JOSUÉ 23 - Qullan Arunaka DC

III. JOSUÉ CHACHAN QHIPA ARUNAKAPA, ARUST'AWIN MACHAQAT UTT'AYATÄTAPA(23—24)Josué chachax Israel markaruw parli

1Walja maranakaw sarakipxäna, kunapachatix Diosax Israel markaru uñisirinakapat samarañ churäna ukatxa, Josué chachasti wali chuymanïxarakïnwa,

2ukat jupax taqi Israelitanakaru, chuyman jaqinakaru, jilïrinakaru, taripirinakaru, jilïr irpirinakaruw jawsayäna, jupanakarusti sänwa:

“Nayax sinti awkïxtwa, walja maranïxaraktwa.

3Jumanakax uñjapxtawa, kunjämtix Tatitux uñisirinakamaru lurki ukxa, jupa kipkarakiw jumanakat arxatasa nuwasïna.

4Nayasti sapaqat aylluruw taqi aka uraqinak kunjämarutix wakt'apktam ukhamarjam lakintapxsma. Janiw katuntat uraqinakakti lakintapksma, jan ukasti, kawkïr uraqinakatix jan katuntatäki ukanakamppach lakintapxaraksma, inti jalsu tuqit Jordán jawirat qalltasa, inti jalanta tuqirusti Mediterráneo sat jach'a qutakama.

5Tatituw uka uraqinakan jakirinakarux jaqunukuskani, ukatsti jumanakaw katuntapxäta kunjämtix Tatitux arsuwayki ukhamar phuqhasa.

6“Moisesan kamachipan qillqatäki uka arunakar phuqhañatak chamañcht'asipxam; uka arunakat janirak ch'iqa tuqirusa, kupi tuqirus saranukupxamti.

7Jumanak taypin jakapki uka yaqha markankir jaqinakampix janipun chikachasipxamti, janiraki diosanakaparus yupaychapxamti, jaysapxamsa; sutinakapsa janipun aytasipxamti, jupanak laykus juramento lurapxamti.

8Tatitu Diosamarupun arkapxam, kunjämtix jichhakam arkasipkta ukhama.

9Tatitux ch'aman jach'a markanakaruw jumanak nayraqatat jaqunuku, jichhürkamasti janiw khitis jumanakar saykatapktamti.

10Jumanakat maynikiw waranqa jaqinakarux jaltayaspa, Tatitu Diosamax jumanakat arxatasin nuwasitap layku, kunjämtix jupa kipka arsuwayki ukarjama.

11Jumanak pachpat amuyasipxam, Tatitu Diosamarusti munasipxam.

12-13Nayax jumanakan yatipxañam munta: jumanakatix Tatitut armasipxäta, ukatsti jumanak taypin qhiparki uka jaqinakampi chikachasipxäta, jupanakampis jaqichasipxarakïta ukaxa, Tatitu Diosamax janiw uka markanakarux jumanak nayraqatat jaqunukkaniti, jan ukasti Diosax qänar uñtata, sipitar uñtataw jupanakarux apnaqani, jikhaninakamatakix jawq'añar uñtata, nayranakamatakisti ch'aphir uñtata, jumanakat jan maynis kawkïr uraqtix Tatitux churapktam uka uraqin qhiparapxañamkama.

14“Nayax niyaw jiwxä, ukampis nayraqatax muntwa, jumanakan taqi chuymampi, taqi amuyumpi amtasiñanakama, kuna askinaktix Tatitux arsuwayapktam taqi ukanakan taqpacha phuqhasitapa. Janiw mä arsutapas jan phuqhaskiti.

15Ukampisa, kunjämtix Tatitux suma arsutanakapar phuqhawayki, ukhamarakiw jupax kunayman jan walt'añanak jumanakxaru apayanini, jumanakat jan maynis aka uraqina, kawkïrtix Tatitux churapktam uka suma uraqin qhiparapxañamkama,

16janitix jumanakax kawkïr arust'äwtix Tatitux jumanakampi lurki ukar phuqhapkäta ukapacha. Jumanakatix yaqha diosanakaru yupaychasina jupanakatak alt'asipxäta ukaxa, Tatitusti jumanakatakix q'apisiniwa, ukatsti jank'akiw jupan churat aka suma uraqit chhaqtayapxätam” sasa.