SALMOS 50 - Qullan Arunaka DC

SALMO 50Diosax chiqapar uñjir taripiriwa 1a Asaf chachan q'uchupa.

1 Khititix diosanakan Diosapäki uka Tatituw arsu;

inti jalsuta, inti jalantat jakirinakarux jawsthapi.

2Jerusalén markatpacha,

k'ajkir markatpach Diosax qhantaski.

3Diosasax jutaskiwa, janiw amuk jutkiti:

nakhantir ninaw nayraqatapanjam jutaski;

jach'a tutukampi muyuntataw jutaski.

4Diosax alaxpacharu akapacharuw jawsi,

markapar taripäwi uñjayañataki.

5“Nayar iyawsirinakar tantacharapipxita,

arusjäwixar wilañchampi chimpuntirinakaru” sasa.

6Alaxpachasti Diosan aski taripirïtap yatiyi.

7“Israel markaxay, ist'ita,

jumaruw qhan parlxayäma.

¡Nayaw Diosätxa!

¡Nayaw jumar juchanchir Diosamätxa!

8Janiw luqtanakamar jisk'achkti,

janiw wilañchanakamatakis q'apiskti.

9Janiw utamankir vaca qallu luqtañam mayksmati,

janirakiw tamanakamat mä cabrito mayksmati,

10ch'umi manqhankir animalanakax nayankituwa,

qullunakankir uywanakas nayankarakituwa;

11qullunakankir jamach'inakax nayan uñt'atawa,

pampanakan utjirinakas amparaxankiwa.

12Manq'at awtjayaskirista ukas

janiw jumat maykirismati,

akapachasa, ukan utjirisa, nayankatap layku.

13¿Vaca aychti manq'txa jan ukax,

cabritonakan wilapcha umtxa?

14¡Diosar luqtañamax yuspagarañ chuymäpan;

Alaxpachankir Diosar arsutanakam phuqham!

15Llakitäkät ukkhax nayar jawsita;

nayasti qhispiyämawa,

jumax jach'aruw aptarakitäta” sasa.

16Jucharar jaqirusti Diosax siwa:

“¿Kuna munañanïtas kamachinakax aynaqasiñataki,

jan ukax arust'äwix aytasiñamatakisa,

17nayampi jan chiqachayasiñ munkasasa,

arunakaxarus jan jayskasasa?

18Lunthatarux qhumantasaw katuqtaxa;

¡wachuqan sarnaqirinakampiw chikachastaxa!

19Ñanqha lurañatakiw lakam jist'artaxa,

lakamax k'ari arsuñatakiw wakichasi.

20Jilamaruw ina ch'usat k'arinttaxa;

¡pachpa jilamaruw jisk'achtaxa!

21Ukanak lurkipansa, amukïskäyätwa;

nayax jumjamäkirista ukham amuytaxa.

Jichhasti jumaruw juchañchäma,

ajanumaruw irkatäma.

22Naya Diosat armasirinaka, sum ist'apxam,

ukatarak q'al tukjasipkirisma;

janirak khiti arxatirsa jikxatasisipkasma;

23nayar yuspagaririx jach'aruw aptitu;

thakhixan sarnaqirirusti

nayaw qhispiyä” sasa.