HEBREOS QALLTA ARUNAKA - Qullan Arunaka DC
QALLTA ARUNAKAAka qillqatax niya tukuyapanak khitir apayat mä qillqatäkaspas ukham amuyasi, chiqpachansa mä arsüwir uñtatawa. Amuyatatxa, aka qillqatax judío iyawsirinakatak qillqatjamawa, jupanakan maynïr masinakapan jan sum uñjatäpxatap laykusti, yant'ataw uñjasipxäna Criston thakhip jaytjasin nayra iyawsäwinakaparu, saräwinakapar kuttxañataki. Qillqirix jupanakaruw uka tuqinakat amuyt'ayañ munäna. Aka qillqatan wakiskir amuyt'apax qallta arunakan qhanstayatawa (1.1-3), ukasti Jesucriston Jilïrïtapa, jupa tuqirak Diosax uñacht'ayasitapa.Uka amuyt'ax akhamar sarayatawa: Jesusax wiñay Diosan Yuqapawa, jupax t'aqhisiñanak tuqiw Awkipar jaysañ yatiqawayi, jupax jilïriwa, janiw profetanakapxarukiti (1.1), jan ukasti yatiyir angelanakapxaru (1.4—2.18), Moisés, Josué chachanakxaru (3.1—4.13), ukhamarak nayrapachan sacerdote kankañxaru, Criston wiñay sacerdotëtap layku (4.14—7.28). Diosax Cristo tuqiw mä machaq arust'äwi utjayi (8.1—9.28). Jesusax jupa pachpa cruzan luqtasitap laykuw jilïr kankañani, urqu vacanakata, cabritonakat wilañcha luqtañat sipansa, wiñay Jilïr sacerdotet utt'asiwayaraki; khititix jupar iyawski ukax juchatsa, axsarañatsa, jiwañatsa qhispiyatawa. Nayra arust'äwirjam uywanak tuqi wilañchanak luqtañanakax Tatit Cristot mä uñtasïwikïnwa (10.1-31).Uka qhispiyasiñax iyawsañ tuqik jikxatasitapatsti, qillqirix judionakan sarnaqäwipat walja uñtasïwinak tuqiw iyawsañat qhanañchi. Ukatsti Cristor iyawsirinakarux tukuykam Jesusar sum arkapxañapatakiw iwxt'araki, jupar uñtasina, t'aqhisiñanaka, arknaqatäñanak mutusa. Tunka kimsani jaljansti yaqha iwxanakampi, achikt'äwinakampi, aruntanakampiw tukt'ayi.
