SALMOS 112 - Qullan Arunaka DC

SALMO 112Chiqap sarnaqir jaqin kusisiñapa

1¡Tatitux jach'añchatäpan!

Tatitur axsartir jaqix kusisiñaniwa,

arsutanakapar munasir jaqix kusisiñaniwa.

2Aski jaqin wawanakapax qullanäpxaniwa,

aka uraqinsti munañanïpxaniwa.

3Walja yänakaw utapan utji,

jaqir khuyapt'ayañapasti jan tukuskiriwa.

4Khuyapayasiñan aski jaqix,

ch'amakan qhantir qhanjamaw k'ajti.

5Aski jaqix khuyapayasiñ chuymamp mayt'iriwa,

chiqap chuymampiw yänakap apnaqi;

6aski jaqix janipuniw kunapachas aynacht'kaniti.

¡Aski jaqix aytatapunïniwa!

7Jan wali yatiyäwinakarux janiw axsarkiti,

Tatitunkasax chuymapax wali thurt'atawa.

8Chuymapax ch'amañchatawa, janiw axsarkiti,

timasirinakaparux phiskasiñampiw uñkati.

9Jan kunan jaqinakaruw churäwinak waxt'i,

jaqir khuyapt'ayañapax jan tukuskiriwa,

jan khitin kamskañaw p'iqip wayti.

10Ñanqha lurir jaqisti jupar uñjasax q'apisiwa;

jan kamachirjamäxasax laka ch'akhanakap t'urusi.

Ñanqha jaqinakan inampst'añ chuymapasti aynacht'aniwa.