SALMOS 105 - Qullan Arunaka DC

SALMO 105Israel markatak Diosan luratanakapa(1 Cr 16.7-22)

1¡Tatitur yuspagarapxam, sutip aytapxam!

Muspharkañ luratanakapat markanakar yatiyapxam.

2Aytat kankañapar q'uchupxam.

¡Muspharkañ luratanakapat yatiyapxam!

3Qullan sutipat jach'achasipxam.

¡Tatitur thaqhirinakax

chuymanakapan kusisipxpan!

4Tatitur jak'achasipxam, ch'amapar alkatapxam;

jan qarjasis Tatitur thaqhapxam.

5Muspharkañ jach'a luratanakapat amtasipxam,

kamachi arsutanakap amthapipxam;

6Abraham uywatapan saraqirinakapa,

jupan ajllit Jacobun wawanakapa.

7Tatituw jiwasanakan Diosasaxa;

¡jupaw taqpach uraq apnaqi!

8Waranqa mita jaqinakas sarakipaskpan,

janipuniw arust'äwipax armatäkaniti,

9Abrahamampi arust'äwi luratapata,

Isaacar juramentomp arsutapata,

10Jacobutak kamachi utt'ayatapata,

Israel markatak wiñay arust'äwi luratapata,

11jupax sänwa: “Jumaruw Canaán uraq churxäma,

jumar wakt'ir churäwimjam katuyxäma” sasa.

12Jupanakax mä juk'anikïpchïn ukasa,

yaqha markankir jaqinakakïpchïn ukasa,

13markat marka muyupkchïn ukasa,

jach'a markat yaqha markar sarapkchïn ukasa,

14Diosax janiw khitin t'aqhisiyañapsa munkänti;

jupanak laykuw reyinakarus tuqïna.

15Jupax sänwa: “Ajllitanakaxarux jan llamkt'apxamti,

profetanakaxarus janirak t'aqhisiyapxamti” sasa.

16Khä uraqirux mach'a apayanïna,

manq'añanak jupanakat apaqäna.

17Ukampis Josearuw jupanakat nayraqat khithäna,

uywatarjam aljantapkän ukaru.

18Egipcionakax Josearuw

cadenanakampi kayunakapat ñach'antapxäna,

¡carcelaruw uchantapxäna!

19Tatitun arupaw Josearux yant'äna,

Josean yatiyäwip phuqhasiñapkama.

20Reyix Josear antutayañatakiw arsüna,

walja jaqinakar apnaqirix antutnukuyxänwa;

21reyix utap apnaqirit Josearux utt'ayäna,

taqpach yänakap uñjañapatakiw katuyäna,

22jilïrinakar yatichañapatakiw utt'ayäna,

jilïr jaqinakaruw yatiñanïpxañapatak yatichayäna.

23Jacob sat Israelax Egipto markaruw mantäna,

Cam uraqin jakäna.

24Diosax markaparux waljaniptayänwa,

egipcionakat juk'ampi ch'aman tukuyäna.

25Egipto uraqinkirinakarusti chuymanakap mayjt'ayäna

Diosan markapar uñisipxañapataki,

uywatanakapar jan walinak lurapxañapataki.

26Diosasti Moisesampiru, Aaronampiruw khithäna,

luqtiripat ajlliskatayna jupanakaru,

27jupanakasti Diosan muspharkañanakap wasaran uñacht'ayapxäna:

¡Egipto uraqin muspharkañanak lurapxäna!

28Diosax ch'amak apayanisin ch'amakt'ayäna,

egipcionakasti janiw arunakapar ist'apkänti.

29Jawir umanakap wilaruw tukuyäna,

chawllanakaparusti jiwarayänwa;

30uraqipax jamp'atunakamp phuqhantatänwa,

jamp'atux reyin ikiñ utapamppachan aywtäna.

31Diosax arumpikiw jach'a chhichhillankhanak apayanïna,

Egipto uraqpacharuw chhichhillankhamp phuqhantayäna.

32Jallu lantix chhijchhi apayanïna,

uraqirusti nina lawranak apayanïna.

33Uva alinakampi, higo alinakampi tukjäna,

Egipton utjir quqanak tinkurayäna.

34Diosax t'iju t'ijunakan puriniñapatakix aruk arsüna,

jan jakht'kay t'iju t'ijunakaw purintanïna,

35uraqipan utjir quranak manq'supxäna,

yapunakapan achunakap tuksupxäna.

36Pachpa Egiptoruw jiwampi mutuyäna,

sapa utankir tayna yuqall wawaruw jiwayäna.

37Diosax quri, qullqi, apt'asit markaparux irpsunïna,

ayllunakap taypinsti, janiw khitis aynacht'känti.

38Egiptonkirinakax mistxir uñjasax kusisipxänwa,

jupanakax wali mulljatäpxänwa.

39Diosax mä qinayampiw jupanakarux imxatäna,

arum ch'amakarusti ninampiw qhantayarapïna.

40Manq'añ mayitaxa, khullunak apayanïna,

alaxpach t'ant'ampiw sisarayäna.

41Qarqaruw jist'jäna, umasti qarqat jalsunïna,

wasaran jawir umanakax jaltäna.

42Qullan arust'äwit amtasïna,

Abraham luqtiripar arsutat amtasïna.

43Diosax ajllit markaparux ukham irpsunïna,

kusisiñat arnaqt'asisaw mistunxapxäna,

44Diosar jan uñt'ir jaqinakan uraqinakap katuyäna,

yaqha markanakan uraqinakap churxäna,

45ukhamat Tatitun arsutanakap imapxañapataki,

kamachinakap phuqhapxañapataki.

¡Tatitux jach'añchatäpan!