NEHEMÍAS 2 - Qullan Arunaka DC

Nehemiasax Jerusalenaruw sariUkapachasti Artajerjes reyin coperopäyätwa.

1Mä urusti, Nisán sat phaxsina, Artajerjes reyin pä tunka mara marka apnaqäwipana, jupar vino luqtaskäyäta ukapachaw reyix nayar wali llakt'at uñjitu,

2ukat jiskt'arakitu:

—¿Kunats llakista? Wali llakit uñkatsma. Janirakiw usutjamäktasa, kuna jan walt'añaw utjpachätam —sasa.

Ukkhasti wal axsaräyäta,

3ukat reyir sista:

—¡Wiñayataki reyix jakpan! ¿Kamisarak jan llakitäyästi, kawkhantix awkinakaxan janchinakapax imantatäki uka markan tukjatätapata, punkunakapas ninamp nakhantayatätapatsti? —sasa.

4Reyisti jiskt'ituwa:

—¿Kunsa jumatak luriristxa? —sasa.

Alaxpachankir Tatitun yanapap mayisisaw

5reyirux sarakta:

—Juma reyitak askïchi, khuyapayasiñamas nayatak utjarakchi ukaxa, juma jach'a reyir Judá markar nayar khithañamatakiw achikt'assma, awkinakaxan janchipax imt'atäki uka marka wasitat sayt'ayañaxataki —sasa.

6Reyisti jupa jak'an qunt'ata reinan ist'kañaw jiskt'itu:

—¿Qawqha urus ukankäta? ¿Kunapachas kutt'anxäta? —sasa.

Nayax qawqha urunakatix ukankañaxax wakiski uk jupar yatiyta, jupasti sarañaxatak iyawsituwa.

7Ukhamarus nayax saraktwa: “Juma reyitak askïchi ukaxa, mä arsüwi qillqt'asin apayita, Éufrates jawirat inti jalant tuqin utjir marka apnaqirinakar churañataki, ukhamat markanakap chiq sarakipawayasin Judá uraqir puriñaxkama;

8yaqha qillqatsti reyin ch'umip uñjir Asaf chachatak churawayarakita, nayaru lawanak churañapataki; uka lawanakasti Tatitun utapan nayräx punkunakap wasitat lurañataki, markan pirqapataki, ukhamarak nayan utax lurañatakïniwa” sasa. Reyisti, taqi mayitaxaruw iyawsas churitu, Tatitun khuyapayasiñapan nayampïtap layku.

9Ukatsti reyix ejercitonkir jilïrinakaru, caballería soldadonakaruw nayamp chik sarapxañapatak khithäna, thakhin nayar jan walinakat jark'añataki. Éufrates inti jalant tuqinkapki uka marka apnaqirinakan ukar purisasti, reyin qillqt'atanakap churäyäta.

10Ukampis kunapachatix Horón chiqankir Sambalat chachampi, Tobías amonita luqtiri chachampi yatipkäna ukkhaxa, walpun phiñasipxäna, jupanakatakix janiw ukax askïkänti nayan israelitanakar yanapt'ir purinitaxata.Nehemiasax Jerusalén markaruw puri

11Jerusalén markar purisinsti, ukat kimsa uru ukankxasinxa,

12janiw khitirus kuntix Tatitux Jerusalén layku lurañ amuyt'aykitäna uk arskäyätti. Ukatsti arumaw sartasin mistuwayta, mä qawqha chachanakamp chika. Nayax janiw yaqha uywa irpkäyätti, jan ukasti kawkïri uywarutix lat'xatata sarkäyäta ukak irpasiyäta.

13Uka arumpachaw Qhirwa tuqir mistuñäkis uka punkunjam mistuwayta, Dragón sat uma jalsu tuqir sarasa, ukhamarak T'unanak Warañ punku tuqiru. Ukatsti Jerusalenan tukjat pirqanakapa, ukhamarak ninamp nakhantayat punkunakap uñakipta.

14Ukatsti, Uma Jalsu sat punku tuqiru, ukhamarak reyin estanquep tuqirux saraskaktwa; ukampis uywaxax janiw uka chiq sarirjamäkänti.

15Ukkhakamasti arumäskakïnwa. Ukatsti jawir thiyanjam makhatawayta, pirqanak uñaraniwayasinsti Qhirwa sat punkunjam mantasaw kutt'anxarakta.

16Marka apnaqirinakasti janiw yatipkänti nayan kawkiru sarataxsa, kun lurataxsa. Judionakarusa, sacerdotenakarusa janirakiw yatiykäyätti ukkhakamaxa, jilïrinakarusa, marka apnaqirinakarusa, khitinakatix pirqa lurañanakan yanapasipkani ukanakarusa.

17Ukat jupanakar sista:

—Jumanakax askiw yatipxtaxa jiwasanakan jan walt'añan jikxatasipxatasxa, Jerusalenax sinti tukjatawa, punkunakapas nakhantatarakiwa. Jumanakasti nayamp chik mayacht'asipxam, Jerusalenan pirqanakap wasitat sayt'ayañataki, jiwasat jan juk'amp larusipxañapataki —sasa.

18Ukatsti, jupanakarux kunjämtix Tatitux khuyapayasiñapamp nayar yanapt'kitän uk yatiyarakta, kuna arunaktix reyis siskitäna ukanakxata, jupanakax sapxarakïnwa:

—¡Qalltapxañäni, wasitat pirqa sayt'ayaña! —sasa.

Jupanakasti wali q'aphakiw maynit maynikam ch'amañchasipxäna.

19Ukampis kunapachatix Horón chiqankir Sambalat chachasa, Tobías amonita luqtirisa, Guésem árabe chachasa yatipxäna ukkhaxa, nanakat larusipxitänwa; jisk'achasaw sapxitäna:

—¿Kunsa jumanakax lurasipkta? ¿Reyir saykatañti munapxta? —sasa.

20Nayasti jupanakarux sistwa:

—Alaxpachankir Tatituw nanakar atipt'ayapxitani. Nanaka Tatitun luqtirinakapaxa, pirqa sayt'ayañ qalltapxäwa, ukampisa janiw jumanakan kuna arsuñasa, kuna lurañas utjapktamti, janirakiw Jerusalén markan jumanakat kunat amtasiñas utjkiti —sasa.