JOB 2 - Qullan Arunaka DC

1Yaqha urusti, alaxpachankir luqtirinakapax Tatitun nayraqatapar uñstiriw jutapxäna, juchañchir angelasti jupanakamp chikaw jutarakikïna.

2Tatitusti juchañchir angelaruw jiskt'äna:

—¿Kawkitsa jumax jutaskta? —sasa.

Juchañchir angelasti sänwa:

—Nayax uraqi maysat maysa muytanïwit jutaskta —sasa.

3Ukat Tatitux juchañchir angelar jiskt'arakïna:

—¿Job luqtirixar uñjaniwaytati? Janiw khitis uraqin jupjama chiqa, aski jaqix utjkiti, jupax Tatitur axsartir jaqiwa, ñanqha lurañat jithiqtataw jakasi. Jumax ina ch'usatsa yänakapa, uywanakap tukjaykchista ukasa; jupan aski sarnaqäwipax pachpakïskiwa —sasa.

4Ukat juchañchir angelax Tatitur sarakïna:

—Mä jaqin jakañaptix jan khitis llamkt'kani ukaxa, jupatakix taqi kunas walikïskaniwa, ukampisa jaqix jakañap qhispiyasiñ laykux kuns lurakispawa.

5Jichhasti janchipar llamkt'am, ukapachaw uñjäta, kunjämtix juman ajanumar ñanqhachkätam ukxa —sasa.

6Diosasti juchañchir angelar sarakïnwa:

—Walikiwa, kunjämtix jumax munkta ukham jupampix luram, ukampis janiw jakañap apaqätati —sasa.

7Ukatsti juchañchir angelax Tatitun ukat mistuwayxasin, Job chacharux jan qullkaña llixti usumpiw usuntayäna, uka llixti usux kayuta, p'iqikamaw katuntäna.

8Ukat Job chachax qhilla taypir qunur saräna, ukatsti ñiq'i phukhu p'akit jik'illitampiw janchip jat'isïna.

9Warmipasti jupar sänwa:

—¿Jumax ukhampachas suma jaqïñ munaskaktati? ¡Diosar ñanqhacham, ukat jiwxam! —sasa.

10Job chachasti sarakïnwa:

—¡Warmi, jan ukham parlamti! Diosax apayankistu taqi uka askinak katuqstan ukasti, ¿kunatarak jan walt'añanak jan katuqkaraksnasti? —sasa.

Ukhamäkipansa Job chachax janiw arsüwipampis jucha lurkänti.

Job chachan jilat masinakapax jupar tumpt'iriw sarapxi

11Job chachan kimsa jilat masinakapaw utjäna:

Temán chiqankir Elifaz; Súah chiqankir Bildad; Naamat chiqankir Zofar ukanaka. Jupanakasti Job chachan ukham jan walt'añanakar puritap yatisin, uka llakinakapan chuymacht'añatak uñjt'ir sarañatakiw amtasipxäna.

12Job chachan ukar purisinsti, jan uñt'kaya jupar jikxatapxäna; ukham jan wali uñjasinsti jach'at jachañ qalltapxarakïna, isinakapsa llakisiñan phuqt'ataw ch'iyanuqasipxäna, p'iqinakaparus laq'ampiw willxatasipxäna.

13Ukatsti Job chachamp chikaw qunt'asipxäna. Jupanakasti paqallqu urumpi paqallqu arumampiw ukankapxäna, janirakiw mä arsa arsupkänti Job chachan t'aqhisitapan sinti jan walïtap layku.