1Tatitusti Moisesaruw akham sarakïna:
2“Aaronampiru, yuqanakapampiru, taqi israelita jaqinakampirusa, kuntix Tatitux siski uka arunak akham sarakim:
3“Mä israelitatix mä urqu vaca, mä ovejsa, jan ukax mä cabritsa, campamento anqäxana jan ukax campamento manqhansa jiwayani,
4ukatsti janirak Tatitump Jikisiña Carpäkis uka nayraqatar Tatitur mä suma waxt'a luqtañatak apankani ukkhasti, wila wartatapat juchañchatäniwa, markap taypitsa apanukutäniwa.
5Aka kamachisti kawkïri uywanaktix Israelitanakax pampan jiwayapki ukanak Tatitur luqtapxañapatakiwa, ukatsti Tatitump Jikisiñ Carpäkis uka nayraqatar apanisin sacerdoter churapxañapawa, ukhamat sacerdoten jupanakan Tatitumpi sumankthapiñatak wilañcha luqtxañapataki.
6Sacerdotesti kawkïritix Tatitump Jikisiña Carpa nayräxankki uka Tatitun altaraparuw wilampi ch'allsuni, lik'inaksti Tatitutakix mä suma q'apkir waxt'äkaspas ukham nakt'ayxarakini.
7Janipuniw mayampsa uka ñanqha ajayunakarux waxt'anakap luqtaskxapxaniti, kawkïrinakarutix jupanakax yupaychas q'añuchasipxäna ukanakaru. Aka kamachisti jumanakatakix wiñayatakïniwa, awkinakamataki, ukhamarak wawanakamatakisa.
8“Ukxarusti kawkïr israelita jaqitixa, jan ukax yaqha markat jutasin jumanak taypin jakir jaqisa mä wilañcha luqtani,
9ukatsti janirak Tatitump Jikisiñ Carpäkis uka nayraqatar apkani ukkhasti, uka marka taypit jaqunukutäniwa.
Wila jan manq'añxata10“Mä israelitatix, jan ukax yaqha markat jutasin jumanak taypin jakir jaqisa wilanpach aycha manq'kani ukkhax, nayax jupatakiw sayt'äxa, markapatsa jaqunukurakïwa.
11Taqi jakirinakan jakañapax wilankiwa. Naya pachpaw jumanakarux uka uywanakan wilap churapxsma altaran nayar luqtapxañamataki, uka wilan jakañax utjatap laykuw jumanakax juchat pampachatäñ jikxatapxta.
12“Ukhamasti, janipuniw jumanakaxa, jumanak taypin jakir yaqha markat jutir jaqinakas wilan aycha manq'apxañamäkiti.
13Mä israelitatixa, jan ukax yaqha markat jutirisa manq'añatak mä uywa, jan ukax mä jamach'sa katjasin jiwayanixa, wilap uraqiruw wartxani, ukatsti laq'ampiw imt'xarakini,
14taqi jakirinakan jakañapax wilankatap layku. Ukatpï sapxsmaxa, wilan aycha jan manq'apxamti sasaxa, jakañan uka wilankatap layku, khititix wilan aycha manq'kani ukasti, markapat jaqunukutäniwa.
15“Mä israelitatixa, jan ukax yaqha markat jutir jaqisa mä jiwat uywan aychapa jan ukax mä monte animalan jiwayat uywan aychapsa manq'kani ukax, isip t'axsuqasxañapawa, jupa kipkas umampi jariqasxañapawa, ukatsti jayp'thapiñapkamaw q'añut uñt'atäni. Ukat jupax q'umachatäxarakini.
16Ukampis janitix isinakap t'axsuqaskani, jupa kipkas janirak umampi jariqaskani ukkhax, ñanqha luratapat mutuyatäniwa.”
Who We AreWhat We EelieveWhat We Do
2025 by iamachristian.org,Inc All rights reserved.
