LEVÍTICO 13 - Qullan Arunaka DC

Lepra usu tuqit yatichäwinaka

1Tatitusti Moisesampiru, Aaronampiruw säna:

2“Kunapachatix khitin janchipansa p'usux uñstani, jan ukax phallanuqatänisa, jan ukax janchipan janq'u janchisa uñstani, jan ukax, lepra usur uñtat kuna llixtinak uñstani ukkhasti, uka jaqix Aarón sacerdoten ukar irpatäñapawa, jan ukax Aaronan yuqanakapat maynïri sacerdoten ukarusa.

3Sacerdotew uka jaqin janchipan llixtjtatap sumpach uñxatani, ukatsti llixtinkki uka ñik'utatix janq'ur tukxchi, ukatsti uka llixtis janchi manqhar mantatäxchixa, amuyatarjamasti uka llixtix lepra usütap yatisxani. Sacerdoten uka jaqir ukham sum uñxatasinxa, q'añütap qhanañchxarakini.

4“Ukat janchipantix janq'u janchix utjaspa, ukampis janirak ukax janchit sipan juk'amp manqhar mantatäkaspa ukapachasti, sacerdotex paqallqu uruw uka usut jaqirux jist'antani.

5Uka paqallqu urunak qhipatsti, sacerdotex wasitat uka usut jaqir uñxatani, ukat uka llixtitix pachpakïskani, janiraki juk'ampi aqatatatäkchi ukkhasti, wasitat uka jaqirux yaqha paqallqu urumpi jist'antani.

6Uka paqallqu urunak qhipatsti wasitat sacerdotex uka usut jaqirux uñxatani, ukat uka llixtitix niya chhaqtaskchixa, janirak juk'amp aqatatkchi ukkhasti, sacerdotex uka usut jaqirux q'umat uñt'xani, uka usun janchina aliqa mä jisk'a llixtikïtap layku. Usut jaqisti isip t'axsuqasxani, ukat q'umaw uñjasxarakini.

7“Ukampis uka llixtitix sacerdoten uñxatat qhipatsa, q'uma jaqit uñt'atatsa juk'ampi aqatataskakini ukkhaxa, sacerdoten ukaru wasitat uñjayasir sarañapawa.

8Ukatsti sacerdotex wasitat uñxatasinxa, uka llixtitix juk'ampi taqpach janchipar aqatatatätap amuyxani ukkhasti, sacerdotex uka jaqirux q'añu jaqit qhanañchxani, uka jaqin lepra usunïtap layku.

9“Kunapachatix maynix lepra usumpi llixtjtatäni ukkhaxa, sacerdoten ukar irpatäñapawa.

10Sacerdotew juparux sum uñxatani, ukat uka janchin p'usupatix janq'üchi, janchi ñik'utas janq'ur tukutächi, p'usutäkis uka janchin wawa janchir tukutächixa,

11uka jaqix jan qullkay lepra usuniwa. Uka jaqirusti sacerdotex q'añu jaqit qhanañchxañapa, ukatsti janiw jist'antatäñapax wakiskxaniti, q'añu jaqïxatap layku.

12“Ukat uka lepra usutix jank'aki aqatatani, kayut p'iqikama q'al chhaqtayani, kawkhakamatix sacerdotex uñjkaspa ukkhakama ukasti,

13sacerdotex uka usut jaqirux sum uñxatani; uka usutix taqpach janchip chhaqtaychi, uka usun janq'u tukxatap laykuxa, sacerdotex uka jaqir q'uma jaqit qhanañchxani, jupasti q'umaw uñjasxarakini.

14Ukampisa kunürutix uka jaqin janchipan wawa janchik uñstxani ukapachasti, uka jaqix q'añu jaqit uñt'atäxaniwa.

15Ukhamasti sacerdotex uka wawa janchi sum uñxatani, ukatsti q'añütap qhanañchxarakini, uka wawa janchix q'añu, lepra usütap layku.

16“Ukampis uka wawa janchitix janq'ur tukxani ukkhasti, uka usut jaqix sacerdotempi

17uñxatayasir sarañapawa, sacerdotetix uka llixtin janq'ur tukxatap uñjani ukapachasti, uka jaqirux q'uma jaqit qhanañchxani, q'umäxatap layku.

18“Kunapachatix mayni jaqin janchipan mä llixtix uñstani, ukat uka llixtix jakxarakini,

19ukatsti uka p'usux janq'ur tukxani, jan ukax janq'u wilaratas tukxani ukkhasti, uka jaqix sacerdoten nayraqataparuw uñstañapa.

20Uñxatasintix sacerdotex uka janchin kawkhatix p'usutäki ukkhax juk'amp janchi manqhankatapa, ñik'utas janq'ur tukutap uñjani ukkhasti, sacerdotex uka jaqirux q'añut qhanañchxarakini, uka llixtin lepra usütap layku.

21Ukampis sacerdotetix uka llixtjtatäki ukkhan janq'u ñik'uta jan utjatap uñjani, janirak uka llixtis janchir juk'amp manqhar mantatapa, jan ukasti chhaqtaskatapa, ukapachasti sacerdotex uka jaqirux paqallqu uruw yaqha chiqan jist'antat utjayani.

22Ukatsti uka llixtitix juk'ampi janchipar aqantaskakini ukapachasti, sacerdotex uka jaqirux q'añut qhanañchxarakini, lepra llixtinïtap layku.

23Ukampisa uka llixtjata chiqatix jan juk'ampi aqatatkani ukkhasti, sacerdotex juparux q'uma jaqit qhanañchxarakini.

24“Kunapachatix maynix janchip qhathsuyasini, ukatsti uka qhathsuta wawa janchi patarutix wila, jan ukax, janq'u llixtis uñstkani ukkhasti,

25sacerdotew uñxatañaparaki. Uka janchin t'arwapatix janq'ur tukxani, uka llixtis janchir juk'ampi manqhar mantani ukkhasti, uka nakhantat janchinxa lepra usun sartatapaw yatisini; ukhamasti sacerdotex uka jaqirux q'añut uñt'xani, lepra usunïtap layku.

26Ukampis sacerdotetix uñjani uka llixtjtatäki ukkhan janq'u ñik'utax jan utjatapa, janirak uka llixtis janchir juk'amp manqhar mantatapa, jan ukasti chhaqtaskatapa, ukapachasti sacerdotex uka jaqirux paqallqu uruw yaqha chiqan jist'antat utjayani.

27Ukat uka paqallqu urunaka phuqhasxipansti, sacerdotex wasitat uka jaqirux uñxatani, ukatsti uka llixtitix juk'ampi janchipar aqantaskakini ukapachasti, sacerdotex uka jaqirux q'añu jaqit qhanañchxani, uka llixtin lepra usütap layku.

28Ukampisa uka llixtitix jan juk'ampi janchin aqatatkani, ukatsti chhaqtaskarakini ukkhasti, uka llixtix janchi qhatsutat p'usutakiwa, ukhamasti sacerdotex uka usut jaqirux q'uma jaqit qhanañchxani, uka llixtix janchi qhatsutat t'iri jakthapiskatap layku.

29“Kunapachatix mä chachana, jan ukax mä warminsa p'iqipana, jan ukax sunkhapansa mä llixtix uñstani ukkhasti,

30sacerdotew uk uñxatañapa. Uka llixtitix janchit juk'ampi manqharu mantatäni, ñik'utasa jan ukax sunkhas chuchirkipstatäni, ukatsti mä mayakirakïni ukkhasti, sacerdotex uka jaqirux q'añu jaqit uñt'xani, tiña sat yaqha lepra usunïtap layku.

31Uka llixti uñxatasatix sacerdotex uka llixtin janchir jan juk'amp mantatap uñjani, ñik'utapasa, jan ukax sunkhapas ch'iyarar jan tukutäkchi ukaxa, uka usut jaqirux paqallqu uruw yaqha chiqan jist'antat jakayani.

32Paqallqu uru qhipatsti, sacerdotex wasitat uka jaqin janchip uñxatani, uka llixtitix jan juk'ampi aqatatatäkani, janchi manqharus juk'amp jan mantatäkani, janirak ñik'utapasa, sunkhapas chuchïkani ukkhasti,

33sacerdotex uka jaqirux ñik'utapsa, sunkhapsa q'al mururasiyani, kawkhatix llixtjtatäki uka chiqak jilt'ayani, ukatsti yaqha paqallqu urumpi yaqha chiqan jist'antat jakayani.

34Uka paqallqu urutsti sacerdotex wasitat uka jaqin janchip uñxatani, ukat uka llixtitix jan juk'ampi aqatatatäkchi, janirak juk'ampi janchi manqharus mantatäkchi ukapachax, sacerdotex uka jaqirux q'uma jaqit uñt'xani, ukat uka jaqix isip t'axsuqasxani, ukatsti q'uma jaqit uñt'atäxarakiniwa.

35Ukampisa uka llixtitix q'uma jaqit uñt'atäxatap qhipat juk'ampi aqatataskakini ukkhasti,

36sacerdotex wasitat uka usut jaqirux uñxatani, ukat uka llixtitix juk'amp aqatatatakïskani ukapachasti, janiw chuchi ñik'uta thaqhañax munaskxaniti, jan ukasti uka jaqix q'añuta uñt'atakïxaniwa.

37Ukampis sacerdotetix uka llixtin juk'ampi jan aqatatatap uñjani, ch'iyar ñik'utas jilsunkchi ukasti, uka llixtin niya jakthapiskatap amuyxani, ukapachaw sacerdotex uka jaqirux q'uma jaqit qhanañchxani.

38“Kunapachatix mä chachana jan ukax mä warmin janchiparus janq'u chhayphu llixtjama uñstkani ukapachasti,

39ukax janchin mä jisk'a usukïtap amuyasini, ukatsti uka jaqix q'umakïskaniwa.

40“Mä jaqirutix p'iqi ñik'utapax willirtxchi, ukat p'iqi q'ara uñjasxarakchi ukkhasti, uka jaqix q'uma jaqit uñt'atäskiwa.

41Mayni jaqirutix ñik'utapax nayräxa tuqit willirtxchi, ukat p'iqipan nayräxa tuqit q'ara uñjasxchi ukapachasti uka jaqix q'umäskiwa.

42Ukampisa mä janq'u wila llixtitix p'iqi q'arawjan uñstkani ukkhasti, ukax p'iqi q'arawjan lepra usu sartaskatap sañ muni.

43Ukhamïpansti, sacerdotew ukxa sum uñakipani, uka llixtitix p'iqi q'arawjan janq'u wiläni, kunjämatix lepra usux janchin mistki uka kipkäni ukkhasti,

44uka jaqix lepra usuniwa, ukatsti sacerdotex q'añu jaqit qhanañchxani.

45“Khititix lepra usunïki ukax ch'iyanuqat isimpiw uchasini, p'iqipasti q'arakiraki, ajanupas chikat imt'ataw akham sas arnaqasini: ‘¡Q'añütwa! ¡Q'añütwa!’ sasa.

46Uka llixtinakapan utjañapkamasti uka jaqix q'añut uñt'atäniwa, sapakirakiw campamentot anqäxana jakani.

47“Kunapachatix kuna q'añus t'awrat lurata, jan ukax linot lurat isin uñstani,

48jan ukax lip'ichit lurat mä kuna yänakansa uñstani,

49ukat uka q'añutix ch'uxñaptani jan ukax wilaptanisa, ukapachasti ukax lepra usütap qhanañchani, uksti sacerdoteru uñacht'ayatäñapawa.

50Sacerdotew uka q'añuchat isi uñxatani, ukatsti paqallqu urutakiw q'añuchat yänak yaqhachas jist'antani.

51Paqallq uru qhipatsti sacerdotex wasitat uñxatani, ukat uka q'añutix p'itat isinakana, lip'ichit lurat yänakan juk'ampi aqatatatäni ukapachasti, uka q'añux lepra usütapaw yatisini, uka yänakasti q'añuta uñt'atäxarakiniwa.

52Ukhamasti kawkïri yänakatix ukham q'añuchjatäni ukanakasti q'ala nakhantayatäxañapawa, jan wali lepra usütap layku;

53ukampis sacerdotetix uka q'añun jan juk'ampi aqatatatap uñjani ukkhasti,

54sacerdotex uka isinak t'axsuqatäñapatakiw mayini, ukatsti uka yänakax paqallqu urunakampi jist'antatarakïniwa.

55“Uka isinak t'axsutat qhipatsti, sacerdotex wasitat uñxatani. Uka q'añun jan chhaqtataptix amuyani ukkhasti, jan walt'ayir q'añütap laykusti, uka yänakax phichkatatäñapawa.

56Uka q'añu uñxatasintix sacerdotex amuyani ukax t'axsuqatäxatapat chhaqtxatapa, ukapachasti, q'añüki uka chiqsti isitsa, jan ukax lip'ichitsa ch'iyaqañapawa.

57Ukampis wasitattix uka isina, jan ukax uka lip'ichit lurata yänakansa uka q'añux aqatatat uñstani ukapachasti, uka yänakax q'ala nakhantayatäxañapawa.

58Ukampis t'axsuta qhipat q'añux chhaqtani ukaxa, wasitat t'axsuqatäñapawa, ukat q'umachat yänakäxarakini.”

59Akanakaw isin utjir lepra usun yatichäwinakapaxa, t'awrat lurat isinakansa, jan ukax lip'ichit lurat yänakansa uñstpan, ukhamat uka yänakarux q'umata jan ukax q'añutsa uñt'xañataki.