JEREMÍAS 36 - Qullan Arunaka DC

Jeremías profetax Tatitun arunakap qillqayi

1Josiasan yuqapa, Joacín reyix Judá uraqi pusi mara apnaqkän ukapachaw Tatitux Jeremiasar parläna, juparusti sarakïnwa:

2“Jeremías, mä jisk'a lip'ichinak jikxatam, ukatsti kuntix Israel markxata, Judá markxatsa, yaqha markanakxatsa siskäma taqi ukanak uka lip'ichinakar qillqantam, kuntix Josías reyin urunakapatpacha, jichürkamas luraskixa, taqi ukanak qillqantam.

3Inas ukhamat Judá uraqinkir jaqinakax kuna t'aqhisiñanaktix apayaniñ amtkta ukanak yatisin, jan wali luräwinakap apanukxapxchini, nayasti jupanakarux jucha luratanakapatsa pampachxarakirista” sasa.

4Jeremiasasti Nerías jaqin Baruc sat yuqaparuw jawsäna, ukatsti taqi kuntix Tatitux siskäna uka arunak qillqañapatakiw sarakïna, Baruc chachasti mä lip'ichiruw taqi uka arunak qillqantäna.

5Ukxarusti, jank'akiw Jeremiasax Baruc chacharux sarakïna: “Sum ist'ita, katuntatätaxat nayatakix jichhax ch'amaw Tatitun utapar sarañaxa.

6Uka layku, jutir ayuno lurañ urunxa jumaw saräta, ukatsti kuntix qillqayksma uka arunak ullararakïta, ukhamat Jerusalén markpacha, Judá uraqin utjir markanakan jakirinakat aka markar jutapki ukanakax Tatitun arunakap ist'apxañapataki.

7Inampis ukhamat Tatitur mayisipxchispa, uka ñanqha luräwinakapsa apanukupxarakchispa, Tatitun aka markatak arski uka phiñasiñapax axsarkañawa” sasa.

8Baruc chachasti Jeremías profetax siskatayna ukarjamaw luräna. Tatitun utapar sarasinsti, Tatitun arunakap ullart'äna, kunatix lip'ichin qillqatäkäna ukanaka.

9Joacín chachan Josías yuqapax, Judá uraqin phisqa mara llätunka phaxsimpi reyïkän ukapachaw mä amtäwix mistüna, taqi khitinakatix Jerusalén markan jakapki, Judá uraqin markanakapat jutapki ukanakas Tatit nayraqatan ayunapxañapataki.

10Baruc chachasti Tatitun utapan jach'a anqäxaparuw saräna, Machaq Punku satäki uka mantañaru, jupasti Safán jaqin yuqapa Gemarías qillqirin utapatpach kuna arunaktix Jeremiasax qillqaykatayna uka arunak taqi jaqinakatak ullart'äna.

Baruc chachax jach'a jilïrinak nayraqatan Tatitun arunakap ullart'i

11Miqueas jaqisti, kawkïritix Guemarías jaqin yuqapäkäna, Safán jaqin allchhipäkarakïna ukax, Baruc chachar Tatitun arunakap taqpach ullart'ir ist'asax,

12reyin utaparuw saräna, reyin qillqiripan utaparu, uka utan walja jilïrinakaw tantacht'atäpxäna, ukanakasti akïrinakänwa: Elisamá, jupax reyin qillqiripa; Delaías, Elnatán, Gemarías, Sedequías ukanaka, jupanakax Judá markan jilïrinakäpxänwa.

13Miqueasasti kuntix ist'katayna kunapachatix Baruc chachax taqi jaqinak nayraqatan Tatitun arunakap ullart'käna ukanak yatiyarakïna.

14Uka jilïrinakasti Jehudí sat jaqiruw khithapxäna, jupax Netanías jaqin yuqapänwa, Selemiasan allchhipa, Cusí sat jaqin allchhipan allchhiparaki. Uka Jehudí jaqisti sarasinxa Baruc chacharuw säna, kawkïr qillqattix ullart'ki uk jilïrinakan nayraqatapar apanim sasa. Baruc chachasti qillqat katusinxa uka jilïrinakan nayraqataparuw uñstäna,

15uka jilïrinakasti sapxarakïnwa:

—Qunt'asim nanakatak uka qillqat ullart'arapipxita —sasa.

Baruc chachasti jupanakatakiw ullart'arapïna;

16ist'asinsti ukspachaw axsarthapipxäna, ukat maynit maynikam uñkatasisin sapxarakïna:

—Taqi akanaksti reyix yatiñapawa —sasa.

17Baruc chacharusti sapxarakïnwa:

—Yatiyapxita, ¿kunjämsa taqi akanak qillqta? —sasa.

18Baruc chachasti ukxarux sarakïnwa:

—Jeremías profetaw pachpa arunakapampi qillqayitu, ukat nayax qillqarakta —sasa.

19Ukat Baruc chacharux sapxäna:

—¡Ukhamax jichhax jumasa, Jeremías profetasa imantasxapxam, janirak khitis jumanakan kawkhankatamsa yatkpati! —sasa.

Reyisti ninaruw uka qillqat phichhanti

20Uka jach'a jilïrinakasti uka qillqatxa Elisamá, reyin qillqiripan utaparuw jaytanipxäna, ukatsti reyin utaparuw sarapxäna taqi akanak reyir yatiyiri.

21Reyisti Jehudí sat jaqiruw khitharaki uka qillqat Elisamá qillqirin utapat aptaniñapataki, kunapachatix Jehudí jaqix uka qillqat puriyankän ukapachasti, reyin nayraqatapana, taqi jach'a jilïrinakan nayraqatapan ullart'äna.

22Reyisti ukapachax juyphipacha qamarañ utapankaskänwa, mä junt'uchir nina thiyan qunt'ata, llätunkïr phaxsïnwa.

23Jehudí chachax niya pusi jananak ullaraskäna, ukapachaw reyix ullaratatjam uka qillqat cuchillompi kharinuqäna, ukatsti uka nina nakhaskiriruw nakhantayäna. Uksti taqpach qillqat nakhantayañkamaw luräna.

24Janiw reyisa, uka jach'a jilïrinakasa, uka arunak ist'asax axsartapkänti, janirakiw llakt'asipkänsa.

25Elnatán, Delaías, Guemarías sat jaqinakasti reyirux wal achikt'apxäna, uka qillqat jan nakhantayañapataki, ukampis reyix janiw jupanakarux jayskänti,

26jan ukasti, Jerahmeel yuqapampiru, Azriel sat jaqin Seraías yuqapampiru, Abdeel jaqin Selemías yuqapampiruw mayïna Jeremías profetaru, Baruc sat qillqiripampir katuntapxañapataki. Ukampis Tatituw jupanakarux imantxäna.

Jeremiasax wasitat qillqayi

27Reyin ukhama, kuntix Jeremiasax Baruc qillqiripar qillqaykatayna uka qillqat nakhantayatapatsti, Tatitux wasitat Jeremiasar parläna akham sasa:

28“Jichhax yaqha jisk'a lip'ichinak jikxatam, ukatsti nayrïr qillqatankkäna, Judá uraqinkir Joacín reyix phichhantayki uka arunak wasitat qillqam.

29Ukatsti nayan sutixar sarakim: ‘Jumax ninaruw uka qillqat phichhanttaxa, ukatsti Jeremiasaruw juchañcharaktaxa Babiloniankir reyin jutañapxat qillqatapatxa, aka markarusti Babiloniankir reyix q'al t'unjani, jan jaqinakani, jan uywanakan jaytarakini sasa.

30Jichhax walikiwa, naya, Tatituw jumar sisma, Judá uraqinkir Joacín rey, janiw kawkïr wawamas Judá markan reyipat utt'askaniti. Jiwat janchimasti, urux lupir jaqunukutäniwa, arumasti juyphir jaqunukutarakïniwa.

31Ukatsti jumarusa, wawanakamarusa, jach'a jilïrinakamarusa jucha luratanakapat mutuyapxäma. Jumanakxarusti, Jerusalén markan utjirinakxarusa, Judá uraqin utjiri jaqinakxarusa, kuna jach'a t'aqhisiñattix yatiykta ukxa apayanipxapunïmawa, jumanakasti uka yatiyäwinakarux janiw ist'apkaraktati’ ” sasa.

32Ukhamasti Jeremías profetax yaqha jisk'a lip'ichinak aptasin Baruc qillqiriparuw churi, ukatsti jupax kuntix Jeremiasax siskäna taqi uka arunak qillqarakïna, kawkïr qillqattix Joacín reyix nakhantaykäna ukan qillqatäkäna uka kipka arunakarak qillqantayäna. Ukhamarus Jeremiasax uka qillqatarux yaqha arunakampi yapxatarakïna.