ISAÍAS 59 - Qullan Arunaka DC

Israelan jucha luratapampi, mutuyäwipampi

1Tatitux qhispiyañatakix taqi ch'amaniwa,

ist'añatakis jank'akirakiwa.

2Ukampisa jumanakan ñanqha luratanakamasti,

mä pirqjamaw Tatitut jaljtayapxtam;

jumanakan juchanakam laykuw

Tatitux jinchunakapsa llupantasi,

janirakiw ist'añsa munapktamti.

3Jaqinak jiwarayapxatanakamatxa,

amparanakamax wilararkamakiwa;

jumanakax k'ari parlirkamakïpxtawa,

ñanqha arunak parlirkamaki.

4Janiw khitis aski amtampix

jucha taripir nayraqataparux uñstkiti,

jucha t'aqaña chiqanakansa

janiw chiqapar uñjañax utjkiti.

Jan ukasti k'ari arunakaruw jaysapxi,

janirakiw khitis chiqap arskiti.

Ñanqha lurañampi phuqhantatäpxiwa,

ukham tukutapunïpxiwa.

5Katari k'awnanakxaruw wallpar uñtat jipipxi,

kusikusir uñtataw simpanakap wakichasipxi;

uka k'awnanak manq'antirix jiwiwa,

maynitix uka k'awna phallaychixa,

jiwayir katarinakaw ukanakat mistu.

6Uka simpanakampisti janiw kuna isis luraskaspati,

janiw khitis jupanakan sawutanakapampix isiskaspati.

Luratanakapax ñanqhakamakiwa,

amparanakapasti jaqir nuwañak munasipki,

7kayunakapax ñanqha tuqirukiw jalañ munaski,

jan juchan jaqinakar jiwayiriw jank'ak jalaski.

Amtañanakapansti jaqi jiwayañanakak amtasipki,

kawki chiqtix sarapki uka chiqanakansti t'unjatäñakiw utjaski.

8Janiw sumankañ thakhi uñt'apkiti,

luräwinakapansti janiw chiqa kankañax utjkiti.

Thakhinakapasti maysar q'iwinukutkamakiwa;

uka thakhinjam saririnakasti janiw samarañ jikxatapkiti.

9Uka laykuw qhispiyasiñax jiwasat jayarst'awayxi,

qhispitäñasti janiw jiwas jak'ankxiti;

qhanan jakañ suyt'ayätanxa,

ukampis ch'amakanak jikxatastanxa.

10Mä juykhur uñtatakiw pirqar katt'asis sarnaqtanxa,

janis nayranïksna ukhama;

chika urunsti arumäkaspas ukham lanktasaw sarnaqtanxa;

k'umaräkasinsa, jiwatäksnas ukhamätanwa.

11Taqi jiwasanakasti osonakar uñtataw warartanxa,

palomanakar uñtataw ayquraktanxa;

qhispiyasiñ suyt'asktanxa, ukampis janiw purinkiti;

qhispitäxañ suyt'asktanxa, ukampis jayankaskiwa.

12Nanakaw jumarux chuyma wal usuyapxsma,

pachpa juchanakaxaw juchañchasipkitu;

nanakan jucha luratanakaxasti nanak chikawa,

ñanqha luratanakaxsti uñt'asipxaraktwa.

13Tatitutakiw sayt'astanxa,

chuymanakasansti janiw jupatakjamäktanti,

Tatitusarusti janiw arkañ munkäyätanti,

jaqir nuwañampita, jan wali lurañampitak parlaskäyätanxa,

mayninakar sallqjañatakikiw amtaskäyätanxa.

14Kunatix chiqapar uñjañäki ukasti jisk'achjatänwa,

kunatix chiqapäki ukasti jiwasat jayankiwa,

chiqa kankañax uraqir willtatjamawa;

janiw chiqa lurañax utjkxiti,

15Chiqa chuymanïñax janiw utjkxiti,

khititix aski lurki ukaruxa,

kunatix jupan utjki ukas aparatawa.

Tatitusti jan chiqa kankañ utjatapatxa

mayjt'asxarakiwa.

16Tatitusti musphataw uñjasi

jan khitis aka ñanqha lurañ chiqachañ munatapatxa;

ukat pachpa ch'amapampix sarti,

atipjañsti jupa pachpaw jikxataraki.

17Atipjañampisti mä jark'aqasiñampjamaw isthapisi,

qhispiyasiñampix p'iqipar mä cascompjamaw asxatasi,

phuqsusiñampisti mä isimpjamaw isthapisi,

phiñasiñapampisti mä jach'a isimpjamaw llawuntasi.

18Tatitux sapa mayniruw luräwipatjam churani,

uñisirinakaparux mutuyaniwa.

Jupar uñisirinakarusti wakisitaparjamaw churani;

quta tuqi markanakan utjirinakarus uka kipka churani.

19Tatitun ch'amap uñjasaxa,

taqi markanakaw axsarañat khathatipxani.

Tatitusti walja umani jawirar uñtataw jutani,

mä jach'a ch'amani thayan unxtayataraki.

20Tatitux Jerusalén markan jakirinakar qhispiyiriw jutani,

juchanakapat kutikipstanipki

uka israelitanakar qhispiyiriw jutani.

Tatituw ukham arsu.

21Tatitux siwa:

“Nayaw jumanakampix mä arust'äwi lurta,

arsuraktwa, ch'amaxasa,

yatichäwinakax churapksma ukanakasa,

janipuniw jumanakatxa juk'ampi jayarst'kxaniti,

janirakiw wawanakamatsa jayarst'kxaniti,

ukanakasti wiñayatakipunïniwa” sasa.