2 REYES 13 - Qullan Arunaka DC

Joacaz reyin Israel marka apnaqatapa

1Ocozías chachan Joás yuqapax Judá markan pä tunka kimsan mara apnaqkäna ukkhaw Jehú chachan Joacaz yuqapax Israel marka apnaqañ qalltäna, jupasti Samaria markan tunka paqallqun maraw marka apnaqäna.

2Ukampis luratanakapax Tatit nayraqatan jan walinakänwa. Jupasti kawkïr juchampitix Nabat chachan Jeroboam yuqapax Israel markar jucha luraykatayna uka pachpa juchanakarak luräna, janiw ukanakat jithiqtkänti.

3Uka luratap laykuw Tatitux Israel markatak q'apisïna, ukatsti walja maranakaw Siria markan Hazael reyipan amparaparu katuyäna, ukhamarak Ben-adad sat yuqapan amparaparusa.

4Ukat Joacaz reyix Tatitur mayïna, Tatitusti mayisitap ist'änwa, kunjäm jan waltix Siria markankir reyix israelitanakar t'aqhisiykän ukanak uñjatap layku.

5Tatitux Israel markatak mä qhispiyir khithanïna, ukhamat israelitanakax Siria reyin amparapat qhispipxäna, ukatsti nayra urunakanjam samaratakiw wasitat utanakapan jakxapxäna.

6Ukampisa, israelitanakax janiw kuna juchanaktix Jeroboam chachan saraqirinakapax lurapkatayna ukanakat saraqtapkänti, ukanakaw Israel markarux juchar puriyatayna, jupanakax jucha lurasipkakïnwa, Astarté sat diosan lantipasa Samaria markankaskakïnwa.

7Joacaz reyin ejercitopax janiw waljanïkxänti, jan ukasti phisqa tunka caballería soldadonakampi, tunka nuwasiñ carronakampi, tunka waranqa kayuk sarantir soldadompikiw utjxäna, Siria markankir Hazael reyiw q'alpun jupanakar tukjatayna uka layku.

8Joacaz reyin ukat ukxar sarnaqäwipasa, luratanakapasa, atipjäwinakapasa Israelankir reyinakan luräwinakapa qillqatankiwa.

9Joacaz reyix jiwxäna ukapachasti, Samaria markan jupar imt'xapxäna. Uka qhipatsti Joás yuqapaw jupa lantix marka apnaqxäna.

Joás reyin Israel marka apnaqatapa

10Kunapachatix Judá markankir Joás reyix kimsa tunka paqallquni mara marka apnaqkän ukkhaw, Joacaz chachan Joás yuqapax Israel marka apnaqañ qalltäna, jupasti Samaria markan tunka suxtan maraw marka apnaqäna.

11Ukampis jupan luratanakapax Tatitun nayraqatapan jan walinakänwa, jupasti janiw kawkïr juchampitix Nabat chachan Jeroboam yuqapax Israel markar juch luraykatayna uka juchanakat saraqtkänti, jan ukasti ukanak luraskakïnwa.

12Joás reyin ukat ukxar sarnaqäwinakapasa, luratanakapasa, atipjäwinakapasa, Judá markankir Amasías reyimpi nuwaskän ukanakasa, Israelankir reyinakan luräwinakapa qillqatankiwa.

13Joás reyix jiwxäna ukapachasti, juparux Samaria markan imt'xapxäna Israel markan reyinakap thiyaru. Uka qhipatsti Jeroboam yuqapaw jupa lantix marka apnaqxäna.

Qhipa profecía arunakampi, Eliseo profetan jiwxatapampi

14Eliseox wali usuntata jiwañampïnwa, ukatsti Israelan Joás reyipaw jupar uñjir jutäna, jacht'asisaw qhumantäna, akham sasa:

—¡Awkixay, awkixay! ¡Jumasti Israel markatakix mä wali ch'aman ejercitor uñtatäyätawa! —sasa.

15Eliseosti juparux sänwa:

—Mich'i antutañampi, mä qawqha mich'inakamp katum —sasa.

Reyisti mich'i antutañampi, mä qawqha mich'inakamp katxarüna.

16Ukat Eliseox säna:

—Mich'i antutañatak wakicht'asim —sasa.

Reyin uk lurañapkamasti, Eliseox amparap Joás reyin amparapxarux luqxatäna,

17akham sasa:

—Inti jalsu tuqinkki uka ventana jist'aram —sasa.

Reyisti iyawsasaw jist'aräna, ukat Eliseox säna:

—Jichhasti, ¡antutt'am! —sasa.

Reyisti mich'i antutt'äna. Ukat Eliseox jach'at säna:

—¡Tatitun qhispiyir mich'ipawa! ¡Siria jaqinakat qhispiyir mich'iwa! ¡Jumaw Afec chiqan sirionakar atipjäta, q'al tukjañkama! —sasa.

18Ukatsti Eliseox reyir sänwa:

—Mich'inak katxarum —sasa.

Reyix mich'inak katxaruskipan Eliseox säna:

—Jichhasti mich'inakamp uraqir jawq'antam —sasa.

Reyisti kimsa kuti uraqir jawq'antasin sayt'äna.

19Ukat profetax jupatak q'apisïna, sarakïnwa:

—Jumatix uraqir phisqa kuti, jan ukax suxta kutis jawq'antasamänxa, Siria jaqinakar tukjañkamaw atipjasamäna; jichhasti kimsa kutikiw jupanakar atipjäta —sasa.

20Uka qhipat Eliseox jiwxäna, juparusti imt'xapxänwa.

Ukapachax lunthata moabita tamanakaw sapa mara Israel uraqir mantantanïna,

21mä kutixa, mä qawqha israelita jaqinakaw mä jiwat jaqir imantasipkäna, ukatsti akatjamat lunthat moabita tamanak jutir uñjasax, uka jiwatar Eliseon imäwip manqharuw jank'ak jaltxañ layku liwintawayapxäna. Ukampis uka jiwatax Eliseon ch'akhanakapamp jak'achasisax, jaktxänwa, ukat sayt'asxarakïna.

22Joacaz reyin marka apnaqäwi urunakapanxa, Siria markankir Hazael reyix israelitanakar walpun t'aqhisiyäna.

23Ukampis Tatitux jupanakat khuyapayasïnwa, yanapt'arakïnwa, jupan Abraham, Isaac, Jacob ukanakampi suma arust'äwi luratap layku, ukat jupax Israel markarux q'al tukjañsa, jupan nayraqatapat jaqunukuñsa jan munkänti. Jichhakamas Tatitux israelitanakar imaskakiwa.

24Siria markankir Hazael reyix jiwxänwa, ukatsti jupa lantix Ben-adad sat yuqapaw marka apnaqxäna.

25Ukapachaw Joacaz reyin Joás yuqapax Ben-adad reyin amparapat kutirayasxäna, kawkïr markanaktix Hazael reyix nuwasïwin Joacaz awkipat aparkatayna uka markanaka. Kimsa kutiw Joás reyix Ben-adad reyir atipjäna, ukhamat Israelan markanakap kutirayasxäna.