EZEQUIEL 11 - Qullan Arunaka DC

Jerusalén markan mutuyäwipa

1Diosan ch'amapaw nayarux aptawayitu, ukatsti Tatitun utapan inti jalsu tuqin utjir punku jak'aruw sayt'ayitu. Uka punkunsti pä tunka phisqani jaqinakaw qunt'atäsipkäna. Ukanak taypinsti Azur chachan Jaazanías yuqaparu, Benaías jaqin Pelatías yuqaparuw uñjarakta, jupanakasti markan jilïrinakapänwa.

2Ukatsti Tatitux sarakituwa: “Akanakax jan wali amtäwinakakpun aka markan amtasipki, ñanqha lurañanakak lup'isipki.

3Jupanakax sapxarakiwa: ‘Ukhamax janïraw wasitat utanak lurañax wakiskaniti. Aka markan jichhax jan kuna axsaras jakasiskañäni, kunjämatix aychax mä phukhun imatäkis ukhama.’

4Ukatpï jumax Ezequiel, nayan sutixar jupanakar parlxayañamaxa” sasa.

5Ukatsti Tatitun ajayupaw nayxar juti, ukat akham yatiyañaxatak sarakitu: “Tatitux akham siwa: ‘Israelita jaqinaka, ukpï jumanakax lup'ipxtaxa. Nayax jumanakan amtäwinakam yatiraktwa.

6Jumanakax aka markan walja jaqinakaruw jiwarayapxtaxa, marka thakhinaksti jaqi jiwatanakampiw phuqhantapxaraktaxa.

7Ukatpï naya, Tatitux sapxsmaxa: Jerusalén markat jaqunukupxämawa, inamayaw aka markan qhispitäñäniw sasipkäta. Marka manqhansti, jumanakan jiwarayata jaqinakan amayanakapakiw qhiparxani.

8Jumanakax nuwasïwin jiwarañ axsarapxtawa, ukampis nayaw nuwasiñanak jumanakxarux apayanï. Naya, Tatituw uk arsta, arsutaxarusti phuqhapunïwa.

9Aka chiqatsti jumanakarux jaqunukupxämawa, yaqha markankir jaqinakaruw katuyapxarakïma. Ukäniw jumanakan mutuyäwimaxa.

10Espadampi jiwarayataw uñjasipxäta. Israel markan qurpanakapan nayaw luräwinakamarjam taripapxäma, ukapachaw jumanakax nayan Tatitütax yatipxäta.

11Aka markasti jumanakatakix janiw mä phukhükaspas ukhamäkaniti, janirakiw jumanakas aychäpkasmas ukhamäpkätati. Nayaw jumanakarux Israelan qurpanakapan luräwinakamarjam taripapxäma,

12ukapachaw jumanakax yatipxäta, nayan Tatitütaxa. Jumanakax janiw nayan arunakaxarjam sarnaqapktati, janirakiw kamachinakaxsa phuqhapktati, jan ukasti, jumanak jak'ankir markanakan saräwinakaparjamaw sarnaqapxtaxa’ ” sasa.

13Tatitun sutipxar nayan ukham parlañkamasti, Benaniasan yuqapa Pelatías jaqix jiwataw liwnuqti. Nayasti p'iqix uraqir puriyañkamaw alt'asta, wali jach'at art'asirakta akham sasa: “¡Tatay! ¿Israel markat mä juk'a jilt'irinakarux jiwarayakipunïtati?” sasa.

Diosax mä machaq arust'äwin utjañap yatiyi

14Tatitux nayaruw parlxayitu, akham sasa:

15“Jerusalén markan jakir jaqinakasti, juman marka masim israelitanakxat parlapxi, sapxarakiwa: ‘¡Jupanakax Tatitut jayankapxiwa! Ukat sipana jiwasanakaruw aka markxa churistu ukan jakapxañasataki’ sasa.

16Jichhax Babilonian jakir israelitanakarux sarakim: ‘Naya, Tatitux jayaruw jupanak apanukta, yaqha jaya markanak taypiruw ananukta, ukampis ukax mä juk'a urunakatakikïniwa. Ukhamarus uka jaya markanakan nayarux yupaychapxarakitaspawa.’

17Jupanakarux saskakim: ‘Tatitux siwa: Nayaw jupanakarux kawkha uraqinakar ananukutatix uñjasipki uka jaya markanakat kuttayanxä, jupanakar tantacht'asinsti Israel uraqi jupanakarux churxarakï.

18Jupanakax markapar kuttanxasinsti, ukan utjiri axtaskaña luräwinak q'al tukjapxani.

19Nayasti jupanakat uka qala chuymap apaqäwa, mä machaq chuyma, machaq ajayu churarakï.

20Ukapachaw jupanakax nayan kamachinakarjama, arsutanakaxarjam jakapxani. Jupanakax nayan markaxäniwa, nayasti jupanakan Diosaparakïyäwa.

21Ukampis khitinakatix uka axtaskañ luräwinakar chuyma churat jakapxani ukanakarusti, luräwinakapatjam wayt'arakï. Naya, Tatituw uk arsta’ ” sasa.

Tatitun qhapaq kankañapax Jerusalén markat jayarst'xiwa

22Uka pusi chhiqhaninakax thuqtawayxapxiwa, uka muyuri muruq'unakasti jupanak chikarakiw thuqtawayapxi. Ukapachaw Israelan Diosapan qhapaq kankañapax, jupanak patxankkäna ukax

23sartxarakïna, ukatsti markat jayarst'awayasin uka markat inti jalsu tuqin utjir qullu patxaruw purirakïna.

24Ukatsti Tatitun ch'amapaw nayar aptawayasax Babiloniar kuttayitu, kawkhankapkäntix apanukuyata jaqinakax uka markaru. Taqi aka luräwinaksti, Tatitun Ajayupaw unañchäwi tuqi uñjayarakitu. Uka qhipatsti uka unañchäwix chhaqtawayxänwa,

25ukatsti nayax taqi kuntix Tatitux uñachaykitu ukanak Babiloniar apanukutanakaru yatiyarakta.