1Josiasan yuqapa, Joacín reyix Judá uraqi apnaqañ qalltkän ukapachasti Tatitux Jeremiasaruw parli,
2akham sasa: “Templon anqäxapar sayt'asim, ukatsti kuntix Judá markanakat sisksma ukanak khitinakatix templor yupaychir jutapki ukanakar yatiyam. Janipun mä arsa imaqamti.
3Ist'apxätam ukasti, jan wali luratanakapsa apanukupxani ukkhasti, janiw jupanakarux kunjämtix amtkäyäta ukham mutuykxäti.
4Jupanakarusti naya, Tatitun arsutax sarakim: ‘Janitix nayar ist'apkitani, janiraki kuna yatichäwinaktix nayax jupanakar siskta ukanaksa phuqhapkani,
5nayar luqtir profetanakan arunakaparus janirak ist'apkani, uka profetanaksti nayax mayamp mayampi khithanta, jumanakasti jupanakarux janiw ist'apktati,
6ukhamasti nayax kunjämtix Siló chiqankir templorux lurktxa, ukhamarak jichhax Jerusalenankir templorux lurä. Aka markarusti taqi akapachankir markanakatakix mä uñtaskaña ñanqhacharakï.’ ”
7Jeremiasax Tatitun utapan ukham yatiyäna, sacerdotenakasa, profetanakasa, uka markan taqi jakirinakasa ist'apxarakïnwa.
8Ukatsti jupax taqi kuntix Tatitux parlañapatak churkatayna uka arunak parlañ tukuyxän ukkhasti, sacerdotenaka, profetanaka, uka markan jakirinakasa Jeremiasar katuntasin sapxäna “¡Jumax jiwätawa!
9¿Kamisarak jumasti Tatitun sutipxar parläta, aka Tatitun utapax kunjämatix Siló chiqankir templox t'unjatäkän ukhamäniwa, aka Jerusalén markas t'unjatarakïniwa, jan jaqiniw qhiparani sasasti?” sasa. Ukatsti taqi jaqinakaw Jeremiasar katuntañatakix muyuntapxäna.
10Judá uraqinkir jach'a jilïrinakasti, ukanak ist'asinxa, reyin utapatxa Tatitun utaparuw sarapxäna, ukansti Machaq Punku sata chiqaruw qunt'asipxäna.
11Ukatsti sacerdotenakasa, profetanakasa, uka jach'a jilïrinakaru, ukhamaraki taqi jaqinakaruw sapxäna: “Aka jaqin aka markat jan wal parlatapatxa, jiwayatäñapawa. Jumanak pachpaw ukham parlatap ist'apxtaxa” sasa.
12Jeremiasasti jilïrinakampiru, taqi jaqinakampiruw parläna, akham sasa: “Tatituw nayarux sutipxar parlañaxatak khithanitu, aka uta tuqi, ukhamarak aka marka tuqi kuntix jumanakax ist'apkta taqi ukanak yatiyañaxataki.
13Ukhamax sarnaqäwinakama, luräwinakamsa askichasipxam, jumanakan Tatitu Diosamaruk ist'apxam, ukatsti Tatitux janiw kuna jach'a t'aqhisiñanaktix arski ukanak apayanipkätamti.
14Nayax jumanakan amparamanktwa, kuntix nayar lurañ munapkista uk lurasipkakita.
15Ukampis ak sum yatipxam: Jumanakatix nayar jiwayapxitätaxa, taqi aka markankir jaqinakasa, jumanakasa mä jan juchan jaqir jiwayapxatamatxa, juchañchatäpxätawa, chiqpachansa Tatituw nayarux khithanitu taqi akanak jumanakar yatiyiri.”
16Ukhamasti jilïrinakampi, jaqinakampisti sacerdotenakaru, profetanakaruw sapxarakïna: “Aka jaqir jiwayañatakix janiw kuna juchas utjkiti, Tatitu Diosan sutipxaruw jiwasarux parlaskistu” sasa.
17Ukatsti mä qawqha jilïr chuyman jaqinakaw sartasisin, ukan tantacht'at markarux sapxarakïna:
18“Ezequiasax aka Judá uraqi apnaqkän uka urunakanxa, Moréset sat chiqat jutir Miqueasaw Tatitun sutipxar taqi jaqinakar yatiyäna, akham sasa:
‘Taqi ch'aman Tatitux akham siwa:
Sión qullux mä qhullinukut yapjamaw qhiparani,
Jerusalenasti laqayanakjam mayjar willthapitaw uñjasini,
Tatitun utapax utachatäki uka qullusti,
quranakampi phuqhantataw uñjasini’ sasa.
19“Miqueas profetax ukham siskchïna ukasa, juparux janiw jiwayapkänti. Jan ukasti, reyisa, markankirinakasa taqiniw Tatit nayraqatan llamp'usipxäna, Tatitusti jupanakarux pampacharakïnwa. Ukampis jiwasatix Jeremías profetar jiwayañänixa, Tatitux ukham luratasat mutuyistaniwa” sasa.
20Semaiasan yuqapa Urías profetax, khititix Quiriat-jearim sat markan jakkäna ukasa, Jeremías profetjamarakiw Tatitun sutipxarux parläna, Jerusalén markataki, ukhamaraki uka uraqin jan walt'añapsa.
21Joacín reyisa, taqi jilïr yanapirinakapasa kuntix uka profetax siskäna uk ist'apxarakïnwa, ukat reyix jiwayañ munäna. Ukampis Urías profetax uk yatisinxa, axsarañat Egipto markaruw jaltxäna.
22Ukampis Joacín reyix Acbor sat jaqin Elnatán sat yuqapampiru, yaqha jaqinakampiruw Egipto markar khithäna, Urías profetar thaqhanipxañapataki,
23jupanakasti Urías profetar Egiptot irptanisinxa, Joacín reyin amparaparuw katuyapxäna, reyisti uka profetan jiwayatäñapatakiw arsüna, ukatsti janchipax mä jach'a p'iyar jaquntatäñapatakiw mayirakïna.
24Ukampisa, Safán jaqina Ahicam sat yuqapaw Jeremías profetat arxatasis parläna, Jeremiasax markan amparapan jan jiwayat uñjasiñapataki.
Who We AreWhat We EelieveWhat We Do
2025 by iamachristian.org,Inc All rights reserved.
