1Joasax paqallq maranïkän ukkhaw Judá marka apnaqañ qalltäna, ukatsti Jerusalén markanxa pusi tunka maraw marka apnaqäna. Taykapax Sibiá sutinïnwa, jupax Beerseba chiqankirïnwa.
2Joiadá sacerdoten jakañapkamasti, Joás reyin luräwinakapax Tatit nayraqatan wali askïnwa.
3Joiadá sacerdotex juparux pä warmimpiw jaqichäna, uka pani warminakapampix Joás reyix yuqanakani, phuchhanakanïnwa.
4Ukat mä qawqha maranak qhipatsti, Joás reyix Tatitun utap askichañ amtäna,
5uk lurañatakisti jupax sacerdotenakaru, levitanakaruw jawsayäna, jupanakarusti sänwa: “Judá uraqinkir markanakar sarapxam, ukatsti Israelit jaqinakat qullqinak apthapinipxam, Diosan utap sapa mara askichañataki. Ukhamasti uk lurañatakix jank'ak sarapxam” sasa. Ukampis levitanakax janiw mäki uk lurapkänti.
6Ukat Joás reyix Joiadá jach'a jilïr sacerdoter jawsayanïna, juparusti sänwa:
—¿Kunatarak levitanakar Judá, Jerusalén muytayiri jan khitktasti, kunjämtix Tatitun Moisés luqtiripasa, Israel markasa Tatitun utapatak churañ amtapkän uka yanapanak markanakat apthapipxañapatakisti? —sasa.
7Atalía warmix mä ñanqha warmïnwa, jupan arkirinakapax Tatitun utapar mantasinxa taqi yänakap apsunipxatayna diosanakapar ukanakampi yupaychañataki.
8Ukatsti reyix mä arca lurayäna, uksti Tatitun utap punku jak'aruw uchayäna.
9Ukatsti Judá uraqpachana, Jerusalenana Tatitutak yanapanak apanipxañapatakiw yatiyapxäna, kunjämtix Tatitun luqtiripa Moisesax, Israel jaqinakar wasaran arsuwaykatayna ukhamarjama.
10Uk ist'asasti jilïrinakaxa, taqi jaqinakas wali kusisitaw churäwinakap arcar phuqt'ayañkam apanipxäna.
11Levitanakasti reyin ukaruw jupan uñxatañapatak uka arca apapxäna; ukatxa arcan walja qullqi utjatap uñjasax, reyin qillqiripampi, jilïr sacerdoten khithapampix, arcat qullqi apsuriw jutapxäna, ukatsti wasitat uchañapawjar arca uchapxäna; jupanakasti sapüruw ukham lurapxäna, jilarkir qullqi apthapisa.
12Reyimpi, Joiadá sacerdotempisti Tatitun utap lurañatak chhijllatäpki ukanakaruw uka qullqi katuyapxäna, jupanakan Tatitun utap askichayañataki, qala ch'iyirinaka, lawat yänak luririnaka, hierrota, bronceta yänak luririnak jikxatanipxañapataki.
13Lurayañatak chhijllata chachanakasti irnaqañ qalltapxäna, Diosan utap askichañanxa jupanakan luratanakapax askiruw saräna, kunjamäkäntix qalltanxa ukhama, ukatxa sum tukuyapxäna.
14Kunapachatix tukuyxapxän ukkhasti, uka qullqi jilt'anak reyin ukaru, ukhamarak Joiadá sacerdoten ukaruw apxapxäna, jupanakasti uka qullqimpix Tatitun utapatak yänak lurayapxäna, yupaychäwinakan luqtañataki, nakt'at wilañchanakataki, ukatsti wisllanaka, qurita, qullqita lurat yaqha yänakamp lurayapxäna. Joiadá sacerdoten jakañapkamasti, Tatitun utapan nakt'at wilañcha luqtäwinakax utjapunïnwa.
15Ukampis Joiadá sacerdotex wali chuymankamaw jakawayäna, jiwxäna ukapachasti, jupax pataka kimsa tunkani maranïnwa;
16juparux Davidan Markapan imt'xapxäna, reyinak thiyaru, Israel markataki, Diosataki, utapatakisa wali askinak luratap layku.
17Joiadá sacerdoten jiwxatapatsti, Judá uraqinkir jilïrinakax purinisin reyirux suma jach'achasaw aruntapxäna. Reyisti jupanakan iwxanakaparux ist'änwa,
18jupanakax Tatitun utapata, nayra awkinakapan Diosapat armasxapxänwa, ukatsti Astarté diosan uñtasitanakaparu, yaqha diosanakampiruw yupaychxapxäna. Tatitusti uka jucha luratanakapat Judá, Jerusalén markanakatakix q'apisïnwa.
19Ukampisa, Tatitux profetanak khithanïna, jupan ukar kutt'anxapxañapataki. Jaqinakasti janiw profetanakan iwxa arunakaparux ist'apkänti.
20Ukapachaw Diosan ajayupax, Joiadá sacerdoten Zacarías yuqapar yatiyäna. Jupasti mä tarim patar sayt'asisin markarux akham säna: “Diosax akham siwa: ‘¿Kunatarak jumanakasti kamachi arunakaxarjam jan sarnaqapktasti? ¿Kunatarak jumanak pachpa jan walt'añanak thaqhasipxtasti? ¡Jumanakan nayar apanukupxatamatxa, nayax jumanakarux apanukupxarakïmawa!’ ” sasa.
21Ukampis jaqinakax mayacht'asisin jupatakiw sayt'asipxäna, ukatsti reyin arupar ist'asaw Tatitun utap anqäxan qalamp k'upjaskam jiwayapxäna.
22Joás reyix Zacariasana Joiadá awkipan jupar askinak luratapat janiw amtaskxänti, ukatsti Zacarías yuqaparux jiwayänwa, jiwkäna ukkhasti Zacariasax akham arsuwayäna “¡Nayar akham lurapxatamat Tatituy jumanakarux mutuypan!” sasa.
23Ukat mä mararusti, siriankir ejercitox Joás reyiruw nuwantir jutäna, ukatsti Judá, Jerusalén ukakam jutantasinxa, uka markan jilïrinakaparux q'al tukjäna, taqi yänakap aparasasti Damasconkir reyin ukaruw apayapxäna.
24Sirio markan ejercitopax mä juk'a tama soldadonakakïkchïna ukasa, Tatitux mä jach'a ejército jupanakan amparaparux katuyäna, jupanakan nayra awkinakapan Tatit Diosapar apanukupxatap layku. Ukhamaw Joás reyix mutuyäwi katuqasax t'aqhisïna.
25Sirio ejercitox sarxäna ukkhaxa, Joás reyirux wali usuntat jaytawayäna, jilïr jaqinakapasti jan walinak amtasin pachpa ikiñaparuw jupar jiwayapxäna, ukhamat Joiadá sacerdoten yuqapan jiwatap phuqsusisa. Ukatsti Davidan Markaparuw imt'xapxäna, ukampis janiw reyinakan amay imäwiparux imapkänti.
26Jupa tuqi jan wali amtirinakax akanakänwa: amonita Simat chachan Zabad yuqapa, ukhamarak moabita Simrit chachan Jozabad yuqapa.
27Joás reyin wawanakapxata, jupatak profecía arunak arsutanakxata, Diosan utap askichayatapatxa, taqi ukanakax reyinakan luräwinakapan qillqatankiwa. Ukatsti jupa lantix, Amasías yuqapaw marka apnaqxäna.
Who We AreWhat We EelieveWhat We Do
2025 by iamachristian.org,Inc All rights reserved.
