JOSUÉ 19 - Qullan Arunaka DC

Simeón ayllun uraqipa

1Ukatsti payïri uraqix Simeón ayllunkir wila masi tamanakaruw wakt'äna. Uka uraqix Judá ayllun uraqinakap taypinkänwa,

2jupanakarusti aka markanakaw wakt'äna: Beerseba, Sebá, Moladá,

3Hasar-sual, Balá, Ésem,

4Eltolad, Betul, Hormá,

5Siclag, Bet-marcabot, Hasar-susá,

6Bet-lebaot, Saruhén, uka markanaka, taqpachax tunka kimsan markanakänwa, jisk'a markanakapamppacha.

7Ukhamarusa, En-rimón, Éter, Asán markanakampiw wakt'arakïna, jisk'a markanakapampi kuna,

8uka uraqisti aynach tuqinkir markanakänwa, jisk'a markanakapamp kuna, Ramá markakama, aynach tuqinkir wasarana. Taqi uka uraqinakaw Simeón ayllunkir wila masi tamanakaparux wakt'äna.

9Simeón ayllunkirinakan uraqinakapasti, Judá ayllun uraqinakap taypinkänwa, uka ayllun uraqinakapan wali jach'ätap layku, ukat uka uraqinakatxa mä t'aqa uraqi Simeón ayllunkir wawanakaparu churatarakïnxa.

Zabulón ayllun uraqipa

10Kimsïri uraqix Zabulón ayllunkir wila masi tamanakaparuw wakt'äna. Uraqipan qurpapax Sarid chiqakamänwa,

11uka chiqatsti qurpax inti jalanta tuqiruw saraskakïna Maralá chiqar puriñkama, Dabéset chiqa sarakipasa, ukhamarak Jocneam chiqat inti jalsu tuqinkki uka jisk'a jawirar puriñkama.

12Sarid chiqat inti jalsu tuqirusti, qurpax Quislot-tabor chiqakamaw purïna; ukawjatsti Daberat tuqiruw saräna, ukatsti Jafía chiqakamaw makhatäna.

13Inti jalsu tuqir sarasasti, qurpax Gat-héfer chiqaruw purïna, ukatxa Itá-casín tuqi saräna, ukatsti Nea chiqa muytanisax Rimón chiqakamaw purïna.

14Amsta tuqitsti, qurpax Hanatón chiqakamaw muytanïna, ukatsti Jefté-el qhirwaruw mistüna.

15Uka uraqinsti tunka payan markanakaw utjatayna, jisk'a markanakapampi kuna, ukanak taypinsti: Catat, Nahalal, Simrón, Idalá, Belén uka markanakänwa.

16Uka uraqinakawa Zabulón ayllun wila masi tamanakaparux wakt'äna, taqi markanakapampi, jisk'a markanakamppacha.

Isacar ayllun uraqipa

17Pusïri uraqix Isacar ayllunkir wila masi tamanakaparuw wakt'äna.

18Kawkïr markanakatix uka uraqinak taypinkkäna ukanakax akanakänwa: Jezreel, Quesulot, Sunem,

19Hafaraim, Sihón, Anaharat,

20Rabit, Quisión, Ebes,

21Rémet, En-ganim, En-hadá, Bet-pasés uka markanaka.

22Uka uraqin qurpapasti Tabor, Sahasimá, Bet-semes chiqanakkamaw purïna, Jordán jawiraruw tukuyäna; taqpachax tunka suxtan markanakänwa, jisk'a markanakapamppacha.

23Uka uraqinakawa Isacar ayllunkir wila masi tamanakaparux wakt'äna, taqi markanakampi, jisk'a markanakapamppacha.

Aser ayllun uraqipa

24Phisqïri uraqix Aser ayllunkir wila masi tamanakaparuw wakt'äna.

25Jupanakan uraqinakapax akanakänwa: Helcat, Halí, Beten, Acsaf,

26Alamélec, Amad, Misal uka markanaka, ukatsti inti jalanta tuqirux Carmelo sat qullukama, Sihor-libnat chiqakamarakiw purïna.

27Inti jalsu tuqitxa, qurpax Helcat chiqat sartasin amsta tuqirux Bet-dagón chiqakamaw saräna, Zabulón ayllun uraqip chiqa sarasinsti, Jefté-el, qhirwa chiqa saräna, Bet-émec, Neiel chiqakama, ukatsti Cabul,

28Abdón, Ebrón, Rehob, Hamón, Caná chiqa sarakipäna, Sidón jach'a markar puriñkama.

29Uka chiqatsti qurpax Ramá tuqiruw muytanïna, ukatsti Tiro sat suma uyuchrantat markakamaw purïna, ukatxa Hosá tuqiruw saraskakïna, Mediterráneo jach'a qutar mistuñkama. Uka markanak taypinsti Mahaleb, Aczib,

30Umá, Afec, Rehob uka markanaka, taqpachax pä tunka payan markanakänwa, jisk'a markanakapamppacha.

31Aka uraqinakaw Aser ayllunkir wila masi tamanakaparux wakt'äna.

Neftalí ayllun uraqipa

32Suxtïri uraqix Neftalí ayllunkir wila masi tamanakaparuw wakt'äna.

33Uraqipax amsta tuqin Hélef markat qalltäna, Saanamim jak'ankir jach'a quqa chiqa sarakipasa, Adamí-néqueb, Jabneel uka markanak chiqa saräna, Lacum chiqakama, ukatsti Jordán jawirar puriñkama.

34Aynach tuqi qurpax Jordán jawirat qalltäna; ukatsti inti jalanta tuqit Aznot-tabor markakamaw purïna, ukawjatsti amsta tuqiruw muytäna, Zabulón ayllun qurpapanjam saraskakïna, Hucoc markar puriñkama. Ukatxa saraskakïnwa, inti jalanta tuqirusti, qurpapax Aser ayllun uraqipampiw qurpasïna, inti jalsu tuqirusti Jordán jawirampiraki.

35Suma uyuchrantat markanakatxa, akanakaw wakt'äna: Sidim, Ser, Hamat, Racat, Quinéret,

36Adamá, Ramá, Hasor,

37Quedes, Edrei, En-hasor,

38Irón, Migdal-el, Horem, Bet-anat, Bet-semes uka markanaka, taqpachax tunka llätunkan markanakänwa, jisk'a markanakamppacha.

39Uka uraqinakaw Neftalí ayllunkir wila masi tamanakaparux wakt'äna, taqi jach'a markanakampi, jisk'a markanakapamppacha.

Dan ayllun uraqipa

40Paqallqüri uraqix Dan ayllunkir wila masi tamanakaparuw wakt'äna.

41Aka uraqinsti Sorá, Estaol, Ir-semes,

42Saalbim, Aialón, Jetlá,

43Elón, Timnat, Ecrón,

44Eltequé, Guibetón, Baalat,

45Jehúd, Bené-berac, Gat-rimón,

46Mejarcón, Racón markanakaw ukankäna, Jope marka uñkatasinkki uka uraqimppacha.

47Ukampis uka uraqinakan jupanakatak pisïtap laykux, Dan ayllunkirinakax Lésem markaruw nuwantiri sarapxäna, uka markan jakir jaqinakar taqiniru jiwarayasinsti uka marka katuntasipxäna, ukhamat uka markan utjantasipxäna, uka markan sutipsa jaqukipapxänwa, Dan sutimpi uchasa, nayra awkipat amtasina.

48Uka uraqinakaw Dan ayllunkir wila masi tamanakaparux wakt'äna, taqi markanakampi, jisk'a markanakapamppacha.

Josué chachan uraqipa

49Israelitanakax sapaqat ayllur uraqinak lakinuqañ tukuyxapxän ukkhasti, Josué chacharuw uraqipa churxapxarakïna, jupanakan uraqinakap taypiru.

50Kunjämtix Tatitux siskatayna ukhamarjamaw, Josué chacharux Timnat-sérah marka churapxäna, Efraín ayllun qullunakap tuqiru, Josué chachaw uka uraqi mayitayna. Josué chachasti uka marka wasitat sayt'ayäna, ukan jakasxarakïna.

51Taqi uka uraqinak Eleazar sacerdotempi, Josué chachampi, markan jilïr jaqinakapampix Siló chiqan suertetkam israelitanakan ayllunakaparux churäna, Dios nayraqatana, Tatitump Jikisiñ Carpa mantañana. Ukhamaw uraqinak lakinuqañax tukuyatäxäna.