LEVÍTICO 22 - Qullan Arunaka DC

Tatitur luqtatäki ukanak manq'añxata

1Tatitux Moisesaruw akham säna:

2“Aaronampiru wawanakapampirusti akham sarakim: Jupanakax wal amuyasipxañapawa kuna yänaktix israelitanakax nayar luqtapkitu ukanakatxa, ukhamat jupanakax nayan qullan sutix jan ñanqhachasipkañapataki. Nayätwa Tatituxa.

3“Jupanakarusti sarakim, jichhasa akat qhiparusa kawkïritix Aaronan yuqanakapat jan q'umäkasina, kuntix israelitanakax nayatak yaqhachapki ukanak nayar luqtkitani ukasti, nayan nayraqataxat apanukutäniwa. Nayätwa Tatituxa.

4“Aaronan yuqanakapata, kawkïritix lepra usunïki jan ukax chhuxurasiñapat jathapsa inak aywiyaskani ukasti, jupanakan q'umachasiñapkamax janiw qullan yänakat manq'apkaniti.

“Khititix mä jiwat jaqin kuna q'añupsa llamkt'ani, jan ukax jathap aywiyir jaqirus llamkt'ani,

5mä katarir llamkt'asas q'añuchasini, mayni jaqisa q'añükasin mayni jaqi masipar llamkt'asin q'añu tukuyani,

6uka jaqisti jayp'ukamax q'añuw uñjasini, janirakiw qullana yänakatsa manq'añapäkaniti janitix umampi jariqaskani ukapachaxa.

7Intix jalantxani ukkhaw q'uma uñjasxani, ukapachaw uka qullan yänakat manq'asxani jupan manq'añapätap layku.

8Jupa pachpa jiwata mä uywan aychapsa, jan ukax monte animalan jiwayat uywan aychapsa janipuniw manq'kaniti, ukhamat jan q'añuchasiskañapataki. Nayätwa Tatituxa.

9“Jupanakarusti nayan kamachinakaxar phuqhas sarnaqapxpan sarakim, janitix uka kamachinakar phuqhapkani ukasti, jiwarapxaniwa. Naya Tatituw jupanakarux nayatak yaqhachasta.

10“Janipuniw yaqha jaqix kunatix qullanäki ukanakat manq'añapäkiti.

“Sacerdoten qurpachatapäpasa, irnaqiripäpasa, janipuniw uka qullan manq'anakat manq'apxañapäkiti.

11“Sacerdotetix mä irnaqirip qullqipampi alasini ukkhasti, uka alasit irnaqiripax uka qullan manq'anakat manq'askaspawa. Sacerdoten utapan yuririnakas uka qullana manq'anakat manq'asipkaspawa.

12“Sacerdoten phuchhapatix jan sacerdote mä jaqimp jaqichaskani ukasti, jupax uka qullan manq'anakat janiw manq'añapäkiti.

13Ukampis ijma warmïxchi, chachapamp jaljtatäxchi, janirak wawanïkchi, awkipan utaparus sapäkaspas ukham kuttanxchi ukkhakiw awkipan manq'añapat manq'aspaxa. Ukatsipana janipuniw yaqha jaqinakax uka manq'at manq'añapäkiti.

14“Maynitix pantjasisin uka qullan manq'a manq'ani ukkhaxa, sacerdoterux uka manq'atxa mä juk'amp yapxatasaw kuttayxañapa,

15ukampis sacerdotenakax janipuniw israelitanakan qullan luqtanakap takisipxañapäkiti, ukanakan Tatitur luqtatätap layku,

16khititix uka qullan manq'anakat manq'kani ukasti juchanchatäniwa. Naya Tatituw ukanak yaqhachasta.”

Tatitur luqtatäki uka uywanakxata

17Tatitux Moisesaruw akham sarakïna:

18“Aaronampi, yuqanakapampi parlam, taqi israelitanakarus akham sarakim: Israelita mä jaqitixa, jan ukax jumanak taypin jakir yaqha markat jutir jaqisa, mä uywa nakt'ayasina Tatitur luqtaña munanixa, mä arsüwi phuqhañatakisa jan ukax chuymapan churañ munatapatsa,

19uka uywax mä urqu vacäpasa, mä urqu ovejäpasa jan ukax mä cabritöpasa,

20katuqatäñapatakix jan kamacht'at k'umara uywäñapawa, janitix k'umaräkani ukapachasti janiw katuqatäkaniti.

21“Khititix sumankthapiñatak wilañcha Tatitur luqtani, mä arsüwi phuqhañatakisa jan ukax chuymapan churañ munatapatsa, uka urqu vacasa, jan ukax urqu ovejasa jan kamacht'ata k'umara uywäñapawa.

22Jan Tatiturux juykhu uywanaka, usuchjatanaka, kayu wixchunaka, sirk'iraranaka, qarachrantatanaka, ukham uywanak altaran nakt'ayasax luqtapxamti.

23Kawkïr urqu vacatixa, jan ukax urqu ovejan kayunakapach ch'ulla ch'ulläni uka uywxa, chuymaman luqtañ munatamat luqtaskasmawa, ukampis mä arsüwim phuqhañ munasintix luqtäta ukkhaxa, janiw katuqatäkätati.

24Tatiturusti janipuniw q'urut usuchjata, jan ukax capsut uywanaksa luqtapxätati. Jumanakasti uka luräwinakxa janipuniw uraqiman lurapxätati.

25Ukham usuchjat uywanaksti, yaqha markat jutir jaqinakatxa janipuniw Tatitur luqtañatakix katuqapxätati. Tatitux janiw ukham usuchjat uywanak katuqapkätamti.”

Tatitur luqtat uywanakar jiwayañxata

26Tatitux Moisesar sänwa:

27“Kunapachatix uywanakamax mä vaca qallu wawachani, jan ukax mä urqu oveja qallsa, jan ukax mä cabritsa wawachan ukkhasti, uka qallunakax paqallqu uru phuqhasiñapkamaw taykap jak'ankasipkani, ukampis kimsaqallqu uru phuqhasxipansti, uka qallunakax Tatitur wilañchat luqtatäxaniwa.

28“Janiw mä urunak vacarusa, ovejarusa, qallupamppach kharinukupxätati.

29“Kunapachatix Tatitur yuspagaras mä waxt'a churkäta ukkhasti, wali sumpun luqtam, ukhamat uka luqtäwin sum katuqatäñapataki.

30Ukhamarus ukürpach manq'antxarakim, janirak qhipürutak kuns jilt'ayamti. Nayätwa Tatit Diosaxa.

31“Nayan kamachi arunakaxarjam sarnaqapxam; phuqhapxapunim. Nayätwa Tatit Diosaxa.

32“Nayan qullana sutixsti janipun takisipxamti, ukhamat taqi israelitanak taypin nayax askit uñt'atayä. Naya Tatituw jumanakarux nayatak yaqhachasipxsma,

33nayax jumanakan Diosamäñatakiw Egiptot irpsunipxsma. Nayätwa Tatit Diosaxa.”