ISAÍAS 29 - Qullan Arunaka DC

1¡Ay Jerusalén, Davidan markapa!

Phunchhäwinakam lurasipkakim

sapa maras lurasipkakim,

2nayaw Jerusalenarux jan walt'añar uchaskä,

warariñanakampi, ayquñanakampiw utjani.

Markasti ninampi nakhantayatäniwa,

kunjämtix uywa waxt'anakax altaran nakt'ayatax ukhama.

3Jumar muyuntañapatakix ejercitox khithanïma,

jumarusti mä pirqampjamaw muyuntayäma,

nuwantañ chiqanak jumatakix wakicharakï.

4Jisk'achataw uñjasïta, uraqir liwinukutaw uñjasïta;

arsutamasti mä ñanqha ajayun arupjamäniwa;

parlatanakamasti jinchu jak'atjamak ist'asini.

5-6Ukampisa, akatjamatak

taqi ch'aman Tatitux uñisirinakamar mutuyani,

q'ixu q'ixunakampi, uraq khathatiñanakampi, jach'a ch'axwañanakampi,

jach'a t'aqhisiñanakampi, jach'a thayampi,

ninampi nakhantayañanakampiw mutuyani.

Uka walja uñisirinakamasti q'ala tukjataw uñjasipxani,

jichhu t'unar uñtat apatäpxaniwa.

7Jerusalén markar nuwantir ejercitonakasti,

khitinakatix sayt'asiñanakapsa t'unjapki ukanakaxa,

jan mayampitak chhaqtayatäpxaniwa,

kunjämtix urpux inti jalsunitapat chhaqtxix ukhama.

8Jerusalén markar nuwantir jach'a ejercitonakasti,

manq'at awtjata, umat pharjataw jiwarapxani.

Manq'apkaspasa, umapkaspasa ukham samkasipxani,

ikïwipat p'arxtapkan ukkhasti,

purakapas ch'usakiw jikxatasini,

mallq'as q'ala wañantataw uñjasipxani.

9¡Jumanakasti, profetanaka, luqhikïsipkam!

¡Jan kuns uñjas juykhukïsipkam!

¡Machantatanakjam liwinaqtasipkakim,

janisay vino umapksta ukasa!

10Tatituw jumanakxarux

mä jach'a iki apayani.

Jumanak profetanakax

markan nayranakapäpkasmas ukhamäpxañamänwa,

ukampis janiw kuns uñjapktati.

11Kuna unañchäwinaktix Tatitut katuqapkta ukanakxa,

janiw amuyt'irjamäpktati;

mä jist'thapit qillqatan kunatix qillqatäki

uksa ullarañ munapkasma ukhamawa.

Maynitix ullañ yatirir churaspaxa,

ukatsti sarakispa: “Aka qillqat ullart'am” sasa,

jupasti sarakiniwa:

“Janiw ullart'kiristti, uka qillqatax jist'antatawa” sasa.

12Ukampisa mayninakax sapxarakiwa:

“Janiw ullarapkiristti,

janixay ullañsa, qillqañsa yatipkstixa” sasa.

13Tatitusti sarakituwa:

“Aka markax pata chuymakiw arkitu,

lakanakapampikiw nayarux jach'añchitu,

ukampisa chuymapax nayat jayankaskiwa,

nayar yupaychapkitu ukaxa,

jaqin amtataparjamakiwa.

14Ukatpï jichhax muspharkañanaka

aka markarux uñacht'ayäxa,

ukatsti, aka markax muspharataw uñjasini.

Yatiñani jaqinakapan yatiñanakapsa,

ch'ikhi jaqinakapan amuyt'añanakapsa,

q'al chhaqtayäxa.”

15¡Ay, kunakïkan khitinakatix Tatitut imantasipki ukanakatakixa,

jupanakax amtäwinakap Tatitut imantapxi,

aruma ch'amakanakan ñanqhanak lurapxi,

sapxarakiwa: “Janiw khitisa uñjkistuti, janiw khitis amuykiti!” sasa.

16¡Kunjämsa taqi kuns jan walir tukuyapxi!

Sañu lurir jaqimpi, ñiq'impix kipkakïkaspas ukhama.

Mä kuna luratas janiw luririparux:

“Janiw jumax lurkistati” siskaspati,

janirakiw mä kuna ñiq'it luratas luririparux:

“Jumax janiw kuna luratamsa yatktati” siskaspati.

Israelar qhispiyañatak arsüwinaka

17Mä qawqha pachatxa

ch'umix yapuchañ uraqiruw tukxani,

yapuchañ uraqinakasti ch'umirurakiw tukxani.

18Uka urun uqaranakax

kuntix jupanakatak maynix ullarkani uk ist'apxani,

juykhunakas uñjxapxarakini,

jupanakatakix janiw laxa ch'amakas utjkxaniti.

19Llamp'u chuymani jaqinakasti,

jan kunani jaqinakasa,

Qullan Tatitun kusisipxani.

20Ñanqha jaqinakasti tukusxapxaniwa,

jach'a jach'a tukur jaqinakas jiwarapxaniwa,

ñanqha lurañ amtir jaqinakas tukusxapxaniwa,

21k'ari jaqinakasti tukusxapxaniwa,

ina ch'usat tumpantirinakas tukusipxaniwa.

Khitinakatix jucha taripirinakar sipitanak uchapki,

jan juchanirus k'arimpi juchañchapki

ukanakas tukusxaniwa.

22Ukatpï Israelan Tatitu Diosapaxa,

Abrahamar qhispïykän ukax sixa:

“Akat uksarux Jacobux janiw kunatsa p'inqaskxaniti,

janirakiw ajanupas wilaptkxaniti,

23kunapachatix Jacobun wawanakapax

markap taypin kuntix lurkta uk uñjapkani ukkhaxa,

nayan qullana Diosätax yatipxani,

nayar aski uñjañ uñacht'ayapxitani.

24Khitinakatix pantjat sarnaqapkän ukanakasti,

amuyt'asiñ yatiqxapxani,

mayninakxat parlirinakasti,

yatichäwinakaparuw jaysxapxani.”