DEUTERONOMIO 23 - Qullan Arunaka DC

Markat jaqunukut jaqinakxata

1 1 (2) Moisesasti saskakïnwa: “Janiw Tatitun tantachasïwipar mantañapäkiti khiti jaqin q'urutapatix usuchjatächi, jan ukax chhuxurasiñapas khariqatächi ukaxa.

2 2 (3) “Janiw q'axat wawax Diosan tantachasïwipar katuqatäkaspati, janirakiw jupan saraqir wawanakapas katuqatäkaspati, tunka mita jaqi sarakipkani ukkhasa.

3 3 (4) “Janirakiw amonitanakasa, moabitanakasa, wawanakapan wawanakapas Diosan tantachasïwipan katuqatäkaspati;

4 4 (5) kunapachatix jumanakax Egipto markat mistunisin jupanakan uraqipanjam sarakipawayapkta ukapachaxa, janiw kuna manq'añsa, umañsa waxt'apkäyätamti; ukat sipan jupanakax Mesopotamia uraqit jutir Petor markankir Balaam sat Beor chachan yuqaparuw qullqi churapxäna jumanakar ñanqha arunakamp ñanqhachañapataki.

5 5 (6) Ukampis jumanakan Tatit Diosamax janiw Balaam chacharux ist'känti, jan ukasti uka ñanqhachäwirux jumanakar munasitap laykux mä aski waxt'äwiruw jumanakatak tukuyäna.

6 6 (7) Jan jumanakax taqi jakäwiman jupanakan sumankañapsa, askipsa thaqhapxamti.

7 7 (8) “Ukampisa janiw jumanakax edomita sat jaqinakarux jisk'achapxañamäkiti, jupanakax jumanakan wila masinakamawa; janirakiw egipcionakar jisk'achapxañamäkiti, jupanakan markapan jumanakax jakapxäyätaxa;

8 8 (9) wawanakapan kimsïr mita jaqi saraqirinakapax Diosan tantachasïwipar katuqatäñapawa.

Q'uma sarnaqañxat kamachinaka

9 9 (10) Moisesasti q'uma sarnaqañxat sarakïna: “Jumanakax uñisirinakamamp nuwasiñan jikxatasipkät ukapachaxa, jan kuna jan wali luräwinakampis juchañchasipxamti.

10 10 (11) Jumanakat maynitix arum ikiskasin chhuxurasiñapat aywiyatap layku q'añu jikxatasini ukasti, uka jaqix campamento anqaruw mistuni, ukatsti jayp'untañkamaw uka anqankani.

11 11 (12) Jayp'untxipansti, umampiw jariqasxani, ukatsti intix jalantkani ukkhaw wasitat campamentor mantxani.

12 12 (13) “Yaq'arañatakisti, campamento anqäxaruw mä chiqawja wakichasipxäta.

13 13 (14) Yaq'arañ munkäta ukkhasti, mä jisk'a ch'akur ayasïta, uka ch'akurumpiw uraq p'iysüta ukar yaq'arañamataki, tukuyxät ukkhasti uka p'iyarux laq'ampiw allxatxäta.

14 14 (15) Jumanakan Tatit Diosamax jumanak taypin campamenton sarnaqi, jumanakar imañataki, ukhamat uñisirinakamar atipjayañataki, ukhamasti, jumanakan campamentomax qullan chiqäñapawa, ukhamat jan kuna q'añunak Diosan uñjañapataki; janitix ukhamäkaspa ukasti, Diosax janiw jumanakampïkaspati.

Imantasiñxat kamachinaka

15 15 (16) “Mä t'aqhisiyat uywatatix uywiripan ukat jaltanxaspa, ukatsti imantasir jumanakan ukar jutaspa ukapachaxa, janiw jumanakax uywiripar irpxaruyapxätati.

16 16 (17) Jan ukasti jumanak taypin jakayapxäta, kawkïr markantix jupax jakañatak ajlliskani uka markana, jumanakasti jupar sum uñjapxäta.

Jan wali sarnaqir warminakxat kamachinaka

17 17 (18) “Janiw khiti israelit chachasa, warmisa q'añu lurañanakan sarnaqañapäkiti, yaqha markanakax diosanakapar yupaychañatak lurapki ukhama.

18 18 (19) Janirak jumanakax Tatit Diosaman utapan uka q'añu sarnaqañan jikxatat qullqinak katuqapxamti, ukham lurañanakasti Diosarux axtasiyiwa.

19 19 (20) “Kuntix israelit masimar mayt'apkta ukatxa, janiw jalaqtampi mayisïtati, qullqïpansa, manq'añäpansa, jan ukax kunäpansa.

20 20 (21) Yaqha markat jutir jaqirusti kuntix mayt'käta ukan jalaqtap apsusipkasmawa, ukampis janiw mä marka masimar ukham lurätati. Ukhamat Diosamax katupkäta uka uraqin irnaqatanakamar askinak churapxätam.

21 21 (22) “Tatit Diosamar mä kun phuqhañatak arsupxäta ukaxa, jank'akiw phuqhapxäta, jan phuqhapkasma ukaxa, Tatit Diosamax wayt'apxiristamwa, juchañchataw uñjasipxarakisma.

22 22 (23) Mä kun phuqhañataki jan arsupkät ukaxa, janiw kuna juchsa lurapkätati.

23 23 (24) Ukampis juman chuymamatjam Tatit Diosamar mä kun churañatak arsütaxa, uka arsutam phuqhañamaw wakisi.

24 24 (25) “Jaqi masiman uva yapupar mantapkäta ukkhaxa, qawqtix munapkta ukkha manq'antasipkasmawa, ukampis janiw kunsa canastamar apasipxätati.

25 25 (26) Trigo yapupar mantapkäta ukkhasti, trigo puyanak amparanakamamp k'ichirasipkasmawa, ukampis janiw mä yawiñampi trigo yawthapipxätati.