JOB 36 - Qullan Arunaka DC

Elihú chachan pusïr kuti arsutapaElihú chachasti arsuskakïnwa:

1-2Llamp'u chuymamp suyt'ita, ukat yatichäma,

Diosat arxatasis arsuñaxax utjaskakipuniwa.

3Nayar irnuqasir Diosax chiqaparuw uñji;

nayan taqi yatiñ kankañaxax jupat juti,

uksti uñacht'ayämawa.

4Janiw kuna k'ari arunaksa jumar siskämati,

juma nayraqatansti wali yatiñan jaqiw sayt'atäski.

5Diosax ch'amaniwa, yatiñ kankañapax jach'awa,

janiw khiti jaqirus jisk'achkiti.

6Jan yäqat jaqinakarux chiqaparuw uñji;

ukampis ñanqha lurir jaqirux janiw jakañap pampachkiti.

7Aski jaqinakarux arxatapuniwa;

reyinakampi chikaw qunuñapar qunt'ayi,

jach'ar aptataw uñjasipxi.

8Llakitanakarusa,

jan ukax carcelar jist'antat uñjasirinakarusa,

9Diosaw jupanakarux juchap uñacht'ayaski,

jach'a jach'a tukuñampi atipjayasipxatapata.

10Jupanakan chiqachasiñapatakiw parli,

ñanqha luräwinakap apanukupxañapatakiw mayiraki.

11Jupanakatix Diosar ist'apxani, jaysapxarakini,

kusisita, askimp phuqt'ataw sapür sarnaqapxani.

12Janitix Diosar jaysapkani ukasti,

jiwax jupanakan jan amuykataw purinini.

13Jucharar jaqinakax ñanqhasirinakawa,

katuntatäkasas janiw yanap mayipkiti.

14Waynpachaw jiwarapxi;

mä p'inqaw tukusiwayxapxaraki.

15Diosasti t'aqhisirirux t'aqhisiñ tuqi qhispiyi;

jaqirux llakisiñ tuqi amuyt'ayaraki.

16Jumarusti jan walt'añanakat qhispiyaraktam,

taqi kunan phuqt'ata, suman sarnaqasiñ churtam;

manq'añamsa jilarkir churaraktam.

17Jumanwa ñanqha lurir jaqin juchañchäwipax phuqhasi,

taripatäñampita, juchañchatäñampit janiw qhispkasmati.

18Amuyasim, qamir yänakamp jan sallqjayasimti,

qullqi chilltayasiñamp jan atipjayasimti.

19T'aqhisiñan ukanakax inamayakïniwa,

wararitamasa, ch'amamasa.

20Aruma puriniñap jan suyamti,

arum ch'amakax janiw jumar imantkätamti.

21Ñanqha lurañar kuttañat wal amuyasim,

ukat jumax t'aqhisiñampi yant'at uñjastaxa.

22Diosan jach'a ch'amap uñtam;

janiw jupjam khiti yatichiris utjkiti.

23Janiw khitis kunatix lurañapäki uk siskaspati,

janirakiw khitis ajanupar jan wali luratapsa qhant'kaspati.

24Taqi jaqiw jupan luräwinakap jach'añchi;

jumasa luräwinakap jach'añchañat amtasirakim.

25Taqi jaqinakaw luratanakap uñjaspa,

jayatpachsa uñjarakispa.

26Diosax jach'a kankañaniwa, janiw amuyt'irjamäktanti,

janirakiw qawqha maranïtapsa yatksnati.

27Jupax mayawjaruw uma ch'aqanak apthapi,

uka uma ch'aqanaksti jalluruw tukuyi.

28Jallux qinayanakat waraqtani,

ukatsti akapacharuw purintaraki.

29¿Khitirak qinayanakan kunat unxtatapsa,

qhixu qhixunakan kunat alaxpachan qhixuqitapsa amuyt'aspasti?

30Diosaw lliju llijunak jach'a qutxar saratatayi,

ukatsti uka jach'a quta manqharuw chhaqhayaraki.

31Diosaw markanakarux apnaqi,

manq'añsa jilarkir churaraki.

32Jupaw lliju llijurus amparapar katxäsi,

kawkharutix puriñapäki ukawjaruw antutnuku.

33Qhixu qhixux Diosan utjatap yatiyaski,

jach'a thayasti jupan q'apisitap qhanañchaskaraki.