2 CRÓNICAS 29 - Qullan Arunaka DC

Ezequías reyin Judá marka apnaqatapa(2 R 18.1-3)

1Ezequiasax pä tunka phisqan maranïkän ukkhaw Judá marka apnaqañ qalltäna, jupasti Jerusalén markanxa pä tunka llätunkani maraw marka apnaqäna. Jupan taykapax Abí satänwa, Zacarías chachan phuchhaparakïnwa.

2Ezequiasan luratanakapax Tatit nayraqatan chiqapänwa, kunjämatix David nayra awkipan luräwinakapax chiqapäkäna ukhama.

3Marka apnaqañ qalltkäna uka mara qallta phaxsinxa, jupaw Tatitun utapan punkunakap jist'arayäna, ukatsti askichayarakïna.

4Ukatxa sacerdotenakampiru, levitanakampiruw jawsayäna, utat inti jalsu tuqin utjir plazaruw tantacht'äna,

5jupanakarusti sänwa: “Levitanaka, ist'apxita: jichhpach q'umachasipxam, nayra awkinakaman Tatit Diosapan utap qullanañchapxarakim. Qullan chiqawjat taqi kunatix q'añüki ukanak apsupxam.

6Jiwasan nayra awkinakasax janiw chiqapar sarnaqapkänti, luratanakapas Dios Tatitusan nayraqatapan janiw askïkänti, ukatsti juparux apanukupxänwa. Jupanakasti Tatitun utjäwiparux jisk'achapxänwa, jan uñjiriw tukupxäna.

7Mantañ punkunaksa jist'antapxänwa, lamparanaksa jiwt'ayapxänwa, ukatsti incienso nakhayañanaksa apanukupxänwa, Israelan Diosapan qullan chiqawjan nakt'ata luqtañanaksa armasipxänwa.

8Ukat Tatitux Judá, Jerusalén markanakatakix q'apisïna, ukatsti wali mulljkaña, wali axsarkañaruw tukuyäna, kunjämtix jumanakax pachpa nayranakamampi uñjapkta ukhama.

9Ukat awkinakasax nuwasïwin jiwarapxäna, yuqanakasasa, phuchhanakasasa, warminakasasa katuntat apatarakïnxa.

10Nayax Israelan Tatit Diosapampi mä suma arust'äwir mantañatakiw amtasta, ukhamat q'apisiñapa jiwasat apaqañapataki.

11Jichhasti wawanakaxay, jan jayrasipxamti, Tatituw jumanakarux ajllisipxtam, jupan arsutanakapar phuqhapxañamataki, nayraqatapan irnaqapxañamataki, jupar incienso luqtapxañamataki” sasa.

12Kawkïr levitanakatix reyin arunakap ist'asin, ukspacha irnaqañ qalltapkäna ukanakax akanakänwa: Quehat chachat saraqir wawanakapatxa, Amasai chachan Máhat yuqapa, Azarías chachan Joel yuqapampi; Merarí chachan wawanakapatsti, Abdí chachan Quis yuqapa, Jehaleel chachan Azarías yuqapampi; Guersón chachan wawanakapatsti, Zimá chachan Joah yuqapa, ukat Joah chachan Edén yuqapampi;

13Elisafán chachan wawanakapatsti, Simrí, Jehiel ukanaka; Asaf chachan wawanakapatsti, Zacarías, Matanías ukanaka;

14Hemán chachan wawanakapatsti, Jehiel, Simí ukanaka; Jedutún chachan wawanakapatsti, Semaías, Uziel ukanakaraki.

15Jupanakasti nayraqatax wila masinakaparuw tantachapxäna, ukat taqiniw q'umachasipxäna; uka qhipatxa Tatitun utapa q'umachiriw mantapxäna, kunjämtix reyix Tatitun iwxa arunakaparjam siskatayna ukhamarjama.

16Ukatsti sacerdotenakax Tatitun utap manqharuw q'umachañatak mantapxäna. Jupanakax kuna q'añunaktix uka manqhan jikxatapkäna ukanakxa, uta anqäxaruw apsunipxäna, levitanakasti ukanakxa Cedrón jawiraruw apxapxäna.

17Jupanakasti qallta phaxsina, nayrïr uru saraqataruw q'umachañ qalltapxäna, kimsaqallqüri uru saraqatarusti, Tatitun utapa punkupkamaw q'umachas puripxäna. Ukat ukxar Tatitun utapsti, yaqha kimsaqallq urun q'umachapxäna; tunka suxtan uru saraqatarusti Tatitun utap taqpach q'umachañ tukuyxapxäna.

18Ukatsti Ezequiasan reyi utapar mantasinxa, jupar akham sapxäna: “Nanakax Tatitun utap taqpach q'umachxapxta: nakt'ayat waxt'äwinak luqtañ altara, taqi yänakapamppacha, luqtat t'ant'anak uchañ mesa, taqi yänakapamppacha.

19Ukatsti kuna yänaktix Ahaz reyix Tatitur jan sum arkatap laykux apanukkatayna taqi ukanak q'umachapxta, Tatitun altarap nayraqataruw uchapxarakta” sasa.

20Ezequías reyisti qhipürux wali willjtat sartasïna, markankir taqi jilïrinakar tantacht'asinsti, jupanakampiw Tatitun utapar saräna.

21Jupanakax paqallqu vaca qallunaka, paqallqu urqu ovejanaka, paqallqu mä maran ovejanaka, paqallqu cabritonak apapxäna, reyin utapankirinakapan juchanakapata, Tatitun utapata, Judá markan juchanakapat mä waxt'äwi luqtañataki. Reyisti Aarón chachat saraqir sacerdotenakaruw uka uywanak churäna, Tatitun altarapan nakt'at wilañcha luqtapxañapataki.

22Sacerdotenakasti vaca qallunak jiwarayapxäna, wilanakap aptasinxa altararuw ch'allakipapxäna. Ukxarusti urqu ovejanakampi, mä maran urqu ovejanakampix uka kipkarak lurapxäna.

23Ukatsti juchat waxt'äwi luqtañ cabritonakxa reyin ukaru, ukhamarak jaqinakan nayraqataparuw apapxäna, jupanakasti amparanakap uywanakxarux luqxatapxäna.

24Ukxarusti sacerdotenakax uka uywanak kharirapxäna, wilapampisti altarxaruw ch'allakipapxäna juchata mä waxt'äwi luqtasa, taqpach Israelan juchanakapat pampachäwi jikxatañataki, reyiw mayitayna Israel markpachataki nakt'at wilañchanakax luqtatäñapataki.

25Ezequiasasti Tatitun utapanxa levitanakaruw utt'ayäna, platillonakampi, salterionakampi, citaranakampi yupaychapxañapataki, kunjämtix David, Gad, reyin amuyt'ayiripa profetasa, Natán profetasa arskatayna ukhamarjama. Uka lurañsti Tatituw profetanakap tuqi churatayna.

26Levitanakasti sayt'atkamäpxänwa, Davidan toct'añ yänakapampi, sacerdotenakasti trompetanakampirakïnwa.

27Ukapachaw Ezequiasax altarxaru nakt'at wilañcha waxt'äwinak luqtayäna. Ukatxa nakt'at wilañcha waxt'äwinakamp qalltkasasti, q'uchunakampiw Tatitur yupaychañ qalltapxarakïna, trompetanakan phust'atapampi, David reyin toct'añ yänakapamp chika.

28Jaqinakax killt'atkamaw yupaychapxäna, ukchañkamax q'uchurinakax q'uchupxänwa, sacerdotenakasti trompetanak phust'apxarakïna. Ukham jupanakax lurapxäna, nakt'ata luqtäwi tukusiñapkama.

29Kunapachatix ukax tukuyxän ukkhasti, reyisa, khitinakatix jupampïpkän ukanakasa, killt'asisaw yupaychapxäna.

30Ukatsti Ezequías reyimpi, jilïr irpirinakampix, levitanakaruw mayipxäna, Davidan q'uchunakapampi, Asaf profetan q'uchunakapampi Tatitur yupaychapxañapataki. Jupanakasti wali kusisiñampiw q'uchupxäna, killt'asisaw yupaychapxarakïna.

31Ezequiasasti jaqinakarux sänwa: “Jichhasti jumanakax Tatiturux luqtasxapxtawa, jak'achasinipxam, ukatsti Tatitun utapatak wilañcha luqtañatak apanipxam, yuspagarañ waxt'äwinak apanipxarakim” sasa. Ukatsti jaqinakax wilañcha luqtäwinak apanipxäna, Tatitur yuspagarañ waxt'äwinakampi, khitinakatix taqi chuymampi lurañ munapkän ukanakasti nakt'at wilañchanak luqtapxarakïna.

32Jaqinakax nakt'at waxt'äwinak luqtañatak uywanak apapkäna ukanakasti: paqallq tunka urqu vacanaka, pataka urqu ovejanaka, pä pataka mä maran urqu ovejanakänwa. Taqi uka uywanakasti Tatitur nakt'ata waxt'äwi luqtañatakïnwa.

33Luqtapkän uka uywanakasti taqpachax, suxta pataka urqu vacanaka, kimsa waranqa ovejanakänwa.

34Sacerdotenakax janiw waljanïkänti, taqpach uywanak kharirasin nakt'at wilañcha luqtäwitaki, ukat levita jilanakapax tukuyañkamaw kharirañ yanapapxäna, maynïr sacerdotenakan q'umachasiñapkama; levitanakasti q'umachasiñatakix sacerdotenakat sipansa jank'akïpxänwa.

35Ukhamarusa, walja nakt'ata waxt'äwinak luqtañanakaw utjäna, ukhamaraki sumankañ wilañchanakat lik'inak luqtañasa, nakt'ata waxt'äwinakamp chika lurañäki uka vino waxt'äwinak luqtañasa.

Ukhamat Tatitun utapan yupaychañax wasitat qalltasïna.

36Ezequiasampi, taqpach jaqinakampisti, kuntix Diosax jaqinak layku lurkatayna ukanakat walpun kusisipxäna, taqi ukanakasti mäkiw lurasitayna.