NÚMEROS 19 - Qullan Arunaka DC

Q'umachasiñxat kamachinaka

1Tatitux Moisesampiru, Aaronampirux sänwa:

2“Naya Tatituw akanak arsta: Israelitanakar parlam mä wila vaca juman ukar irpanipxpan, uka vacasti janirak usuchjatäkpansa, janirak kunapachas kunkapar yuku ayxatatäkpanti.

3Jumanakax Eleazar sacerdoteruw uka vaca churapxäta, campamentot anqäxar irpsuwayañapataki, ukatsti jupan uñjkataw kharinukuyani.

4Eleazar sacerdotex luk'anapar mä juk'a wilar aytasin, paqallqu kutiw Tatitump Jikisiñ Carpar ch'allakipani.

5Ukatsti uka vacxa jupan uñjkataw taqpach nakhantayapxani, lip'ichipsa, aychapsa, wilapsa, ukhamarak phurupsa.

6Ukxarusti sacerdotex cedro lawampi, hisopo alin laymipampi, wila isimpi aptasin, vacax nakhantaski uka ninar jaquntani;

7ukatsti sacerdotex isip t'axsusxani, janchipsa umampiw jariqasxani, ukat campamentorux mantxani, ukampis jayp'ukamaw q'añuchat uñjasini.

8Vaca nakhantayki uka jaqisti, isip t'axsusxani, janchipsa umampi jariqasxarakini, ukampis jayp'ukamaw q'añuchat uñjasini.

9Uka qhipatsti, mayni jan q'añuchat jaqiw nakhantayat vacan qhillanakap apthapini, uksti campamentot anqäxan mä q'uma chiqaruw uchxani. Uka qhillampiw Israel markax q'umachasir uma wakichani, taqi ukanakasti juchanakat wilañcha luqtäwïniwa.

10Qhillanak apthapir jaqisti isip t'axsusxani, jupasti jayp'ukamaw jan q'umat uñt'atäni. Ukasti wiñayatak arsut kamachiwa, jumanak israelitanakataki, jumanak taypin jakir jaya markat jutir jaqinakatakisa.”

11“Maynitix jiwat jaqin amayap llamkt'anixa, paqallqu uruw q'añut uñt'asini.

12Ukat kimsa ururu, jan ukax, paqallqu ururusa q'umachasiñ umampiw q'umachasiñapa, ukat q'umachat uñjasxani. Janitix kimsïr ururusa, paqallqür ururusa q'umachaskan ukaxa, janiw q'umachat uñjaskaniti.

13Maynitix jiwat jaqin amayap llamkt'asin jan q'umachaskanixa, Tatitun qullan utjäwip q'añuchi, ukhamäni ukasti, uka jaqix Israel marka taypit jaqunukutäñapawa, q'umachasir umampi jan q'umachasitap laykux, q'añut uñt'atäniwa.

14“Kamachix akawa: Maynitix carpan jiwanixa, ukan jikxatasirinakampi, ukar mantirinakampix, paqallqu uruw q'añut uñt'atäni.

15Uka carpan utjir jan qhuphintat phukhunakasa, jan ukax, jan wali qhupxatat phukhunakas, q'añut uñt'atäniwa.

16“Maynitix mä pampan espadampi jiwayat jaqin amayap llamkt'ani, jan ukax, jiwañap jiwir jaqin amayapsa, jaqi ch'akhanaksa, amay imäwsa llamkt'ani, uka jaqix paqallqu uruw q'añut uñt'atäni.

17“Ukham q'añut uñt'at jaqir q'umachañatakix, jucha luratat wilañcha luqtaski uka vacan qhillap mä chuwar aptasini, ukatsti jalsur umampiw ukxar warxatasini.

18Ukatsti mayni q'umat uñt'at jaqiw hisopo laymi aptasin umar juricht'ani, ukampiw carpar ch'allakipani, ukatsti phukhunakaru, uka manqhan jikxatasipkän uka jaqinakaru, uka kipkarak khititix jaqi ch'akhanaksa, pampan jiwayat jaqin amayapsa llamkt'katayna, jan ukax, jiwañap jiwir jaqin amayapsa, amay imäwi llamkt'katayna ukanakar ch'allakiparakini.

19Q'umat uñt'at jaqix kimsïr uruna, jan ukax, paqallqür uka urunakan, q'añuchat jaqirux ch'allakipani. Paqallqür urutakisti q'umachatäxaniwa. Ukatsti q'añuchat jaqix isip t'axsusiñapa, umampi jariqasiñaparaki, ukampis jayp'ukamax q'añut uñt'atakïskaniwa.

20Q'añuchat jaqitix jan q'umachaskanixa, markap taypit apanukutaw uñjasini, Tatitun qullan utjäwip jupan q'añuchatap layku. Q'umachasir umampi jan ch'allakipasitap laykusti, jupax q'añukïskaniwa.

21Uka kamachisti wiñayatakïniwa. Q'umachasir umampi yaqha jaqir ch'allakipirixa, isip t'axsusiñapawa. Q'umachasir uma llamkt'iristi, jayp'ukamaw q'añuchat uñjasini.

22Taqi kunarutix q'añuchat jaqix llamkt'kan ukasti, q'añuchataw tukuni, q'añuchat jaqir llamkt'iristi, jayp'ukamaw q'añuchat uñjasini.”