ISAÍAS 33 - Qullan Arunaka DC

Tatitunaki suyt'äwix utji

1¡Ay, kunakïkan juma Asiria markatakixa!

¡Jumax markaxar t'unjir markätawa!

T'unjañ tukt'aykäta ukkhaxa,

jumax kipka t'unjataw uñjasïta;

ch'uxña lurañ tukt'aykäta ukkhasti,

uka kipka ch'uxña lurataw uñjasirakïta.

2Tatay, nanakat khuyapt'ayasipxita,

jumarukiw suyt'apxsma.

Sapa qhantatiy ch'ama churapxita,

jan walt'añansti yanapt'apxitaya.

3Juman axsarayañ arunakam ist'asax

markanakax jaltxapxiwa,

juman ch'amam uñjasasti

markanakax aywitatawayxapxiwa;

4uñisirinakapasti t'iju t'iju tamjamaw

jupanakxar chhukxatapxi,

qamir kankañanakapsa aparapxaraki.

5Tatitux jach'a munañaniwa,

alaxpachan jakirirakiwa;

jupaw Jerusalenarux chiqa kankañampi

chiqa uñjäwimpi phuqhanti,

6Jerusalenarusti imapuniniwa.

Yatiñ kankañamampi yatxatañamampix

mä suma qamir yänakjam qhispiyiriwa;

Tatitur axsartañasti

qamir kankañat sipansa juk'amp sumawa.

7¡Ist'am, kunjämsa wali ch'amaninakax anqan arnaqasipxi,

kunjämsa sumankañ thaqhiri khithatanakas jachapxaraki!

8Thakhinakax ch'usa wasarar tukutawa,

janirakiw khitis uka chiqa sarnaqkiti.

Arust'äwinakasa, amtäwinakas t'unasiwa,

janirakiw khititakis yäqañax utjkxiti.

9Taqiniw aka markan wali llakt'at jikxatasipxi,

Líbano qullunkir ch'uminakas q'alaw wañsuwayxi,

Sarón qhirwasti ch'usa wasarar tukutawa,

Basán chiqasa, Carmelo qullusa

q'ara qullukïxiwa.

10Tatitux siwa:

“Jichhakuchapï sartasïxa;

jach'a kankañax uñacht'ayarakïxa.

11Juma, Asirian amtatanakamasa,

luratanakamas t'unampi sasiwa;

phust'ataxasti mä ninjamaw jupanakarux nakhantani.

12Markanakasti qhillar tukuyatäniwa;

ch'aphinakar uñtataw ninampi nakharakini.

13Khitinakatix jayankapkta ukanaka,

kuntix nayax lurkta uk uñjapxam,

khitinakatix jak'ankapkta ukanaka,

ch'amaxsa uñjapxarakim.”

14Juchararanakax Jerusalén markan khathatipxiwa,

ñanqha jaqinakasti axsarañampi phuqhantatäpxiwa,

ukatsti sapxarakiwa:

“¿Khitirak jiwasanakat nakhantir nina taypin jakaspasti?

¿Khitirak wiñay nina sank'an jakaspasti?” sasa.

15Khititix chiqaparu kuns lurki, chiqa parlkaraki,

khititix ch'amampi aparas jan qamiriptkiti,

waxt'äwinak laykuki jan kuns lurkiti;

jaqi jiwayirinakan arunakapsa janirak ist'kiti,

nayranakapsa jan ñanqhanak uñjañatak ch'irmthapkaraki,

16ukakiw chiqpachansa taqi kunat imat jakani,

qarqat lurat mä suma utan samart'ani,

manq'añapas jan tukuskirïniwa,

umas janirakiw jupatak pist'kaniti.

17Reyirux wasitat jach'a kankañapan uñjäta,

markan qurpanakapasti jayakamaw purirakini.

18Kuna axsarañantix jakkäyät uk amtasisax sarakïtawa:

“¿Kawkinkarak qullqi lluch'sur jaqisti?

¿Kawkinkarak jathinak waytir jaqisti?

¿Kawkinkarak torrenak jakhur jaqisti?” sasa.

19Janiw ñanqha jaqinak taypin juk'amp jakxätati,

parlanakapas jan amuyt'kay jaqinak taypina.

20Nayan qullan utax uñtapxam,

Jerusalenarus uñtapxarakim:

¡ukan suma phunchhäwinak lurapxañäni!

Ukäwjax mä samart'añ chiqäniwa,

mä suma sayt'ayat carpar uñtata,

ch'akurunakapas suma ch'akuntata,

phalanakapas jan t'aqartkayaraki.

21Tatitux ukan jach'a ch'amap uñacht'ayani.

Jerusalén markax jach'a jawiranakanïniwa,

ukampis uñisirinakan barconakapax

janiw uka jawiranakanjam mantanipkaniti.

22-23Asiria barcon phalanakapasti

janiw suma jiyantatäkiti,

velop uskuñ lawapasti

uksar aksaruw liwinki.

Uka qamir kankañanakap q'al aparañäni,

juykhus kunatix jupar wakt'ki uk katuqani,

suchunakasti aparañaruw uskusipxani.

Tatituw chiqapar uñjirisaxa, jiwasan reyisasa,

jupaw qhispiyistani.

24Janiw khitis: “Usutätwa” siskaspati.

Tatitusti Jerusalenan jakir jaqinakan juchanakap pampacharakini.