jak'ana.

2Mä urusti, Ahab reyix Nabot chacharuw säna:

—Uva yapum churxita, ukar mä huerta lurasiñaxataki, utax jak'ankatap layku. Uka lantisti juk'amp suma uva yapu churxäma; jan ukax, jumatix munsta ukax, qawqhäkitix alapax uk churxäma —sasa.

3Ukampis Nabot chachax Ahab reyir sänwa:

—¡Diosas jan munkpati! Janiw nayax kuntix awkinakaxat katuqkta ukxa churkirismati —sasa.

4Ahab reyisti Nabot chachan ukham satapat wali llakt'ata, mayjt'atarakiw reyi utapar sarxäna, juparusti akham satayna: “Janiw nayax kuntix awkinakaxat katuqkta ukxa churkirismati” sasa. Purisinsti pirqar uñkatataw ikintxäna, janiw manq'añsa munkänti.

5Ukat Jezabel warmipax jupar jak'achasisin jiskt'äna:

—¿Kunatarak llakista, manq'añ jan munkaraktasti? —sasa.

6Ahab reyisti ukxaruw säna:

—Nabot chachampiw parlta uva yapup nayar aljxañapataki; jan ukax, munaspa ukax yaqha uva yapu uka lanti churxañaraki. Ukampis jupax janiw churañ munkituti —sasa.

7Ukat Jezabel warmipax säna:

—¡Israel markan jumaxay munañanïstaxa! Jichhasti sartasin manq'asim, jan llakisimti. ¡Nayaw Nabot chachan uva yapup jikxatayäma! —sasa.

8Ukspachaw Jezabel warmix Ahab chachapan sutipar qillqatanak luräna, reyin sellopampiw chimpuntarakïna; ukatsti uka qillqatanakxa Nabot chachan markapan jakir jilïr jaqinakampiru, jilïr irpirinakampiruw apayäna.

9Uka qillqatanakansti akham jupanakar säna: “Jaqinakar ayuno lurapxañapatak yatiyapxam, ukatsti Nabot chacharux markachirinak nayraqatan qunt'ayapxam.

10Ukxarusti pani k'ari irkatir jaqinak jupa nayraqatan qunt'ayapxarakim, ukatsti jupar irkatapxpan akham sasa: ‘Nabot chachax Diosampiru, reyimpiruw ñanqhachi’ sasa. Ukatsti anqar irpsusin qalamp k'upjaskam jiwayapxam” sasa.

11Nabot chachan markapankir jilïr jaqinakasa, jilïr irpirinakasa, kuntix Jezabel warmin qillqatanakapan siskäna ukarjamaw lurapxäna.

12Jupanakasti ayuno lurapxañapatakiw markar yatiyapxäna, ukatsti Nabot chacharux jaqinak nayraqatan qunt'ayapxäna.

13Ukxarusti pani k'ari jaqinakaw purinïna, ukatsti taqi jaqinak nayraqatan Nabot chachar irkatapxäna: “Nabot chachax Diosampiru, reyimpiruw ñanqhachi” sasa. Ukatsti ukspachaw Nabot chacharux markat irpsusin qalampi k'upjaskam jiwayapxäna.

14Ukatsti Jezabel warmirux uk yatiyanipxäna: “Nabot chachax qalamp k'upjataw uñjasi, jichhasti jiwatawa” sasa.

15Uk yatisinsti, Jezabel warmix ukspachaw Ahab chachapar säna:

—Saram, Jezreelankir Nabot chachan uva yapup katuntasinim, khititix jan aljañ munkäyätam ukan yapupa. Nabot chachax janiw jakkxiti; jichhax jupax jiwatäxiwa —sasa.

16Ahab reyisti Nabot chachan jiwatäxatap yatisinxa, sarasin uva yapup katuntasïna.

17Ukapachaw Diosax Tisbé chiqankir Eliasar säna:

18“Jichhpacha Samaria markar saram, ukatsti Israelan Ahab reyipar jikxatam. Jupax Nabot chachan uva yapupankaskiwa, uka yapu katuntasiriw sari.

19Juparusti sätawa: ‘Tatitux akham siwa: Jumax Nabot chachar jiwayasinxa, kunatix jupankkäna uk apartaxa, jichhasti kawkha chiqantix anunakax jupan wilap jallq'apki, uka pachpa chiqan anunakax juman wilam jallq'apxani’ ” sasa.

20Ahab reyisti Eliasarux sänwa:

—Ukhamasti, ¿juma, uñisirixat nayar jikxatista? —sasa.

Eliasasti sänwa:

—Jïsa, jikxatsmawa. Jumax jan wali luräwinakak Tatitun nayraqatapan lurtaxa.

21Uka luratamatsti Tatitux akham siwa: ‘Jumxarux jan walt'añ apayanï, ukatsti jumat saraqiri wawanakamarux tukjäwa; Israel taypin utjir jumat saraqir yuqall wawanakarux taqiniruw tukjä.

22Ukhamarusa, wila masinakamampix kunjämtix Nabat chachan Jeroboam yuqapan wila masinakapampi, Ahías chachan Baasá yuqapan wila masinakapampis lurkta, ukham lurarakï, Israel markar jucha lurayatamata, ukampi nayar q'apisiyatamata’ sasa.

23Tatitux Jezabel warmit akham siwa: ‘Anunakaw Jezabel warmirux Jezreel pampanakan manq'ani’ sasa.

24Juman utamankirita khititix markan jiwkani ukarusti, anunakaw manq'ani; pampan jiwirinakarusti jamach'inakaw manq'antarakini —sasa.

25(Janiw khitis Ahab reyjam utjkänti, Jezabel warmipan amtayatap layku Tatitun nayraqatapan jan walinakaki luririxa.

26Idolonakar yupaychasin axtkay luräwi luräna, kunjämatix amorreonakax lurapkäna ukhama, Tatitux uka jaqinakaruw israelitanakan nayraqatapat jaqunukutayna).

27Ahab reyisti Eliasan taqi uka arunakap ist'asinxa, isip ch'iyanuqasïna, ukatsti chhankha isinak uchasisin ayuno luräna. Uka isimpiw ikïna, wali llakitaw sarnaqarakïna.

28Ukatsti Tatitux Eliasar sänwa:

29“¿Kunjämtix Ahab reyix naya nayraqataxan jisk'ar tukki uk uñjtati? Nayan nayraqataxan jisk'ar tukutap laykuxa, janiw kuna ñanqhsa jupan jakañapkamax wila masinakapar apayankäti, jan ukasti yuqapan jakañapan ukxa apayanï” sasa.