NAHÚM 1 - Qullan Arunaka DC

I. QALLTA(1.1)

1Aka yatiyäwisti Nínive markatakiwa, Elcós sat uraqinkir Nahúm profetan unañchäwi uñjatap qillqata.

II. TATITUN CH'AMAN KANKAÑAPAR Q'UCHU(1.2-10)

2Tatitux taqinin jupar chiqa arkañas muni;

khitinakatix jupar saykatapki,

uñisipkaraki ukanakarux mutuyiwa.

3Dios Tatitux wali llamp'u chuymaniwa, ukampis wali ch'amanirakiwa,

juchanirus juchapxa uñt'asiyapuniniwa.

Tatitux jach'a axsarkañ thayanak patan sarnaqi,

qinayanakasti kayunakapan laq'a sartayatapawa.

4Jach'a qutarusti tuqintasin wañt'ayi;

taqi jawiranaksa wañt'ayarakiwa.

Basán tuqinkir pampa uraqinakapasa,

Carmelo qullun ch'uxñanakapas wañsuwayxiwa,

Libanonkir panqaranakas pharsuwayxarakiwa.

5Jupa nayraqatanxa qullunakas khathatiwa;

nayräxapansti jisk'a qullunakas chullutatawayxakiwa.

Taqi aka uraqpachan jakirinakasa

jupar uñjasax wal khathatipxi.

6¿Khitirak q'apisitap nayraqatan sayt'aspasti?

¿Khitirak phiñasitapar qallkataspasti?

Q'apisiñapax ninjamaw aqatati,

jupa nayraqatansti qarqanakas payaruw ch'iyjtawayi.

7Tatitux wali suma Diosawa,

llakisiñanakan arxatasiriwa;

jupar alkatirinakarux arxatarakiwa.

8Ukampis Tatitux jupar saykatirinakarux

walja umjamaw q'al tukjas aparaki;

uñisirinakaparusti ch'amak manqhakamaw arktaraki.

9¿Kunsa jumanakax Tatitu Dios tuqix amtasipkta?

¡Jupax q'al tukjapxätam!

¡Janiw khitis pä kuti jupar saykatkaspati!

10K'ithuntat ch'aphinakjama,

waña jichhur uñtataw nakhantatäpxäta.

III. YAQHA ARUNAKA(1.11-15)

11Nínive marka, jumanak taypit

Tatit tuqi jan walinak amtir jaqix mistu;

ñanqha amuyt'ayir jaqixa.

12Ukat Tatitux markapar sixa:

“Asiriankir jaqinakax waljanïpkchisa, ch'amanïpkarakchisa,

jan mayampitak tukjatäpxaniwa.

Judá marka, nayaw jumarux t'aqhisiysma,

jichhax janiw juk'ampi t'aqhisiykxämati.

13Nayaw jumar t'aqhisiyir yuku akch'a akch'a tukjä,

chinuñanakamsa t'aqanuqarakïwa” sasa.

14Nínive markankir rey,

Tatitux jumat akham siwa:

“Janiw jichhax wawanakamax utjkxaniti

sutimat amtasiñatakixa;

diosaman utapat yaqha diosanaksa, idolonaksa q'al t'unjäxa,

jan wali lurir jaqïtamatsti,

uka pachparurakiw jumarux imantäma”.

Nínive markan aynacht'añapat yatiyäwi

15 15 (1) ¡Judá markankir jaqinaka, uñtapxam!

Suman sarnaqasiñ yatiyäwinak apanirix niyaw qullunjam jutaski.

Phunchhäwi urunak lurapxam;

arsutanakamsti phuqhapxarakim.

Qhuru jaqinakasti janiw juk'ampi jumar nuwirix jutkxapxaniti;

q'ala t'unjatäxapxiwa.