JUECES 2 - Qullan Arunaka DC

Tatitun angelapax Boquim chiqan uñsti

1Tatitun angelapax Guilgal chiqat Boquim chiqaruw saräna, ukatsti israelitanakarux sänwa: “Nayaw jumanakarux Egipto markat irpsunipxsma, ukatsti nayra awkinakamar arsuta uraqiruw irpanipxsma, jupanakarusti säyätwa: ‘Janipuniw jumanakampi lurat arust'äwirux p'akintkäti,

2janipuniw jumanakax uka uraqin jakirinakampix kuna arust'äwsa lurapxätati, jan ukasti altaranakap taqi tukjapxäta’ sasa. Ukampis jumanakax janiw jaysapkistati, ¡uñtapxam kuntix lurapkta uka!

3Ukat jichhax jumanakar sapxsma: Janiw uka markanakarux jumanak nayraqatat jaqunukkätati, jupanakasa, diosanakapas jumanakatakix mä sipitar uñtatäniwa” sasa.

4Angelax parlañ tukuykän ukkhaxa, israelitanakax taqiniw wali jach'at wararis jachapxäna.

5Ukat jupanakax uka chiqaru Boquim sutimpi uchapxäna, ukatsti ukawjanxa Tatituruw wilañchanak luqtapxäna.

2. Taripirinakan urunakapan kunatix luraskani ukanaka(2.6—3.6)Josué chachan jiwxatapa(Jos 24.29-31)

6Kunapachatix Josué chachax israelitanakar khithanukxän ukkhaxa, sapa mayniw kawkharutix uraqix wakt'kän ukkhar sarxapxäna.

7Josué chachan jakañapkamasti israelitanakax taqi chuymaw Tatitur yupaychapxäna; ukhamarak Josué chachan qhipat jakapkän uka nayra jilïrinakan jakapxañapkama, jupanakasti kunjämtix Diosax Israel markataki jach'a muspharkañanak lurki ukanak uñjapxatayna.

8Ukampis Josué chachax patak tunka maranïkän ukkhaw jiwxäna,

9juparusti Timnat-sérah chiqankir uraqiparuw imt'xapxäna, uka uraqix Gaas qulluta amsta tuqinkiwa, Efraín sat qullunak taypina.

10Josué chacha mita israelitanakax taqiniw jiwarxapxarakïna. Ukhamasti, uka qhipat yuriri israelitanakax janiw Tatitur uñt'apkänti, janirakiw Israel markatak jupan jach'a muspharkañ luratapatsa yatipkänti.

Israelitanakax Diosaruw apanukupxi

11Israelitanakan luräwinakapax Tatit nayraqatan janiw walïkänti, jupanakax Baal diosan kunayman uñtasitanakaparuw yupaychañ qalltapxäna.

12Israelitanakax kawkïr Diosatix nayra awkinakaparu Egipto markat irpsunkatayna uka Tatitut armasxapxäna, ukatsti uka jak'an jakir jaqinakan diosanakapar yupaychañaruw katuyasipxäna, ukhamat Tatitur q'apisiyasa.

13Jupanakasti Baal, Astarté diosanakan uñtasitanakapar yupaychasaw Tatitut armasipxäna,

14ukat Tatitux Israel markataki q'apisïna, lunthatanakampiw jupanakan utjir yänakap aparayäna, ukatsti uka thiyanakan jakir uñisirinakapampiw tukjayarakïna, janiw jupanakax saykatañatak ch'amanïpkänti.

15Israelitanakax sapa kuti nuwasir sarapkän ukkhaxa, Tatitux janiw jupanakampïkxänti, ukhamïpansti jupanakax jan walt'añan jikxatasipxäna, ukhama jan walt'apxañapatakisti Dios pachpaw arsüna.

Ukampis Tatitux israelitanakar walja jan walt'añanak apayankchïn ukasa,

16jupanakar qhispiyañatakix jilïrinak sayt'ayäna, jupanakaru jan wali luririnakata qhispiyañapataki.

17Ukampis israelitanakax janiw uka jilïrinakarux yäqapkänti, jan ukasti Tatit nayraqatan janiw sum sarnaqapkänti, yaqha diosanakaruw yupaychapxäna. Jupanakan nayra awkinakapax Tatitun kamachi arunakaparu ist'asaw jakapxatayna, ukampis jupanakax janiw uka uñacht'äwirjam sarnaqapkänti.

18Tatitusti sapa kuti mä jilïrir sayt'aykän ukarusti yanapt'arakïnwa, uka jilïrin jakañapkamasti Tatitux israelitanakarux uñisirinakapan amparapat qhispiyäna, jupanakan art'asitapa, t'aqhisitanakap ist'asax khuyapt'ayasïnwa.

19Kunapachatix uka jilïrix jiwxän ukkhasti, jupanakax wasitat uka jan wali lurañanakaru kutt'apxäna, nayra awkinakapat sipansa juk'ampi jan waliw tukupxäna, yaqha diosanakar luqtasa, yupaychasaraki. Janiw jupanakax jan wali luräwinakapsa, sarnaqäwinakapsa apanukupkänti.

20Ukat Tatitux Israel markatak q'apisisin säna: “Aka jaqinakax nayra awkinakapampi lurat arust'äwirux t'unjapxiwa, janirakiw jaysañ munapkituti.

21Uka layku, janiw nayax jupanak taypit jaqunukkäti, kawkïr markanaktix Josué chachax janïr jiwkasin jan jaqunukkän uka markanakxa” sasa.

22Tatitusti ukampix israelitanakaruw yant'añ munäna, Diosan thakhipan sarapxaspati, kunjämtix nayra awkinakapax sarapkatayna ukhama, jan ukax janicha.

23Ukat Tatitux uka markanak jan mäki jaqunukkänti, janirakiw Josué chachan amparaparus alisnukuñapatak katuykänti, jan ukasti pachpa uraqiruw qhiparayäna.