2 REYES 12 - Qullan Arunaka DC

1 1 (2) Jehú reyix paqallq mara markar apnaqkäna ukapachaw Joás reyix marka apnaqañ qalltäna, jupasti Jerusalenan pusi tunka maraw marka apnaqäna. Taykapax Sibiá satänwa, Beerseba markankirirakïnwa.

2 2 (3) Joasan luratanakapasti Tatit nayraqatan chiqapänwa, Joiadá sacerdotew jupar sum yatichatayna, uka layku.

3 3 (4) Ukampis yaqha diosanakar yupaychañ utanakax janiw apaqatäkänti, jan ukasti markax uka utanakan wilañchanak luqtaskakïnwa, inciensonaksa nakhayaskakïnwa.

4-5 4-5 (5-6) Mä urusti, Joasax sacerdotenakaruw säna:

—Jumanakax Tatitun utapar apanipki uka taqi qullqinak apthapipxam, sapa mayni churañapäki uksa, ukhamarak sapa maynisa chuymapatjama Tatitun utapar qullqi apanki ukanaksa. Uksti qullqi imirinakar mayipxam, Tatitun utapan taqi kunanakatix askichañ wakiski ukanakataki —sasa.

6 6 (7) Ukampis pä tunka kimsan mara Joás reyix marka apnaqkän ukkhakamasti, sacerdotenakax janiw kunsa Tatitun utapan askichapkataynati.

7 7 (8) Ukat Joás reyix Joiadá sacerdotempiru, maynïr sacerdotenakampir jawsayanïna, jupanakarusti akham jiskt'äna:

—¿Kunatarak jumanakasti Tatitun utap jan askichapktasti? Jichhürut uksarux janiw jaqinakat qullqi maykxapxätati, katupkta uka qullqsti kutt'ayxapxañamawa Tatitun utap askichayañataki —sasa.

8 8 (9) Sacerdotenakasti jaqinakat qullqinak jan katuqxañatakix walikiw sapxänwa, Tatitun utap askichayañanakansa suyt'xañataki.

9 9 (10) Ukatsti Joiadá sacerdotex qullqi uchañ katusin qhuphiñapat p'iyjäna, ukatsti altaran kupïxaparuw uk uchäna, mantañäki ukhamarjama; Tatitun utapar mantañ uñjiri sacerdotenakasti, Tatitun utapar apanit taqpach qullqinak ukar uchapxäna.

10 10 (11) Kunapachatix qullqi uchañan phuqhäxatap uñjapxäna ukkhasti, reyin qillqiripampi, sacerdotenakan jilïripampiw jutapxäna, ukatsti uka qullqinak taqpach jakthapisin mä wayaqanakaruw uchxapxäna,

11 11 (12) uka qullqinak jakthapisinsti, Tatitun utap askichirinakan sarayirinakaparuw katuyapxäna, jupanakan Tatitun utapan irnaqirinakaru, k'ullu khithunakaru, utachirinakaru qullqi churapxañapataki,

12 12 (13) ukhamaraki uta luririnakaru, qala ch'iyirinakaru churapxañapataki, ukatsti lawanakampi, ch'iyat qalanakampi alapxañapataki, ukatsti kunatix Tatitun utapa askichañatak wakiski ukanakatak uka qullqit irtapxañapataki.

13 13 (14) Ukampisa, kawkïr qullqitix Tatitun utapar apanitäkäna ukatxa, janiw uka pachpata qullqi qirunaka, nakhat pabilunaka apaqañataki tijeranaka, jach'a qirunaka, trompetanaka lurañatakïkänti, qurita, qullqit yänaka lurañatakïkänsa,

14 14 (15) jan ukasti, uka qullqix lurañanak sarayirinakar katuyatänwa, jupanakan uka qullqimpi Tatitun utap askichapxañapataki.

15 15 (16) Ukampisa, qullqi katurinakarux janiw alatanakapat yatiyañapatakix mayitäkänti, jupanakan chiqaparu apnaqapxirïtap layku.

16 16 (17) Ukhamasti, jaqinakax juchanak luratat pampachatäñatak churapkän uka qullqxa, janiw Tatitun utapar apatäkänti, uka qullqinakax sacerdotenakatakïnwa.

17 17 (18) Khä urunakanxa, Siria markankir Hazael reyixa, Gat filisteo markar nuwantasin uka marka katuntäna, ukatsti Jerusalén tuqirurakiw saräna, uka marka katuntañ amtampi.

18 18 (19) Ukampis Judá markankir Joás reyix, kawkïr qullan yänaktix Josafat, Joram, Ocozías nayra reyinakax Judá uraqin Tatitun utapatak luqtapkatayna uka yänak taqpach apthapïna; ukatsti kawkïr yänaktix jupa pachpas Tatitur luqtkatayna ukanaka, ukhamaraki Tatitun utapampina, reyin utapampin imat qurix utjkäna ukamppach apthapïna, ukatsti taqi ukanak mayaruk apthapisaw Hazael reyin ukar apayäna, ukanak katuqasin uka reyix Jerusalén markar katuntañ suyt'xäna.

19 19 (20) Joás reyin ukat ukxar sarnaqäwipasa, taqi luratanakapasa, Judá markankir reyinakan luräwinakapa qillqatankiwa.

20 20 (21) Mä urusti, jupan pachpa yanapirinakapaw jupatak jan wali amtasin jiwayapxäna, Bet Miló sat utana, Silá chiqaru saraqaskäna ukapacha.

21 21 (22) Jupar jiwayapkäna uka yanapirinakasti, Simat chachan Josacar yuqapampi, Somer chachan Jozabad yuqapampïnwa. Joás reyix jiwxäna ukkhasti, Davidan Markapan jupar imt'xapxäna. Uka qhipatsti Amasías yuqapaw jupa lantix reyïxäna.