DEUTERONOMIO 22 - Qullan Arunaka DC

1“Jumanakat maynitix jilaman vacapsa, ovejapsa chhaqhat uñjapxäta ukasti, janiw jan uñjir tukupxätati, jan ukasti irpasin jilaman ukaruw jaytanxapxäta.

2Ukampisa uywanitix jan marka masimäkchi, janirak jumax jupar uñt'kstati, ukapachax uka uywarux utamaruw irpäta, uywasti marka masiman tumpasiñapkamaw ukankani, tumpasxani ukapachaw jumax katuyxäta.

3Uka pachparak asnopampisa, isipampisa, chhaqhat yänak jikxatapkät ukanakampis lurapxäta, janiw jan uñjir tukupxätati.

4“Jumanakat maynitix marka masipan asnoparu, vacaparusa thakhin liwitattata uñjani ukkhax, janiw maysa uñtas sarakipawayätati, jan ukasti sayt'añapatakiw yanapt'äta.

5“Mä warmisti janiw chacha isimpi uchasiñapäkiti, mä chachas janirakiw warmi isimpi uchasiñapäkiti, ukanak lurañasti Tatitutakix axtaskañawa.

6“Maynitix thakhi sarkasin mä quqansa, jan ukax uraqinsa mä jamach'in tapap jikxatanixa, uka tapansti tayka jamach'ix jamach'i qallunak patana, jan ukax k'awna patan jipiskchi ukax, janiw taykapamppach jamach'i qallunak apasiñapäkiti;

7jan ukasti, jamach'i qallunakak apasiñapa, tayka jamach'irusti antutnukxañapawa. Ukham lurapxäta ukax walja maranakaw kusisit jakapxäta.

8“Jumanakat maynitix mä machaq uta utachasini ukapachaxa, uta patarux mä pirqampiw muyuntayañapa; jan khitin uka patat jalaqtasin jiwaskañapataki; ukhamat wila masinakapan juchañchat jan uñjasiskañapataki.

9“Jan jumanakax uva yapunakamar yaqha jathanak satapxamti; ukham satapxasma ukasti, yapuchkta ukasa, uva yapumas taqpachaw qullanat uñt'atäxaspa.

10“Janiw yapunakam asnompi vacampi yapthapis qhullipxätati.

11“Janiw t'arwampi, linompi kittata p'itat isinak uchasipxätati.

12“Janxatasiñ isimarux pusi thiyanakapar chhaxchhanakan t'ikhanak uchapxäta.Sapak jakañxat kamachinaka

13“Mä chachatix mä warmir warmipäñapatak irptasini, ukat warmisxatatsti janirak uka warmir munkxaniti ukasti,

14jupamp jaljtañatakisti k'ari arunakak thaqhaspa, jaqinak nayraqatan ‘Sallqjituwa’ sasa, jan wal uñjayañatakisti akham parlarakispa: ‘Nayax aka warmimpiw jaqichasta, ukampis jupamp ikintxasinxa jupan chacha uñt'irïtap jikxatta’ sasa.

15Ukat tawaqun awkipampi, taykapampix markan jilïrinakapan ukar sarasin, phuchhapan chacha jan uñt'irïtap uñacht'ayapxani.

16Ukapachasti tawaqun awkipax jilïrinakaruw sani: “Nayaw phuchhaxarux aka jaqin warmipäñapatak churta, jichhasti jupax janiw wawaxar munkxiti,

17jan ukasti jupax jan walinakak wawaxat parli, akham sasa: ‘Sallqjituwa, chacha uñt'ir tawaqütaynawa’ sasa, ukampis phuchhaxan chacha jan uñt'irïtap uñacht'ayä” sasa. Uk sasin warmin awkipax jilïr jaqinak nayraqatan ikiñapan wilararätap uñacht'ayani.

18Ukat jilïrinakax uka jaqir katuntasin mutuyapxani, warmipar k'arintatapata,

19ukhamarusa, uka jaqix warmipan awkiparux patak qullqi churañapaw wakt'ani, mä israelita aski warmit jan wal parlatapata. Uka jaqisti janiw warmipar irpanukkaniti, jan ukasti jupampix jakaskakiniwa.

20“Ukampis uka tawaqutix chacha uñt'irïsin jaqichaschi ukaxa,

21ukapachax markankir jaqinakaw awkinakapan utapat jupar irpsunipxani, ukatsti ukarpachaw qalampi k'upjasin jiwayapxani, jupan mä jach'a jucha Israel markan luratapata, awkipan utap p'inqachayatapata. Ukhamat jumanak taypin jan wali lurañanak tukjapxäta.

22“Mä chacharutix chachan warmimpi ikintatäskir katjatänixa, panpachaniw juchañchasin jiwayatäpxani. Ukhamat jumanakax Israel markan jan wali lurañanak tukjapxäta.

23“Chacha jan uñt'ir mä tawaqutix jaqichasiñatak parlatanïchi, ukatsti yaqha chacharak uka tawaqur markan jikxatasin jupamp ikintani ukax,

24panpachaniw markan jilïrinakap nayraqatar irpat uñjasipxani, uka jilïrinakasti qalampi k'upjasa jiwayatäpxañapatakiw juchañchapxani, tawaqurux markankkasin jaqinakar yanap jan mayitapata, chacharusti jaqi masipan warmipar p'inqachatapata. Ukhamat jumanak taypin ñanqha lurañanak tukjapxäta.

25“Ukampisa mä jaqitix jaqichasiñatak parlatani mä tawaqur pampan jikxatani, ukatsti munkir jan munkir jupamp ikintani ukkhasti, chacha sapakiw uka warmimpi ikintatapat jiwayat uñjasini,

26tawaqurusti janiw juchañchatäkaniti, jupasti jiwayatäñatakix janiw kuna juchsa lurkiti. Uka jaqin luratapasti kunjämatix mä jaqix mayni jaqi masipar jiwayañatak jikxatki ukhamawa;

27uka jaqix tawaqurux sapak pampan jikxatäna, uka tawaqux qawqhas warariskasapänwa, janiw khiti arxatiris utjkasapänti.

28“Mä jaqitix chacha jan uñt'ir mä tawaqur jikxatani, ukatsti uka tawaqux janirak jaqichasiñatak kuna parlatanïkanisa, ukatsti munkir jan munkir uka jaqix jupamp ikintani, ukatsti jupanakax katjayasipxarakin ukapachasti,

29uka jaqix phisqa tunka qullqi tawaqun awkiparux churani, uka tawaqur p'inqachatap laykusti, jupampiw jaqichasini, taqi jakañapan janiw uka warmimpix jaljtañapäkiti.

30 30 (1) “Janiw khiti jaqis awkipan warmipampix ikintañapäkiti, ukham lurasasti kipka awkiparuw p'inqachaski.