2 REYES 2 - Qullan Arunaka DC

II. ELÍAS PROFETAN ALAXPACHAR MAKHATXATAPA, ELISEON SARNAQÄWIPATA(2.1-25)Elías profetan alaxpachar makhatxatapa

1Tatitux Eliasar mä tutuka thaya tuqiw alaxpachar irpasxañ amtatayna. Uka urusti, Eliasampi, Eliseompix Gilgal chiqat mistunxapxäna,

2Eliasasti Eliseorux sänwa:

—Akawjaruy jumax qhiparam, Tatitux Betel markaruw khithaskitu —sasa.

Eliseosti ukxaruw säna:

—Nayax Tatit layku, juma laykuw juramento lurta, janiw nayax sapak saraykämati —sasa.

Ukhamasti panpachaniw Betel markakam sarapxäna.

3Ukampis Betel markan jakir profetanakax Eliseor jikxatiriw mistunipxäna, ukat jupar jiskt'apxarakïna:

—Tatitux jichhüruw yatichirimar irpaqasxätam, ¿uk yatxtati? —sasa.

Eliseosti sänwa:

—Jïsa, yatxtwa, ukampis jumanakax jan kuns sapxamti —sasa.

4Ukatsti Eliasax Eliseoruw säna:

—Aka chiqaruy jumax qhiparam, Tatitux Jericó markaruw khithaskitu —sasa.

Eliseosti ukxaruw säna:

—Nayax Tatit layku, juma laykuw juramento lurta, janiw nayax jumar sapak saraykämati —sasa.

Ukatsti panpachaniw Jericó markar sarapxäna.

5Ukampis Jericó markan jakir profetanakax, Eliseor jikxatiriw mistunipxäna, ukat jupar sapxarakïna:

—Tatitux jichhüruw yatichirimar irpaqasxätam, ¿uk yatxtati? —sasa.

Ukxarusti Eliseox sänwa:

—Jïsa, yatxtwa, ukampis jumanakax jan kuns sapxamti —sasa.

6Ukatsti Eliasax Eliseor sarakïnwa:

—Akawjaruy jumax qhiparam, Tatitux Jordán jawiraruw khithaskitu —sasa.

Eliseosti sänwa:

—Nayax Tatit layku, juma laykuw juramento lurta, janiw nayax jumar sapaki saraykämati —sasa.

Ukat panpachaniw sarapxäna,

7ukatsti Jordán jawir thiyaruw sayt'asipxäna, phisqa tunka profetanakaw jupanakar arkapxatayna, ukampis jupanakat jaya chiqankapxänwa.

8Ukat Eliasax patxa isip llawthapisinxa, ukampiw umar jisktäna, jawir umasti payaruw jaljtawayäna, ukatsti panpachaniw uka jawir waña uraqinjam makhatawayapxäna.

9Makhatasinsti, Eliasax Eliseor sänwa:

—Sita, jumatak kunas lurañaxax wakisispa, nayax juma jak'at janïra irpaqatäkasina —sasa.

Ukxaruw Eliseox säna:

—Nayax juman ajayumat pä ukkhampi katuqañ munta —sasa.

10Eliasasti sänwa:

—Mayitam phuqhañax wali ch'amawa. Ukampis juman jak'amat nayax aptat uñjasï, uktix uñjätaxa, mayitamax phuqhasiniwa, jan uñjkätasti, janiw phuqhaskaniti —sasa.

11Jupanakasti parlasisaw sarasipkäna, ukham sarkiriruw akatjamat nina nakhaskir mä carrox uñstanïna, caballonakasti nina nakhaskirirakïnwa, ukatsti ukaw jupanakar jaljtayäna, Eliasasti mä thaya tutukanjam alaxpachar makhatxäna.

12Uk uñjasasti, Eliseox jach'at arnaqasïna: “¡Awkixay, awkixay, Israel markatakix mä wali ch'aman ejercitor uñtata!” sasa.

Uka qhipatsti janiw mayampis Eliasarux uñjkxänti.

Eliseon Elías profeta lanti qhiparxatapa

Ukatsti Eliseox isipa katusin payaruw ch'iyjäna.

13Ukatxa kawkïr istix Eliasax jalaqtayaskatayna uka isi iqtasirakïna, ukatsti Jordán jawiraruw kuttäna, uka thiyan sayt'asirakïna.

14Ukxarusti Eliasan patxa isipa katusinxa, umaruw jisktäna, jach'at art'asirakïna: “¿Kawkinkis Eliasan Tatit Diosapaxa?” sasa.

Umar jisktasinsti, umax payaruw jaljtäna, Eliseosti wañanjam jawir wasitat makhatäna.

15Jericó markankir profetanakax Eliseor jawir khurkatankaskir uñjasax sapxänwa: “¡Jichhax Eliasan ajayupax Eliseompïxiwa!” sasa.

Ukatsti jupanakax Eliseor jikxatiriw sarapxäna, jupan nayraqatapan alt'asisinxa,

16sapxänwa:

—Eliseo, nanaka luqtirinakam taypinxa, phisqa tunka jan axsarir chachanakaw utji, jupanakax jank'akiw sarañ munapxi Elías yatichirimar thaqhiri, inas Diosan ajayupax aptasin mä kawki qullu patarusa, jan ukax, mä qhirwarus jaqunukuwaychi —sasa.

Ukampis jupax sänwa:

—Janiwa, jan khitirus khithapxamti —sasa.

17Ukampis jupanakax juk'amp wayt'asipkakïnwa, ukat Eliseox säna:

—Ukhamax khithapxam —sasa.

Profetanakasti phisqa tunka chachanakaruw khithapxäna, jupanakasti Eliasar kimsa uruw thaqhapxäna, ukampis janiw jikxatapkänti.

18Ukat Jericó markar kuttanxapxäna, kawkharutix Eliseox qhiparkatayna ukkharu, Eliseosti jupanakar uñjasax sänwa:

—Nayax “Jan sarapkamti” sapxsmawa —sasa.

Eliseon Jericó markan jalsu umap q'umachatapa

19Markankir jaqinakasti Eliseorux sapxänwa:

—Eliseo, uñtam aka markax wali suma chiqawjankiwa, ukampis umapax janiw walïkiti, uraqisti jan achur uraqiwa —sasa.

20Eliseosti ukxaruw säna:

—Mä machaq qiru apanirapipxita, ukarusti jayu uchapxam —sasa.

Jupanakasti iyawsasaw qiru aparapipxäna,

21ukatsti Eliseox uka uma jalsuru sarasin, jayxa akham sasaw wart'äna:

—Tatitux akham siwa: “Nayaw aka uma q'umachta, aka umax janipuniw markachirinakar jiwaykxaniti, janirakiw uraqirus jan achur tukuykxaniti” —sasa.

22Ukürut umax q'umachatäxäna, kunjämtix Eliseox arskatayna ukhamarjama.

23Uka qhipatsti Eliseox uka chiqat Betel markaruw sarxäna. Thakhinjam makhataskän ukkhasti, mä tama waynanakaw markat mistunisin jupat sawkasiñ qalltapxäna. Jach'at Eliseorux arnaqapxarakïna: “¡P'iqi q'ara, makhatanim! ¡P'iqi q'ara, makhatanim!” —sasa.

24Eliseosti kutikipstasin jupanakar uñkatäna, ukatsti Tatitun sutipxaruw jupanakar ñanqhachäna. Ukspachaw pä jukumarix ch'umit mistunïna, ukatsti jupanakat pusi tunka payaniruw jisk'a jisk'a tukjäna.

25Uka qhipatsti Eliseox Carmelo sat qulluruw sarxäna, uka chiqatsti Samariaruw kuttxarakïna.