EZEQUIEL 28 - Qullan Arunaka DC

Tiro markan reyipatak profecía arunaka

1Tatitux nayar parlxayasinxa, sarakituwa:

2“Jumasti Ezequiel, jichhax Tiro markan reyipar sarakim:

“ ‘Tatitux akham siwa:

Chuymamax jach'a jach'a tukuñampi phuqhantatawa,

mä diosäkasmas ukham amuyastaxa,

diosanakan qunuñapan qunt'ata,

jach'a qutampi muyuntata.

Ukampis jumax janiw diosäktati,

jan ukasti, mä jaqikïtawa,

mä diosan yatiñapanïkasmas ukham amuyastaxa.

3Janiw Daniel profetat sipan juk'ampi yatiñanïktati,

janirakiw taqi imantatanaksa uñt'ktati,

4Yatiñamampi ch'ikhi chuymamampixa,

walja qamir yänak jikxattaxa,

imasiñ pirwanakamarus

qurimpi, qullqimpiw phuqhanttaxa.

5Alakip lurañatakisti wali ch'ikhïtawa,

qamir yänakam yapxataraktawa,

uka qamir yänakamaw

wali jach'a jach'a tukuyaraktamxa.

6Ukatpï Tatitux sixa:

Niyakixay mä diosäkasmas ukham amuyastaxa,

7jichhax jaya markanakat jaqinak jutantayä,

jumar jan walt'ayañataki,

wali qhuru jaqinak khithanï,

espadanakampiw nuwantapxätam,

juma wali sumäkta, ch'ikhïkarakta ukaru,

juman jach'a kankañamsti

pampa sarayasaw takisirakini.

8Jach'a quta manqharuw jaquntapxätam,

wali t'aqhisiyataw jach'a qutan jiwarakïta.

9Jichhasti, ¿jumar jiwayir jaqinak nayraqatankkasasti,

mä diosäkasmas ukham amuyasiskakïtati?

¡Jiwayapkätam uka nayraqatanxa,

janiw jumax kunäktasa, mä jisk'a jaqikïtawa!

10Jaya markat jutir jaqinakaw jiwayapxätam,

kunjämatix Tatitur jan uñt'irinakax jiwarapki ukhama.

Naya, Tatituw uk arsta;

arsutaxsti phuqhapunïwa’ ” sasa.

Tiro markan reyipatak amay imäwi q'uchu

11Tatitux sarakituwa:

12“Jumasti Ezequiel, Tiro markan reyipatak amay imäwi q'uchu q'uchurapim, juparusti sarakim:

“ ‘Tatitux akham siwa:

Jumax taqi kunansa askipunïyätawa,

yatiñampisa, sumäñampisa phuqt'ata.

13Tatitun Edén panqar yapupan utjasïyätaxa,

kunayman suma qalanakampi k'achachata:

Rubí, crisólito, jade,

topacio, cornalina, jaspe,

zafiro, granate, esmeralda qalanakampi,

aretenakamasa, yaqha yänakamasa

qurit luratkamakïnwa,

yurïwim urutpach wakichatarakïnwa.

14Mä angelarakiw jumarux imaskäyätam;

Tatitun qullan qullupankarakïyätawa,

warawaranak taypin sarnaqarakïyätaxa.

15Sarnaqäwimasti chiqapapunïnwa,

kunürutix jumax yurkta ukkhata,

ñanqha lurañax juman uñstki ukkhakama.

16Walja jach'a alakip luratamampisti,

juchanakampi, ch'axwañanakampiw phuqhantastaxa.

Ukapachaw nayraqataxat jaqunuksma;

qullan qulluxatsa jaqunukuraksma,

jumar uñjiri angelasti

warawaranak taypit jaqsuniraktam.

17Jiwakïtam laykusti wali jach'a jach'aw tuktaxa,

k'ajkir kankañamaw

yatiñ kankañamxa t'unjaraki.

Ukatpï uraqirux liwinuksmaxa,

taqi reyinak nayraqatana

mä p'inqa tukuysma.

18Walja juchanakpun lurtaxa,

alakip luratamampix walpun ñanqhachastaxa,

qullan utanakamsa q'añuchjaraktawa.

Ukatpï nayax juma taypin mä nina naktaytxa,

uka ninan jumar nakhantañapataki.

Jichhax taqiniw jumarux uñjapxtam,

uraqir liwnuqtata, qhillar tukuta.

19Jumar uñt'iri markanakasti

jumar uñjasax wal mulljasipxi.

Mä axsarkañaruw tukuraktaxa;

¡jan mayampitakiw tukusiwayxtaxa!’ ”

Sidón markatak profecía arunaka

20Tatitux sarakituwa:

21“Jumasti Ezequiel, Sidón markar saykatam, ukatsti nayan sutixampi parlam.

22Sarakim:

“ ‘Tatitux akham siwa:

Sidón, nayax juman uñisirimaruw tukta;

juma taypin jach'ar aptatäyäwa.

Nayax jumar juchañchkäma,

q'uma kankañaxsa uñacht'aykarakï,

ukapachaw yatipxani, nayan Tatitütaxa.

23‘Jumxarusti usunak apayanï;

thakhinakamansti wilaw jalarakini;

jaqinakamas jiwarataw uñjasipxani,

taqi tuqit espadampi nuwantataw uñjasipxani.

Ukapachaw nayan Tatitütax yatipxani.

24“ ‘Israel markasti janiw mayampsa t'aqhiskxaniti,

kunjämatix yaqha markanakan jisk'achatapampix

ch'aphinakampjam t'aqhiskän ukhama.

Ukapachaw nayan Tatitütax yatipxani’ sasa.

25Naya, Tatituw sista: “Nayaw Israel markarux ananukutäpki uka markanak taypit tantachthapï, ukatsti nayan q'uma kankañax taqi markanak nayraqatan uñacht'ayarakï. Israel markax pachpa uraqiparuw utjnuqtxani, Jacob luqtirixar churkta uka uraqiru.

26Ukan jupanakax suma samart'at jakasipxani, utanak utachasipxani, uva alinaksa ayrusipxarakini. Nayaw Israelar jisk'achiri uka taqi jak'ankir markanakarux juchañcharakï. Ukapachaw yatisini, nayan Israelan Tatitu Diosapätaxa” sasa.