1Tatitux Moisesar sänwa:
—Nayax faraonampiru, egipcionakampirux yaqha mutuyäwimp apayanï. Uka qhipatsti faraonax janiw jumanakar saririkti antutapkätamxa, jan ukasti jupa pachpaw markapat alisnukupxätam.
2Jichhasti israelitanakar sanirakim, sapa mayni chachanakasa, warminakas uta jak'apankirinakat qurita, qullqita lurat yänak mayipxpan —sasa.
3Tatitusti egipcionakarux suma munasiñ chuyman tukuyäna, ukhamat israelitanakan mayitanakapar yänak churañapataki. Ukhamarus faraonan yanapirinakapax Moisesar wali yäqañampiw uñjapxäna, ukhamarak Egiptonkir taqpach jaqinakasa.
4Moisesasti mayampi faraonar säna:
—Tatitux akham siwa: “Chika arumaw nayax Egipto uraqi chiqanjam sarakipawayä,
5ukatsti egipcionakan jilïr tayna yuqall wawanakapaw jiwarani, faraonan qunuñapan qunt'atäki uka jilïr tayna yuqall wawapat qalltasa, molinon irnaqir uywat warmin jilïr tayna yuqall wawapar tukuyasa. Uywanakan nayrïr qallunakapas jiwararakiniwa.
6Ukapachasti taqpach Egipto uraqin wali jachañanakampi warariñanakampiw utjani, janipuniw kunapachas ukham jachañanakax utjirïkänti, janirakiw akat qhiparus mayamp utjkaniti.”
7Ukhamat jumanakan yatipxañamataki kunjämtix Tatitux israelitanakar egipcionakat yaqhachki ukxa. Israelita jaqinakarusti, ukhamarak uywanakaparus janiw anunakas wajkaniti.
8Ukapachaw taqi aka yanapirinakamax nayan ukar jutani, killt'asisaw nayar mayipxitani: “Jumampi, jumar arkir jaqinakamampix sarxapxam” sasa. Ukhamäni ukkhakiw nayax akat sarxä —sasa.
Ukatsti Moisesax wali q'apisitaw faraonan ukat mistuwayäna.
9Uka qhipatsti, Tatitux Moisesar saskakïnwa:
—Faraonax janiw jumanakar ist'apkätamti, ukhamat nayan jach'a muspharkañ luräwinak Egipto markan juk'amp uñacht'ayañaxataki —sasa.
10Ukhamaw Moisesampi, Aaronampix taqi uka muspharkañanak faraonan nayraqatapan lurapxäna, ukampis Tatitux faraonan chuymap qalarayänwa, faraonasti janiw israelitanakarux Egiptot sarxapxañapatak antutañ munkänti.
Who We AreWhat We EelieveWhat We Do
2025 by iamachristian.org,Inc All rights reserved.
